ភ្នំពេញ ៖ ចោរលួចទ្រព្យសម្បត្តិម្នាក់ ត្រូវបានម្ចាស់ផ្ទះប្តឹងសមត្ថកិច្ចឲ្យមកចាប់ខ្លួនជាក់ស្ដែង ខណៈដែលជននេះបានកំពុងតែធ្វើសកម្មភាពគាស់ឃ្លាំងលក់គ្រឿងសំណង់របស់គេចូលលួចយកដែក និងសម្ភារៈផ្សេងៗទៀត កាលពីព្រលប់ថ្ងៃទី១២ ខែធ្នូ ឆ្នាំ២០១៨ នៅក្នុងសង្កាត់ឃ្មួញ ខណ្ឌសែនសុខ។
ជនដែលត្រូវបានចាប់ខ្លួនខាងលើ ឈ្មោះ មាន ពេជ្រ ភេទប្រុស អាយុ២៧ឆ្នាំ មានទីលំនៅភូមិបន្លាស្អិត សង្កាត់ឃ្មួញ ខណ្ឌសែនសុខ គ្មានមុខរបរច្បាស់លាស់។
លោក ញាណ នន នាយប៉ុស្តិ៍នគរបាលរដ្ឋបាលសង្កាត់ឃ្មួញ មានប្រសាសន៍ថា ជនសង្ស័យខាងលើត្រូវបានចាប់ខ្លួនតាមបណ្ដឹងចោទរបស់ ឈ្មោះ បៀន មុន្នី ភេទប្រុស អាយុ៥៦ឆ្នាំ ជាជនរងគ្រោះម្ចាស់ទ្រព្យសម្បត្តិ។
តាមបណ្តឹងរបស់ជនរងគ្រោះបានឲ្យដឹងថា នៅមុនពេលកើតហេតុគាត់បានចាក់សោទ្វារឃ្លាំងលក់គ្រឿងសំណង់របស់គាត់យីហោ លក់គ្រឿងសំណង់មុន្នី២ មានទីតាំងជាប់ផ្លូវលេខ១០១៩ សង្កាត់ឃ្មួញ រួចត្រឡប់មកផ្ទះវិញ នៅភូមិក្រុងថ្មី សង្កាត់គោកឃ្លាង ខណ្ឌសែនសុខ នៅវេលាម៉ោង១៧ល្ងាច។
គាត់បានបន្តថា ក្រោយមកនៅវេលាម៉ោង៧យប់មក គាត់បានបើកទូរស័ព្ទឆែកកាមេរ៉ាសុវត្ថិភាពដែលបំពាក់នៅឃ្លាំងលក់គ្រឿងសំណងនោះមើល ស្រាប់តែឃើញជនសង្ស័យខាងលើកំពុងចូលក្នុងឃ្លាំរបស់គាត់លួចយកដែក និងរ៉ឺម៉កម៉ូតូ ម៉ាកំប្លេ ភ្លាមៗនោះគាត់ក៏បានរូតរះទូរស័ព្ទប្តឹងប៉ូលិសបណ្ដើរធ្វើដំណើរសំដៅមកទីនោះបណ្ដើរ ដើម្បីចាប់ខ្លួនចោរនេះ បានជាក់ស្ដែងតែម្ដង។
ស្ថានភាពជាក់ស្តែងដែលចោរនេះបានកំពុងលួចមាន ដែកថ្នាំងអំពៅ ទំហំ១២លី ចំនួន៨២ដើម ទម្ងន់ជាង១តោន និងរ៉ឺម៉កសម្រាប់ដឹកថ្មខ្សាច់ រួមនឹងម៉ូតូម៉ាកគុបជ្រុងមួយគ្រឿងទៀត សម្រាប់សណ្ដោងរ៉ឺម៉កនោះ។
ជនសង្ស័យបានសារភាពដោយសារមិនអាចប្រកែកបានចំពោះសកម្មភាពល្មើសច្បាប់ ជាក់ស្ដែងរបស់គេ មានថតជាប់ដោយប្រព័ន្ធកាមេរ៉ាវីដេអូសុវត្ថិភាព ដែលម្ចាស់ឃ្លាំងបានបំពាក់នៅទីនោះស្រាប់។
ប៉ូលិស បានចាប់ខ្លួនជនសង្ស័យ បញ្ជូនទៅឲ្យតុលាការផ្ដន្ទាទោសតាមច្បាប់ យោងតាមបណ្ដឹងរបស់ជនរងគ្រោះ៕
Source: Kampuchea Thmey Daily
0 Comments