ប្រដាល់ ៖ អ្នកប្រដាល់កម្ពុជា ឯម ឡេងលី ក្លិបថ្មគោលពោធិសែនជ័យ ក្នុងការឡើងសងសឹកអ្នកប្រដាល់ជើងខ្លាំងថៃ កាំឡៃផេត(Khamlaipetch Phakthungchai) យប់ថ្ងៃទី០៩ ខែធ្នូ ឆ្នាំ២០១៨ នៅក្នុងកម្មវិធីប្រដាល់ខារ៉ាបាវ លើសង្វៀនបាយ័នស្ទឹងមានជ័យនោះ គឺបានត្រឹមស្មើពិន្ទុប៉ុណ្ណោះ ខណៈដែល ចាន់ ប៊ុនលាភ អ្នកប្រដាល់កម្ពុជាក្លិបនិរោធមានជ័យ វាយចាញ់អ្នកប្រដាល់ថៃ អេកអាំនួយ ឆ.ឈោកអាំនួយ(Eakaumnuay Chhor.Chhorkaumnuay)ដោយពិន្ទុ។
ក្នុងការប្រកួតសងសឹកនេះ ឯម ឡេងលី គេវាយបានល្អជាងការជួបប្រកួតលើកទី១ ដែលធ្វើឲ្យ កាំឡៃផេត មិនអាចយកឈ្នះបានដូចមុន។ និយាយរួម ប្រកួតគ្នា៥ទឹកពេញ កាំឡៃផេត មានឱកាសតិចតួចណាស់ ក្នុងការយកឈ្នះលើ ឯម ឡេងលី គឺមានតែ ឡេងលី ដែលធ្វើឲ្យ កាំឡៃផេត គាំងម្តងៗវិញនោះ។
សូមបញ្ជាក់ថា អ្នកប្រដាល់ថៃរូបនេះ កាលពីជួប ឯម ឡេងលី លើកទី១ បានវាយ ឡេងលី ឲ្យសន្លប់ក្នុងទឹកទី២។ ប៉ុន្តែជួបលើកទី២នេះ កាំឡៃផេត ប៉ិះតែចាញ់ ឯម ឡេងលី វិញទៅហើយ។ កាំឡៃផេត ជាជើងខ្លាំងមួយរូបដែរនៅស្រុកថៃ ហើយមកវ៉ៃនៅស្រុកខ្មែរ ក៏កម្រមានអ្នកយកឈ្នះបានដែរ។
ចំពោះ ចាន់ ប៊ុនលាភ ក្លិបនិរោធមានជ័យ បានវាយចាញ់អ្នកប្រដាល់ថៃ អេកអាំនួយ ឆ.ឈោកអាំនួយ ដែលគេស្គាល់ថាពីមុនមានឈ្មោះ ភេចណាំអេក ដោយពិន្ទុ។ ពីរនាក់នេះ ប្រកួតគ្នាក្នុងប្រភេទទម្ងន់៦៥គីឡូក្រាម។
ចាន់ ប៊ុនលាភ វាយចាញ់ អេកអាំនួយ ដោយពិន្ទុដាច់តែម្ដង ដោយក្នុងការប្រកួត៥ទឹកពេញនោះ ប៊ុនលាភ ត្រូវអ្នកប្រដាល់ថៃរូបនោះ វាយឲ្យដួលលើរេញជាច្រើនដង ហើយរហូតដល់ អេកអាំនួយ វាយរបៀបលេងសើចថែមទៀត។ ប៉ុន្តែយ៉ាងណា នៅក្នុងការប្រកួតទឹកទី៥ ដែលជាទឹកចុងក្រោយនោះ ចាន់ ប៊ុនលាភ គេវាយបានល្អដោយការប្រើកែង វាយត្រូវចំគោលដៅទៅលើអ្នកប្រដាល់ថៃនោះ បានច្រើនកែងវិញដែរ។
ដោយឡែក សម្រាប់ការប្រកួតរវាងអ្នកប្រដាល់ខ្មែរ និងខ្មែរគ្នាឯងនោះ ចេង គា អ្នកប្រដាល់ក្លិបវិបុលដារិទ្ធពោធិសែនជ័យ បានផ្ដួល អូន ចាន់ឡឹង អ្នកប្រដាល់ក្លិបកុសលកីឡា ឲ្យបោះបង់ចោលការប្រកួតក្នុងទឹកទី២។
•អ៊ូច ធារិទ្ធ ក្លាយជាម្ចាស់ពានបាយ័នទម្ងន់៥៧គីឡូក្រាម
ជើងខ្លាំង៤រូប ដែលឡើងប្រកួតដណ្តើមពានអនុស្សាវរីយ៍បាយ័ន សម្រាប់ប្រភេទទម្ងន់៥៧គីឡូក្រាម ឆ្នាំ២០១៨ នៅលើសង្វៀនបាយ័នស្ទឹងមានជ័យ កាលពីល្ងាចថ្ងៃសៅរ៍ ទី០៨ ខែធ្នូ ឆ្នាំ២០១៨នោះ ទីបំផុតម្ចាស់ពានរង្វាន់ បានធ្លាក់ទៅលើអ្នកប្រដាល់ អ៊ូច ធារិទ្ធ ក្លិបអាណាចក្រគុនខ្មែរ បន្ទាប់ពីគេយកឈ្នះ នីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ ក្នុងទឹកទី១ ក្នុងវគ្គផ្ដាច់ព្រ័ត្រនោះ។
ក្នុងការប្រកួតជម្រុះដំណាក់ទី១ អ៊ូច ធារិទ្ធ គេវាយឈ្នះ ស៊ឹម ប៊ុនឆៃ ក្លិបព្រៃទទឹងខេត្តបាត់ដំបង ក្នុងទឹកទី១ ឯ នីម នន ប្រកួតដំណាក់ទី១ដែរនោះ គេវាយឈ្នះ ឌឹម សារិទ្ធ សមាគមកីឡាប្រដាល់ក្រសួងការពារជាតិដោយពិន្ទុ។
អ៊ូច ធារិទ្ធ និង នីម នន បានឡើងមកជួបគ្នាក្នុងវគ្គផ្ដាច់ព្រ័ត្រ តែ នីម នន មិនអាចស៊ូចាមួយ អ៊ូច ធារិទ្ធបាន ក៏បោះបង់ការប្រកួតក្នុងទឹកទី១តែម្ដងទៅ ដែលនាំឲ្យ អ៊ូច ធារិទ្ធ ក្លាយជាម្ចាស់ពានរង្វាន់អនុស្សាវរីយ៍របស់ទូរទស្សន៍បាយ័នក្នុងប្រភេទទម្ងន់៥៧គីឡូក្រាមនេះ។
ចំពោះការប្រកួតគូឯកវិញនោះ កំពែង ខ្មៅ អ្នកប្រដាល់ក្លិបអេភូថងកីឡា ប្រកួតឈ្នះ ឆាយ មាស អ្នកប្រដាល់ក្លិបសំរោងកោងខេត្តបាត់ដំបង ដោយពិន្ទុ បន្ទាប់ពីវាយគ្នា៥ទឹកពេញនោះ។ ពីរនាក់នេះ ប្រកួតគ្នាក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments