ក្រុមគ្រួសារនៃមនុស្សចំនួន១៨៩នាក់ដែលបានស្លាប់ក្នុងការធ្លាក់យន្តហោះរបស់ក្រុមហ៊ុន Lion Air គ្រោងនឹងធ្វើបាតុកម្មមួយក្នុងប្រទេសឥណ្ឌូនេស៊ីនៅថ្ងៃព្រហស្បតិ៍ ខណៈពេលមានការជាប់គាំងក្នុងកិច្ចខិតខំប្រឹងប្រែងដើម្បីនាំយកបំណែកធំៗឡើងមកគោកហើយការរកប្រអប់ខ្មៅទីពីរនឹងត្រូវចាប់ផ្តើមឡើងវិញនៅសប្តាហ៍ក្រោយនេះ។
យន្តហោះ Boeing Co 737 MAX បានធ្លាក់ចូលសមុទ្រជ្វាកាលពីថ្ងៃទី២៩ខែតុលាភ្លាមៗបន្ទាប់ពីហោះហើរចេញពីទីក្រុងហ្សាការតាប៉ុន្តែក្រុមគ្រួសារបានសម្តែងក្តីព្រួយបារម្ភថា សាកសពអ្នកដំណើរចំនួន៦៤នាក់មិនទាន់ត្រូវបានគេកំណត់អត្តសញ្ញាណនៅឡើយហើយមានបំណែកយន្តហោះត្រឹមតែ៣០ភាគរយប៉ុណ្ណោះដែលត្រូវបានរកឃើញ។
ក្រុមមួយដែលនិយាយថាខ្លួនតំណាងអោយក្រុមគ្រួសារប្រហែល៥០គ្រួសារបានលើកឡើងក្នុងសេចក្តីថ្លែងការណ៍មួយថា “សាច់ញាតិសង្ឃឹមថា សមាជិកទាំងអស់នៃគ្រួសាររបស់យើងដែលបានស្លាប់នៅក្នុងគ្រោះថ្នាក់នេះអាចត្រូវបានរកឃើញហើយសាកសពរបស់ពួកគេគួរត្រូវបានបញ្ចុះយ៉ាងត្រឹមត្រូវ”។
សេចក្តីថ្លែងការណ៍នេះបានបន្ថែមមុនការជួបជុំតាមការគ្រោងទុកនៅខាងក្រៅវិមានប្រធានាធិបតីក្នុងទីក្រុងហ្សាការតាថា “យើងសង្ឃឹមថា ការស្វែងរកជនរងគ្រោះនឹងប្រើប្រាស់នាវាដែលមានបច្ចេកវិទ្យាទំនើប”។
ក្រុមហ៊ុន Lion Air កំពុងចំណាយប្រាក់សម្រាប់នាវាមានឯកទេសមួយគ្រឿងដើម្បីជួយស្រង់យកបំណែកដ៏ធំនៃជើងហោះហើរ JT 610 ហើយផ្តល់អោយអ្នកស៊ើបអង្កេតនូវឱកាសកាន់តែប្រសើរឡើងក្នុងការស្វែងរកឧបករណ៍ថតសំឡេងក្នុងកាប៊ីនយន្ដហោះ។
ក្រុមដឹកជញ្ជូនជាតិរបស់ប្រទេសឥណ្ឌូនេស៊ីបាននិយាយថា នាវានេះនឹងមកដល់នៅថ្ងៃចន្ទ។
ប្រភពព័ត៌មានជិតស្និទ្ធនឹងក្រុមហ៊ុនអាកាសចរណ៍បានអោយដឹងនៅថ្ងៃព្រហស្បតិ៍ថា ការស្វែងរកកាន់តែធំនឹងចំណាយប្រាក់អស់២.៨លានដុល្លារក្នុងរយៈពេល១០ថ្ងៃដំបូង។ ប្រភពដដែលបានបន្ថែមថា ក្រុមហ៊ុន Lion Air គឺជាអ្នកបង់ប្រាក់ដោយសារតែរដ្ឋាភិបាលមិនមានថវិកាឡើយ។
ស្របពេលជាមួយគ្នានោះ អ្នកនាំពាក្យក្រសួងហិរញ្ញវត្ថុមិនអាចផ្តល់ការអត្ថាធិប្បាយភ្លាមៗអំពីបញ្ហាថវិកានេះទេ៕
Source: Kampuchea Thmey Daily
0 Comments