ភ្នំពេញ ៖ លោក ទេព នីថា អគ្គលេខាធិការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុ សាធារណៈ នៃ គ.ជ.ប បានណែនាំឲ្យមន្ត្រីជំនាញត្រូវយកស្មារតីក្នុងភាពជាម្ចាស់ ខិតខំប្រឹងប្រែងអនុវត្តកិច្ចការកែទម្រង់ការគ្រប់គ្រងហិរញ្ញវត្ថុសាធារណៈ គឺពង្រឹងសមត្ថភាពក្នុងការរៀបចំផែនការថវិកា និងអនុវត្តថវិកាកម្មវិធី ជាពិសេសនីតិវិធីការត្រួតពិនិត្យ តាមដាន និងវាយតម្លៃអំពីសកម្មភាពអនុវត្តនៅរៀងរាល់ឆ្នាំជាបន្តបន្ទាប់ ដើម្បីទទួលបានលទ្ធផលចុងក្រោយប្រកបដោយសុក្រឹតភាព និងគណនេយ្យភាពតាមការរំពឹងទុក។
ការណែនាំនេះ ធ្វើឡើងក្នុងពិធីបិទសិក្ខាសាលាស្តីពី ”នីតិវិធីនៃការត្រួតពិនិត្យ តាមដាន និងវាយតម្លៃការអនុវត្តថវិកាកម្មវិធី” ដល់អ្នករាជការ គ.ជ.ប នៅខេត្តកំពង់ចាម កាលពីរសៀលថ្ងៃទី១២ ខែធ្នូ ឆ្នាំ២០១៨។
លោក ទេព នីថា លើកឡើងថា ក្នុងការអនុវត្តកិច្ចការកែទម្រង់ការគ្រប់គ្រងហិរញ្ញវត្ថុសាធារណៈ កន្លងមកតែងតែជួបប្រទះ និងឧបសគ្គ ព្រមទាំងបញ្ហាប្រឈមមួយចំនួនជៀសមិនផុត ប៉ុន្តែតាមបទពិសោធន៍ដែលធ្លាប់ឆ្លងកាត់ និងទទួលបានជោគជ័យរួចមកហើយ ដោយសង្ឃឹមថា សិក្ខាកាមនឹងយកការយល់ដឹងនេះទៅកែលម្អ និងដោះស្រាយចំណុចខ្វះខាត ព្រមទាំងការប្រឈមនានា ដែលកើតមានពេលអនុវត្តបានទាន់ពេលវេលា និងប្រកបដោយស្មារតីទទួលខុសត្រូវខ្ពស់បំផុត។
យោងតាមគោលការណ៍ណែនាំ ស្តីពីនីតិវិធីអនុវត្តថវិកាកម្មវិធីរបស់ក្រសួងសេដ្ឋកិច្ច និងហិរញ្ញវត្ថុ ឆ្នាំ២០០៤ រាជរដ្ឋាភិបាលកម្ពុជាបានចាប់ផ្តើមអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលរួមមានបួនដំណាក់កាលគឺ ទី១- ការបង្កើនភាពជឿទុកចិត្តលើថវិកា ទី២- ការបង្កើនគណនេយ្យភាពហិរញ្ញវត្ថុ ទី៣- ការផ្សារភ្ជាប់រវាងថវិកាទៅនឹងគោលនយោបាយ ទី៣- ការបង្កើនគណនេយ្យភាពចំពោះសមិទ្ធកម្ម។
ថវិកាកម្មវិធីត្រូវបានអនុវត្តសាកល្បងចាប់តាំងពីឆ្នាំ២០០៧មក ដើម្បីដកស្រង់បទពិសោធន៍ពីការរៀបចំការអនុវត្ត និងការត្រួតពិនិត្យថវិកា ស្របតាមទិសដៅនៃការកែទម្រង់ប្រព័ន្ធថវិកាដែលបានដាក់ចេញខាងលើ ជាពិសេសការត្រៀមសម្រាប់ដំណាក់កាលទី៣។ គោលដៅយុទ្ធសាស្ត្រនៃដំណាក់កាលទី៣ ការផ្សារភ្ជាប់រវាងថវិកាទៅនឹងគោលនយោបាយបាននិងចាប់ផ្តើមនៅឆ្នាំ២០១៦ ហើយនឹងត្រូវបញ្ចប់នៅឆ្នាំ២០២០។
សូមជម្រាបថា សិក្ខាសាលានេះ ត្រូវបានរៀបចំដោយក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃ គ.ជ.ប និងឧបត្ថម្ភដោយ កម្មវិធីកែទម្រង់គ្រប់គ្រងហិរញ្ញវត្ថុសាធារណៈនៃក្រសួងសេដ្ឋកិច្ច និងហិរញ្ញវត្ថុ៕
Source: Kampuchea Thmey Daily
0 Comments