ខ្សែការពារជម្រើសជាតិកម្ពុជា ឆេង ម៉េង បានសម្រេចចាកចេញពីក្លិបជើងឯកឆ្នាំចាស់ណាហ្គាវើល ដោយផ្ទេរទៅចូលរួមជាមួយក្លិបកីឡាបាល់ទាត់វិសាខា ដើម្បីត្រៀមរដូវកាលថ្មី ឆ្នាំ២០១៩ខាងមុខ ខណៈកីឡាកររូបនេះ បានបញ្ជាក់ពីមូលហេតុ២យ៉ាង ដែលនាំឲ្យខ្លួន សម្រេចចិត្តផ្លាស់ប្តូរទ្រនំដោយក្នុងនោះគឺទី១ការគ្រប់គ្រង និងការរៀបចំបានល្អ និងទី២ គឺការចង់ទទួលបានបទពិសោធន៍ថ្មី។
កីឡាករវ័យ ២២ឆ្នាំរូបនេះ បានលើកឡើងនៅលើប្រព័ន្ធផ្សព្វផ្សាយរបស់ក្លិបថា «ខ្ញុំសម្រេចចិត្តចូលរួមជាមួយក្រុមវិសាខា ព្រោះខ្ញុំមើលឃើញនៅទីនេះ ការដឹកនាំ និងការរៀបចំបានល្អ។ មួយទៀតខ្ញុំចង់ផ្លាស់ប្ដូរបទពិសោធន៍ថ្មី និងចង់បានអ្វីដែលថ្មី សម្រាប់អភិវឌ្ឍន៍សមត្ថភាពរបស់ខ្ញុំ។ នៅទីនេះខ្ញុំឃើញមានកីឡាករល្អៗច្រើន ហើយការប្រកួតប្រជែង ក៏មានកម្រិតខ្ពស់ដែរ។ អញ្ចឹងខ្ញុំជឿជាក់ថា នឹងធ្វើឲ្យអាជីពបាល់ទាត់របស់ខ្ញុំកាន់តែរីកចម្រើន»។
បន្ថែមលើនេះ គេបានប្ដេជ្ញាចិត្ត នឹងខិតខំហ្វឹកហាត់ ហើយស្ដាប់តាមការណែនាំរបស់គ្រូ ដើម្បីប្រជែងឱកាសជាប់ជម្រើសដំបូង និងជួយក្រុមទទួលបានលទ្ធផលល្អ នារដូវកាលក្រោយ។ កីឡាករ ឆេង ម៉េង បន្ដថា «មកទីនេះ តាមខ្ញុំគិត មិនសូវងាយស្រួលក្នុងការដណ្ដើមកៅអីជម្រើស ១១នាក់ដំបូងទេ ព្រោះមានកីឡាករល្អៗច្រើន ចឹងខ្ញុំត្រូវខំប្រឹង និងគោរពវិន័យក្រុមឲ្យបានល្អ។ ខ្ញុំប្ដេជ្ញាចិត្តថា នឹងខិតខំឲ្យអស់ពីសមត្ថភាព ដើម្បីជួយក្លិបវិសាខាឲ្យទទួលបានលទ្ធផលល្អ ដូចចាស់(ណាហ្គាវើល) ដែលខ្ញុំធ្លាប់ជួយកន្លងមក»។
គួរបញ្ជាក់ថា ឆេង ម៉េង មុនផ្ទេរមកកាន់ក្លិបវិសាខា រូបគេបានចំណាយពេល ៥រដូវកាលមកហើយ ជាមួយក្លិបណាហ្គាវើល ហើយគេបានជាប់ជម្រើសជាតិយុវជន U19 តាំងពីឆ្នាំ២០១៥ មកដែរ ហើយបានជាប់ជម្រើសជាតិជាយុវជនជាបន្ដបន្ទាប់ រហូតដល់ជាប់ក្រុមធំ ជាក់ស្ដែងកាលពីពេលថ្មីៗ ឆេង ម៉េង ក៏បានរួមចំណែកជួយក្រុមជម្រើសជាតិកម្ពុជា ក្នុងការប្រកួតពានរង្វាន់ AFF Suzuki Cup 2018 ផងដែរ៕
Source: Kampuchea Thmey Daily
0 Comments