ភ្នំពេញ ៖ នារីវ័យក្មេង ដែលជាគ្រូបង្រៀននៅសាលាឯកជនមួយ ជិះម៉ូតូម៉ាកស្កូពីមួយគ្រឿង បើកក្នុងល្បឿនលឿនប្រញាប់ចូលបង្រៀនសិស្ស តែមិនសមដូចបំណងបែរជាជ្រុលទៅបុកពីក្រោយម៉ូតូធូដេ ជិះដោយក្មេងស្រីសិស្សសាលាជម្ជូវ័ន្ដ បណ្តាលឲ្យដួលរងរបួសសន្លប់ស្ដូកខ្លួនឯងកាលពីវេលាម៉ោង៧និង១០នាទីព្រឹក ថ្ងៃទី១៣ ខែធ្នូ ឆ្នាំ២០១៨ ស្ថិតនៅតាមផ្លូវវេងស្រេង កែងផ្លូវចូលភូមិព្រៃល្វា ត្រង់ចំណុចភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ។
នារីរងគ្រោះសន្លប់ស្តូក នៅកន្លែង គ្រាន់តែដឹងថាជាអ្នកគ្រូបង្រៀននៅសាលាឯកជនមួយ នៅក្បែរនោះ ជិះម៉ូតូមួយគ្រឿងម៉ាក ស្កូពី ពណ៌ស ពាក់ស្លាកលេខ ភ្នំពេញ 1CT-5270 ។ ចំណែក ក្មេងស្រីរងគ្រោះ ជាភាគីម្ខាងទៀត មានគ្នា២នាក់ ជាសិស្សសាលា ថ្នាក់ទី១១ វិទ្យាល័យ បណ្តុះបណ្តាលបច្ចេកទេស និងចំណេះទូទៅ ជម្ពូវ័ន្ដ មានទីលំនៅ ភូមិដំណាក់ធំ៣ សង្កត់ស្ទឹងមានជ័យ៣ ខណ្ឌមានជ័យ រងរបួសស្រាល បែក ចង្កា ជិះម៉ូតូ ម៉ាក ធូដេ ពណ៌ស្លែ គ្មានស្លាកលេខ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ ក្មេងស្រីសិស្សសាលា ជម្ពូវ័ន្ដ ជិះម៉ូតូឌុបគ្នា តាមបណ្តោយផ្លូវវេងស្រេង ពីកើតទៅលិច លុះដល់ចំណុចខាងលើ ស្រាប់តែអ្នកគ្រូ ជិះម៉ូតូស្កូពី បោលយ៉ាងលឿន ពីកើតទៅលិចស្របទិសគ្នា ប្រញាប់ចូលបង្រៀនសិស្ស ដល់ចំណុចខាងលើ បត់ឆ្លងផ្លូវវឹង ក៏ជ្រុលទៅបុកគូទម៉ូតូធូដេ បណ្តាលឲ្យដួលសន្លប់ខ្លួនឯង ចំណែកក្មេងស្រីសិស្សសាលារងរបួសស្រាល។
ក្រោយកើតហេតុ ត្រូវបាន លោកគ្រូ អ្នកគ្រូ រួមសាលាជាមួយជួយលើកបីត្រកងដឹកតាមម៉ូតូកង់បីទៅគ្លីនិកឯកជន ឡាំប៊ុនថនដោយខ្លួនឯងចំណែកក្មេងស្រីសិស្សសាលា របួសស្រាល ត្រូវបានសមត្ថកិច្ចប្រជាពលរដ្ឋប្រាប់ឲ្យបន្តដំណើរជាមួយមិត្តភក្ដិ ដើម្បីចូលសាលារៀន។ ដោយឡែក ម៉ូតូទាំង២គ្រឿង ត្រូវបានសមត្ថកិច្ចជំនាញវាស់វែងរួច យកទៅរក្សាទុកនៅផ្នែកជំនាញអធិការដ្ឋានខណ្ឌ រង់ចាំដោះស្រាយពេលក្រោយ៕
Source: Kampuchea Thmey Daily
0 Comments