ភ្នំពេញ ៖ សពយុវជនម្នាក់ ត្រូវបានគេប្រទះឃើញដេកស្លាប់ក្នុងថ្លុកឈាម ដោយមានស្នាមរបួសរយះក្បាល ហើយរបស់របរនៅរាយប៉ាយក្បែរខ្លួនសព ដែលគេសន្និដ្ឋានថា អាចមានជនដៃដល់តាមវាយដោយគំនុំ។
ហេតុការណ៍នេះ បានកើតឡើង កាលពីវេលាម៉ោង៥និង៥០នាទីព្រឹក ថ្ងៃទី២៦ ខែធ្នូ ឆ្នាំ២០១៨ លើដីឡូត៍ចាក់ថ្មី មាត់ប្រឡាយ តាមផ្លូវ៣០ម៉ែត្រ មុខរោងចក្រអំបោះ ភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ។
តាមប្រជាពលរដ្ឋបានឲ្យដឹងថា ខណៈដែលពលរដ្ឋ ធ្វើដំណើរតាមផ្លូវ៣០ម៉ែត្រ នៅវេលាម៉ោងខាងលើ ស្រាប់តែប្រទះឃើញសាកសព ដេកស្លាប់ផ្កាប់មុខ នៅដីឡូត៍ មាត់ប្រឡាយ ទើបផ្អើលឆោឡោ រាយការណ៍ប្រាប់សមត្ថកិច្ច ព្រោះសង្ស័យជាករណីឃាតកម្ម ខណៈដែលជនរងគ្រោះ មានស្នាម ដាច់រយះក្បាល ហូរឈាម តែទោះជាយ៉ងណាក្តី សមត្ថកិច្ច ចុះទៅដល់កន្លែងកើតហេតុ ដើម្បីពិនិត្យ សាកសួរស្រាវជ្រាវជាមុនសិន។ ដោយឡែកសម្ភារៈរបស់របរជនរងគ្រោះដូចជា ម៉ូតូម៉ាកស្កូពីមួយគ្រឿង ទូរស័ព្ទ និងរបស់ផ្សេងៗទៀតមិនមានបាត់បង់ទេ។
ខណៈដែលសមត្ថកិច្ច កំពុងសាកសួរពលរដ្ឋជុំវិញរឿងហេតុខាងលើ ក៏លេចមុខស្ត្រីចំណាស់ម្នាក់ មកអះអាងថា សពនេះជាចៅប្រុសរបស់គាត់ រស់នៅជាមួយគាត់ ដែលជនរងគ្រោះ ឈ្មោះ ស្រៀង សីលា ភេទប្រុស អាយុ២២ឆ្នាំ មុខរបរ ជាងជួសជុលទូរស័ព្ទ នៅផ្សារអូឡាំពិក ស្នាក់នៅជាមួយជីដូន ឈ្មោះ លុច សៀង ហ៊ុន អាយុ៦១ឆ្នាំ នៅបុរីសន្តិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើត ឃុំព្រែកអញ្ចាញ ស្រុកមុខកំពូល ខេត្តកណ្តាល។ ឪពុកឈ្មោះ វ៉ាន ស្រៀង អាយុ៤៨ឆ្នាំ មានម្តាយ ឈ្មោះ សឿង ហុង អាយុ៣៥ឆ្នាំ មានបងប្អូនចំនួន ៤នាក់ ស្រី១ ប្រុស៣ ជនរងគ្រោះជាកូនទី២។
តាមការបំភ្លឺពីស្ត្រីជាជីដូនបានឲ្យដឹងថា កាលពីព្រលប់ចៅប្រុសរបស់គាត់បានទៅចូលរួមកម្មវិធីខួបកំណើតមិត្តភ័ក្ដិ នៅម្តុំពោធិចិនតុង ក្នុងយប់ថ្ងៃទី២៥ ខែធ្នូ ឆ្នាំ២០១៨ លុះដល់វេលាម៉ោង១០និង៣០នាទីយប់ ថ្ងៃដដែល ដោយបាត់ចៅយូរពេក គាត់ក៏ខលទៅសួរម្តង ពេលនោះចៅប្រុសប្រាប់ថា «ចេញទៅឥឡូវហើយ» តែនៅតែមិនឃើញដល់ផ្ទះទៀត លុះដល់ម៉ោង១២រំលងអធ្រាត្រ ចូលថ្ងៃទី២៦ ខែធ្នូ នេះ គាត់ទូរស័ព្ទទៅម្តងទៀត ចូលតែមិនលើក បាត់ដំណឹងរហូតតែម្ដង លុះមកដល់វេលាម៉ោង៥និង៥០នាទីព្រឹកនេះ ស្រាប់តែមានការផ្អើលឆោឡោថាមានមនុស្សស្លាប់ ពេលមកមើលទើបដឹងថាជាចៅខ្លួនឯងទៅវិញ។
នៅកន្លែងកើតហេតុ សមត្ថកិច្ចបានសន្និដ្ឋានជាបឋមថា ករណីនេះ អាចមានជនសង្ស័យស្ទាក់វាយ កាប់ជនរងគ្រោះរុញទម្លាក់ទឹក សង្ស័យមានរឿងរ៉ាវ ឬគំនុំនៅកន្លែងផឹកស៊ី ហើយជនរងគ្រោះ មិនទាន់ស្លាប់បានស្រវាឡើងគោក ហើយដាច់ខ្យល់ស្លាប់តែម្ដង ព្រោះជើងខោរបស់ជនរងគ្រោះសើមទទឹកជោក ពេលនេះសមត្ថកិច្ចកំពុងស្រាវជ្រាវរកមុខជនដៃដល់មកផ្ដន្ទាទោសតាមច្បាប់៕
Source: Kampuchea Thmey Daily
0 Comments