ពាក្យចុងក្រោយរបស់លោក Jamal Khashoggi គឺ “ខ្ញុំមិនអាចដកដង្ហើមបានទេ”។ នេះបើតាមការផ្សាយរបស់ទូរទស្សន៍ CNN កាលពីថ្ងៃអាទិត្យដោយលើកឡើងពីប្រភពមួយដែលបានអានអត្ថបទចម្លងជាលាយលក្ខណ៍អក្សរនៃខ្សែអាត់សំឡេងមួយនៃគ្រាចុងក្រោយមុនពេលការធ្វើឃាតលើអ្នកកាសែតរូបនេះ។
ប្រភពនេះបានប្រាប់បណ្តាញអាមេរិកថា អត្ថបទចម្លងជាលាយលក្ខអក្សរនេះបានបញ្ជាក់យ៉ាងច្បាស់ថា ការសម្លាប់នេះគឺត្រូវបានគេគិតទុកជាមុនហើយបានលើកឡើងថា មានការហៅទូរស័ព្ទជាច្រើនលើកពាក់ព័ន្ធនឹងដំណើរការនេះ។
ទូរទស្សន៍ CNN បាននិយាយថា ក្រុមមន្ត្រីទួរគីជឿជាក់ថា ការហៅទូរស័ព្ទទាំងនោះត្រូវបានធ្វើឡើងចំពោះមន្ត្រីជាន់ខ្ពស់នៅក្នុងទីក្រុង រីយ៉ាដ។
លោក Khashoggi ត្រូវបានគេសម្លាប់ភ្លាមៗបន្ទាប់ពីចូលក្នុងស្ថានកុងស៊ុលរបស់ប្រទេសនេះប្រចាំទីក្រុងអ៊ីស្តង់ប៊ុលកាលពីថ្ងៃទី២ខែតុលា។
CNN បាននិយាយថា អត្ថបទចម្លងជាលាយលក្ខអក្សរនៃខ្សែអាត់សំឡេងដ៏គួរអោយរន្ធត់នេះគឺរួមបញ្ចូលទាំងការពណ៌នារបស់ Khashoggi ដែលកំពុងតស៊ូប្រឆាំងនឹងឃាតករផងដែរ។ CNN បានសំដៅថា សំឡេងនៃការកាត់សាកសពរបស់អ្នកកាសែតរូបនេះជាបំណែកគឺជា រណារ។
អត្ថបទចម្លងជាលាយលក្ខអក្សរដើមគឺត្រូវបានរៀបចំដោយសេវាចារកម្មទួរគី។
រដ្ឋមន្ត្រីក្រសួងការបរទេសអារ៉ាប៊ីសាអ៊ូឌីតកាលពីថ្ងៃអាទិត្យបានបដិសេធការទាមទាររបស់ប្រធានាធិបតីទួរគីលោក Recep Tayyip Erdogan អោយធ្វើបត្យាប័នជនសង្ស័យដែលជាប់ទាក់ទងនឹងឃាតកម្មលោក Khashoggi។
លោក Erdogan បានអំពាវនាវម្តងហើយម្តងទៀតអោយប្រទេសអារ៉ាប៊ីសាអ៊ូឌីតប្រគល់ជនសង្ស័យក្នុងការសម្លាប់នេះ។ យោងតាមប្រទេសទួរគីបានអោយដឹងថា ក្រុមមួយដែលមានសមាជិកជាជនជាតិអារ៉ាប៊ីសាអ៊ូឌីតចំនួន១៥នាក់គឺត្រូវបានបញ្ជូនទៅកាន់ទីក្រុងអ៊ីស្តង់ប៊ុលដើម្បីសម្លាប់លោក Khashoggi ៕ AFP
Source: Kampuchea Thmey Daily
0 Comments