ភ្នំពេញ ៖ លោក គង់ បូរ៉ា អតីតតំណាងរាស្ត្រមណ្ឌលព្រៃវែង និងជាអតីតសមាជិកគណៈកម្មាធិការនាយករបស់អតីតគណបក្សសង្គ្រោះជាតិ (CNRP) ហើយត្រូវបានគេស្គាល់ថា ជាកូនប្រុសសំណព្វរបស់លោក គង់ គាំ នោះ បានលេបកំអួតខ្លួនឯង ដោយសារតែបានប្រកាសមិនទទួលយកការដកបម្រាមនយោបាយ ក្រោយពីមានភ្លើងខៀវពីប្រមុខរាជរដ្ឋាភិបាល ប៉ុន្តែនៅពេលសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយត្រូវបានរដ្ឋសភាអនុម័ត លោក គង់ បូរ៉ា បែរជាប្រកាសត្រៀមខ្លួនដើម្បីចូលធ្វើនយោបាយឡើងវិញ។
តាមសំណេរលើបណ្តាញសង្គមហ្វេសប៊ុកផ្ទាល់ខ្លួនរបស់លោក គង់ បូរ៉ា កាលពីទី១២ ខែធ្នូ ឆ្នាំ២០១៨ លោក គង់ បូរ៉ា បានលើកឡើងថា “ក្នុងចំណោម១១៨នាក់ មាន “ក្បាលមិនទើសមាឃ ជើងមិនជាប់ដី “១១៨នាក់ តើមានប៉ុន្មាននាក់ ដែលកំពុងសុំសិទ្ធជ្រកកោណនយោបាយ នៅឯនាយសមុទ្រ ? ជួយរាយការណ៍ជូនសម្តេចផងថា ពួកខ្ញុំជាប់សុំសិទ្ធជ្រកកោណនយោបាយហើយ មិនត្រូវការឲ្យសម្តេចនាយករដ្ឋមន្ត្រី ហ៊ុន សែន បើកផ្លូវឲ្យពួកខ្ញុំធ្វើនយោបាយឡើងវិញនោះទេ បន្ទាប់ពីវិសោធនកម្មច្បាប់ស្តីពីគណបក្សនយោបាយរួចនៅពេលខាងមុខនេះ”។
ការលើកឡើងរបស់លោក គង់ បូរ៉ា នេះមិនបានមួយដង្ហើមចង្រិតផង គឺគ្រាន់តែរដ្ឋសភាបានអនុម័តសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយកាលពីព្រឹកថ្ងៃទី១៣ ខែធ្នូ ភ្លាម លោក គង់ បូរ៉ា បានចេញមកប្រកាសថា “ខ្ញុំ គង់ បូរ៉ា បានត្រៀមខ្លួនរួចហើយ ដើម្បីស្នើសុំសិទ្ធិធ្វើនយោបាយឡើងវិញ បន្ទាប់ពីសេចក្តីស្នើវិសោធនកម្មច្បាប់ស្តីពីគណបក្សនយោបាយចូលជាធរមាន”។
ការចេញមកប្រកាសជំហរបែបចុងស្រល់នេះ ប្រហែលជាលោក គង់ បូរ៉ា មិនបានមើលជំហរឪពុក (លោក គង់ គាំ) ខ្លួនឯងជាមនុស្សបែបណា ឬអាចនិយាយបានថា លោក គង់ បូរ៉ា ជាកូនអកតញ្ញូ មិនស្តាប់ដំបូន្មានឪពុកម្តាយ លុះដើរដល់ផ្លូវទាល់ច្រក ក៏ត្រឡប់មកដើរតាមច្រករបស់ឪពុកវិញ។ បើធ្វើនយោបាយបែបនេះ អាចធ្វើជាមេដឹកនាំគេបានទេ ? កូនចៅអាចដើរតាមបានទេ បើម្តងទៅលិច ម្តងទៅកើត ម្តងបត់ឆ្វេង ម្តងបត់ស្តាំបែបនេះ។
សូមបញ្ជាក់ថា សេចក្តីស្នើច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ ត្រូវបានរដ្ឋសភាអនុម័តកាលពីព្រឹកថ្ងៃទី១៣ ខែធ្នូ ឆ្នាំ២០១៨ ដើម្បីបើកផ្លូវឲ្យអតីតថ្នាក់ដឹកនាំគណបក្សសង្គ្រោះជាតិ មានសិទ្ធិពេញលេញក្នុងការធ្វើនយោបាយឡើងវិញ ដោយសំឡេង១១៥លើ១១៥។
ក្រោយពីច្បាប់នេះ ត្រូវបានអនុម័ត មានអតីតអ្នកនយោបាយប្រឆាំងជាច្រើន ដែលជាប់បម្រាមបានសាទរ តែពួកគេមិនហ៊ានចេញសំឡេងតាមប្រព័ន្ធផ្សព្វផ្សាយនោះទេ ដោយខ្លាចការលាបពណ៌ពីមនុស្សមួយចំនួន ដែលគេមិនពេញចិត្ត។
ចំណែក គង់ គាំ អតីតមេដឹកនាំបក្សប្រឆាំងដែរនោះ មិនបានខ្លាចការលាបពណ៌ពីអ្នកផ្សេងនោះទេ ហើយបានប្រកាសតាមបណ្តាញព័ត៌មានថា លោកនឹងធ្វើសំណើសុំសិទ្ធិធ្វើនយោបាយឡើងវិញ ក្រោយពីច្បាប់នេះ ត្រូវបានព្រះមហាក្សត្រចេញព្រះរាជក្រមប្រកាសឲ្យប្រើប្រាស់ជាផ្លូវការ ហើយបើតាមការបង្ហើបរបស់នាយករដ្ឋមន្ត្រី ច្បាប់នេះ គឺសម្រាប់តែអ្នកដែលគោរពតាមសាលដីការបស់តុលាការកំពូលប៉ុណ្ណោះ ទើបអាចមានឱកាសទទួលបានសិទ្ធិនយោបាយឡើងវិញ ហើយអ្នកជាប់បម្រាម ត្រូវធ្វើសំណើជាលក្ខណៈបុគ្គល ឬជាក្រុមដែលមានគ្នាបួន-ប្រាំនាក់ ផ្ញើជូននាយករដ្ឋមន្ត្រីពិនិត្យ៕
Source: Kampuchea Thmey Daily
0 Comments