អត្តពលិក ប្រមាណ៣០០នាក់ ចូលរួមរត់ប្រណាំងប្រជែងវគ្គឧបសគ្គដំបូង នៅកម្ពុជា

ភ្នំពេញ ៖ ដើម្បីបង្ហាញពីសមត្ថភាពអត្តពលិក អ្នកស្ម័គ្រចិត្តប្រមាណ៣០០នាក់ បានចូលរួមរត់ប្រណាំងប្រជែងវគ្គដ៏មានឧបសគ្គដំបូងបង្អស់នៅកម្ពុជាលើចម្ងាយផ្លូវ១គីឡូម៉ែត្រ ក្រោមការរៀបចំដោយក្រុមហ៊ុន The Idea Consultancy Co., Ltd. នៅក្នុងកម្មវិធីBreak through Barriers Dash ដែលជាការប្រណាំងប្រជែងឧបសគ្គដំបូងរបស់ប្រទេសកម្ពុជា។

កម្មវិធីរត់ប្រណាំងវគ្គដំបូងបង្អស់របស់ប្រទេសកម្ពុជា ដែលបានរៀបចំឡើងនៅរាជធានីភ្នំពេញ កាលពីថ្ងៃទី៨ ខែធ្នូ ឆ្នាំ២០១៨ គេសង្កេតឃើញអត្តពលិក ឬកីឡាករ ដែលចូលរួមប្រណាំង ដើម្បីរត់ឆ្លងដំណាក់កាលដែលជាឧបសគ្គនៅខាងមុខយ៉ាងច្រើន។ មានទាំងអត្តពលិកនារី និងបុរសបានប្រើទាំងកម្លាំងកាយចិត្ត ក្នុងការឡើងរបងដែក បន្ទះក្ដារ ដែលជាកន្លែងឧបសគ្គសម្រាប់ការប្រកួត។

អ្នករៀបចំកម្មវិធីបានឲ្យដឹងថា ការប្រកួតនេះ គឺជាការប្រណាំងសម្រាប់ក្រុមគ្រួសារ ដែលត្រូវបានរចនាឡើងសម្រាប់អត្តពលិកអ្នករត់ប្រណាំង និងយុវជនក្មេងៗ ជាមួយនឹងបេសកកម្ម ដើម្បីលើកកម្ពស់សុខភាពនៅទីក្រុងដ៏មមាញឹកនេះ។

ការប្រណាំងមួយប្រភេទនេះត្រូវបានឧបត្ថម្ភជំនួយដោយម៉ាកសំលៀកបំពាក់កីឡាដ៏ល្បីល្បាញរបស់សហរដ្ឋអាមេរិក Under Armour រៀបចំដោយ The Idea Consul tancy និងបានធ្វើឡើង នៅឯ AISPP ដែលជាសាលាមានទំហំ ៤ ហិកតា ជិតផ្សារទំនើបអ៊ីអនម៉ល ២ សាខាសែនសុខ។ វគ្គឧបសគ្គចម្ងាយ១គីឡូម៉ែត្រនេះ មានឧបសគ្គចំនួន៨ ឧបត្ថម្ភដោយក្រុមហ៊ុន Hiruscar, Fly Phnom Penh, True Money, Rise Fitness, Pepsi, Under Armour, Sabay Media និង Sting។ អ្នកឈ្នះជ័យលាភី នៃការប្រណាំងទទួលបានទឹកប្រាក់ជាង១លានរៀល ក្នុងរង្វាន់ ,សំបុត្រទ្រីប៉ូលីនផាក និងរង្វាន់ជាច្រើនទៀត។

ដោយឡែកនៅរសៀលថ្ងៃដដែលនេះដែរ ក្រុមហ៊ុន The Idea Consultancy Co., Ltd.បានបើកហាងលក់សំលៀកបំពាក់កីឡា UA (Walmax Sports ) ស្ថិតនៅក្នុងផ្សារអ៊ីអន២ សាខាខណ្ឌសែនសុខ ដើម្បីផ្តល់ឱកាសឲ្យក្រុមកីឡាករ កីឡាការិនី និងក្រុមគ្រួសារដែលមកជាមួយចូលរួមជ្រើសរើសទិញសំលៀកបំពាក់កីឡាតាមតម្រូវការក្នុងតម្លៃសមស្រប។

សូមបញ្ជាក់ ហាងលក់សំលៀកបំពាក់កីឡា Walmax Sports បានបើកដំបូងនៅខេត្តសៀមរាប នៅខែកញ្ញា ឆ្នាំ២០១៧ បន្ទាប់មកគឺហាងប្រេនហោស្ស៍ UA ដំបូងនៅខែធ្នូ ឆ្នាំ២០១៨ ដែលមានទីតាំងស្ថិតនៅក្នុងផ្សារអ៊ីអន២ សាខាខណ្ឌសែនសុខ។

ចំណែក The Idea ជាក្រុមហ៊ុនសង្គមមួយ ដែលមានក្រុមអ្នកពិគ្រោះយោបល់អាជីវកម្មពហុវិន័យ អ្នកវិភាគទិន្នន័យ អ្នកឌីហ្សាញ ពហុព័ត៌មាន វិស្វករគម្រោង អ្នកនិពន្ធ អ្នកបណ្ដុះបណ្ដាល និងអ្នករៀបចំព្រឹត្តិការណ៍។ The Idea បានរៀបចំ និងអនុវត្តដំណោះស្រាយសម្រាប់រដ្ឋាភិបាល អង្គការក្រៅរដ្ឋាភិបាល សហគ្រាសសង្គម និងសាជីវកម្មនៅទូទាំងពិភពលោក៕