ភ្នំពេញ ៖ សាលាខណ្ឌព្រែកព្នៅ បានបើកកិច្ចប្រជុំគណៈបញ្ជាការឯកភាពខណ្ឌព្រែកព្នៅ កាលពីព្រឹកថ្ងៃទី២៥ ខែធ្នូ ឆ្នាំ២០១៨នេះ ក្រោមអធិបតីភាពលោកសុខ សម្បត្តិ អភិបាលនៃគណៈអភិបាលខណ្ឌព្រែកព្នៅ និងមន្ត្រី សំខាន់ៗគ្រប់លំដាប់ថ្នាក់ក្រោមឱវាទនៃសាលាខណ្ឌមួយចំនួនទៀតផងដែរ ផ្តោតសំខាន់ក្នុងការរៀបចំសណ្តាប់ធ្នាប់ និងអនាម័យតាមដងផ្លូវ ក្នុងការរៀបចំអបអរសាទរខួបលើកទី២០ នយោបាយឈ្នះ ឈ្នះ និងសម្ពោធវិមានឈ្នះ ឈ្នះ នាថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៨។
លោកសុខ សម្បត្តិ បានលើកឡើងថា នាចុងឆ្នាំនេះ ព្រះរាជាណាចក្រកម្ពុជា និងរៀបចំអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យ នយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៨នេះ។
លោកបន្តថា សូមឲ្យកងកងកម្លាំងមានសមត្ថកិច្ចទាំងពីថ្នាក់ភូមិ សង្កាត់រហូតដល់ថ្នាក់ខណ្ឌគ្រប់ជាន់ថ្នាក់ត្រូវជួយសម្រួលរៀបចំ និងការពារសណ្តាប់ក្នុងកម្មវិធីពិធីសម្ពោធនេះឲ្យបានគ្រប់ជ្រុងជ្រោយដើម្បីកិត្តិយសរបស់យើងទាំងអស់គ្នា និងដើម្បីតបស្នងសងគុណដល់សម្តេចតេជោ ហ៊ុន សែន ដែលបាននាំសុខសន្តិភាពជូនប្រជាពលរដ្ឋកម្ពុជា រយៈពេល២០ឆ្នាំមកនេះ។
លោកបញ្ជាក់ថា តាមសាលាសង្កាត់ទាំង៥របស់ខណ្ឌព្រែកព្នៅ ត្រូវត្រួតពិនិត្យផ្នែកសន្តិសុខក្នុងមូលដ្ឋានឲ្យបានល្អ ហើយរដ្ឋបាលខណ្ឌ និងចុះធ្វើរដ្ឋបាលចាប់ពីថ្ងៃទី២៨ មាន៣ទីតាំង ក្នុងនោះចំណុចទី១ក្រុមទី១ធ្វើរដ្ឋបាលចាប់ពីមាត់ទន្លេឡើងមកផ្លូវជាតិលេខ៥ ទី២ចាប់ពីផ្លូវជាតិលេខ៥ទៅដល់រង្វង់មូលគល់ស្ពានព្រែកព្នៅ និងទី៣ចាប់ពីគល់ស្ពានព្រែកព្នៅ ទៅដល់ផ្លូវបំបែកចូលឡុងឈិន។
លោកប្រធានគណៈបញ្ជាការឯកភាពខណ្ឌព្រែកព្នៅបានបញ្ជាក់បន្ថែមថា តាមសេចក្ដីណែនាំរបស់សាលារាជធានីភ្នំពេញ សូមបងប្អូនប្រជាពលរដ្ឋទាំងអស់ចូលរួមអបអរសាទរក្នុងព្រឹត្តិការណ៍ជាប្រវត្តិសាស្ត្រនេះ ឲ្យបានមហោឡារឹក អធិកអធម និងមានភាពសប្បាយរីករាយ រដ្ឋបាលខណ្ឌសូមធ្វើការណែនាំដល់បងប្អូនប្រជាពលរដ្ឋ ដែលជាម្ចាស់លំនៅឋាន សណ្ឋាគារ ក្រុមហ៊ុន សហគ្រាស អាជីវកម្ម សេវាកម្ម សូមចូលរួមលើកទងជាតិ តុបតែងលំអអាគារ ក្រុមហ៊ុន សហគ្រាសរៀងៗខ្លួន ត្រូវរៀបចំតែងរចនាភ្លើងពណ៌ឲ្យបានស្រស់បំព្រងគួរជាទីមនោរម្យក្នុងពេលរាត្រី ចាប់ពីថ្ងៃទី២៥ ខែធ្នូ ឆ្នាំ២០១៨ រហូតដល់ថ្ងៃទី៨ ខែមករា ឆ្នាំ២០១៩។
ទទួលបានសេចក្តីណែនាំនេះ សូមបងប្អូនប្រជាពលរដ្ឋដែលជាម្ចាស់លំនៅឋាន សណ្ឋាគារ ក្រុមហ៊ុន សហគ្រាស អាជីវកម្ម សេវាកម្ម ទាំងអស់ចូលរួមអនុវត្តឲ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់។ ជាចុងក្រោយលោកសុខ សម្បត្តិ ក៏បានផ្តាំផ្ញើដល់សង្កាត់ទាំង៥ក្នុងខណ្ឌព្រែកព្នៅ ដែលមានកសិកម្មច្រើនត្រូវអូទាញទឹកឲ្យបានគ្រប់គ្រាន់ក្នុងការបង្កបង្កើនផល ជាពិសេសត្រូវត្រួតពិនិត្យពូជ និងជីកុំឲ្យខ្វះឲ្យសោះ ជាងនេះទៅទៀតត្រូវទប់ស្កាត់រថយន្តធុនធំ និងការចុះមើលផ្លូវសំបុកមាន់ឲ្យបានជាប្រចាំ បន្ទាប់ពីការពារសន្តិសុខសុវត្ថិភាពក្នុងមូលដ្ឋាន៕
Source: Kampuchea Thmey Daily
0 Comments