កីឡាករ Leroy Sane រកបាន២គ្រាប់ម្នាក់ឯង ខណៈពេលដែលក្រុម Man City ឡើងដល់វគ្គចែកពូល Champions League Knockoutសម្រាប់រដូវកាលទី៦ជាប់ៗគ្នា។
លោក Pep Guardiola បាននិយាយថា ការឡើងទៅវគ្គ១៦ចុងក្រោយ Champions Leagueរបស់ក្រុម Man Cityគឺជាជោគជ័យដ៏អស្ចារ្យជាទីបំផុត ខណៈពេលដែលពួកគេឈរនៅលើកំពូលតារាងពូល Fជាមួយជ័យជំនះ២-១លើក្រុម Hoffenheim ។
អ្នកចាត់ការរបស់ក្លិប Man Cityម្នាក់នេះ បាននិយាយថា ក្រុមអ្នកចាត់ការសុទ្ធតែល្អ ហើយក្រុមល្អបំផុតនៅអឺរ៉ុបនៅទីនេះ។
លោកបន្តថា ក្រុមធំៗជាច្រើនសុទ្ធតែនៅទីនេះ តែពួកគេបានហាលអាវអស់ហើយ។ ក្រុម Inter Milanគឺជាក្រុមដ៏ពិសេស ប៉ុន្តែពួកគេបែរជាជ្រុះទៅលេងនៅការប្រកួត Europa League ។
ដោយឡែក ក្រុមអធិរាជស Real Madridបានទទួលរងបរាជ័យធំបំផុតមិនធ្លាប់ដែលមាននៅបាល់ទាត់អឺរ៉ុប ពេលដែលពួកគេចាញ់ក្រុម CSKA Moscow០-៣នៅការប្រកួត Champions Leagueកាលពីថ្ងៃពុធ។
ក្រុមជើងឯកបាល់ទាត់អឺរ៉ុបមួយនេះ ដែលបានឈ្នះពូល Gរួចទៅហើយនោះ បានដាក់ក្រុមខ្សោយឲ្យចូលលេងនៅការប្រកួតមួយនេះ។
កីឡាករ Fedor Chalov ស៊ុតបាល់កោងចូលសំណាញ់ទីក្រុមម្ចាស់ផ្ទះ សម្រាប់គ្រាប់បាល់បើកឆាករបស់ក្រុម CSKA Moscow ហើយកីឡាករ Georgy Schennikov ពេនមួយជើងទៀត សម្រាប់គ្រាប់បាល់ទី២ ក្រោយការស៊ុតបាល់របស់កីឡាករ Mario Fernandes ត្រូវបានគេសង្គ្រោះបាន។
ដោយឡែក កីឡាករវ័យក្មេងអ៊ីសឡង់ Arnor Sigurdsson បញ្ចប់ជ័យជំនះដ៏មានទំនុកចិត្តជាមួយនឹងការស៊ុតបាល់នៅជិតបង្គោលទី៕
Source: Kampuchea Thmey Daily
0 Comments