ភ្នំពេញ ៖ លោកជា ពិសី អភិបាលខណ្ឌឫស្សីកែវ បានដឹកនាំមន្ត្រីដើម្បីចុះសួរសុខទុក្ខក្នុងការផ្សព្វផ្សាយគោលការណ៍របស់សម្តេចតេជោ ហ៊ុន សែន ស្តីពីការបញ្ចុះតម្លៃភ្លើងជូនបងប្អូនអាជីវករកម្មករកម្មការិនីប្រើប្រាស់តាមតម្លៃរបស់រដ្ឋ នៅត្រឹមតែ៧៤០រៀលប៉ុណ្ណោះ ក្នុងមួយគីឡូវ៉ាត់ម៉ោង ចាប់ពីខែមករា ឆ្នាំ២០១៩តទៅ។
ការចុះផ្សព្វផ្សាយនេះធ្វើឡើងនៅថ្ងៃទី២៤ ខែធ្នូ ឆ្នាំ២០១៨ ស្ថិតនៅក្នុងផ្សារគីឡូម៉ែត្រលេខ៦ សង្កាត់គីឡូម៉ែត្រលេខ៦ ខណ្ឌឫស្សីកែវ។
នាឱកាសនោះ លោកបានមានប្រសាសន៍ទៅកាន់បងប្អូនអាជីវករថា បច្ចុប្បន្នសេវាអគ្គិសនី ដែលក្រុមអាជីវករប្រើប្រាស់តាមតូបផ្សារនីមួយៗ ទូទាំងរាជធានីភ្នំពេញ មានតម្លៃចាប់ពី១,២០០រៀល រហូតដល់ទៅ១,៥០០រៀល ប្រាកដណាស់ ហើយនៅខែមករាដើមឆ្នាំ២០១៩ដ៏ខ្លីខាងមុខនេះរាជរដ្ឋាភិបាល ដែលមានសម្តេចតេជោជាប្រមុខ ដែលសម្តេចតែងតែគិតគូរដល់បងប្អូនប្រជាពលរដ្ឋ នឹងត្រូវបញ្ចុះតម្លៃមកនៅត្រឹម៧៤០រៀលប៉ុណ្ណោះ ក្នុងមួយគីឡូវ៉ាត់ម៉ោង ជាប្រភេទពាណិជ្ជកម្មធុនតូច។
លោកលើកឡើងផងដែរថា នេះគឺជាគោលនយោបាយក្រោមការគិតគូរយ៉ាងយកចិត្តទុកដាក់បំផុត របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្រាប់ទុកជាកាដូឆ្នាំថ្មីជូនអាជីវករ នាខែមករា ឆ្នាំ២០១៩ខាងមុខ។
ជាមួយគ្នានោះលោក ជា ពិសី ក៏បានលើកឡើងថា កន្លងមកបងប្អូនអាជីវករលក់ដូរតាមតូបបណ្តាផ្សារនានា ប្រើប្រាស់អគ្គិសនីពីអ្នកម៉ៅការឯកជន ដែលតូបខ្លះត្រូវបង់ក្នុងតម្លៃ ១២០០រៀល ទៅ១៥០០រៀល ក្នុងមួយគីឡូវ៉ាត់ម៉ោងនោះ បានបញ្ចុះតម្លៃសមរម្យហើយ មកនៅត្រឹមតែ៧៤០រៀលប៉ុណ្ណោះ នៅក្នុងខែមករា ឆ្នាំ២០១៩ខាងមុខនេះ ដើម្បីសម្រាលដោះបន្ទុកចំណាយរបស់អាជីវករលក់ដូរទាំងអស់គ្នា ដែលជាគោលនយោបាយផ្ដួចផ្ដើមគិតគូររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕
Source: Kampuchea Thmey Daily
0 Comments