ប្រធានាធិបតីបារាំងលោក Emmanuel Macron កាលពីថ្ងៃអាទិត្យបានពិនិត្យមើលការខូចខាតពីកុបកម្មរយៈពេលមួយថ្ងៃនៅទូទាំងទីក្រុងប៉ារីសហើយបានដឹកនាំកិច្ចប្រជុំជាបន្ទាន់មួយដែលបានបញ្ចប់ទៅជាមួយការអំពាវនាវឲ្យមានកិច្ចពិភាក្សាបន្ថែមទៀតជាមួយសកម្មជនប្រឆាំងរដ្ឋាភិបាលដែលបានធ្វើបាតុកម្មរយៈពេល២សប្តាហ៍។
លោក Macron បានជួបជាមួយនាយករដ្ឋមន្ត្រី រដ្ឋមន្ត្រីមហាផ្ទៃនិងមន្ត្រីសន្តិសុខជាន់ខ្ពស់ដើម្បីបង្កើតការឆ្លើយតបចំពោះអំពើហិង្សាដែលធ្វើឲ្យមនុស្សរាប់រយនាក់រងរបួសទូទាំងប្រទេស។
វិមាន Elysee បាននិយាយថា លោកនាយករដ្ឋមន្ត្រី Edouard Philippe ត្រូវបានគេស្នើឲ្យជួបអ្នករៀបចំបាតុកម្មនិងមេដឹកនាំគណបក្សដែលជាផ្នែកមួយនៃ “បំណងប្រាថ្នាជាស្មោះត្រង់សម្រាប់ការចរចា”។
រដ្ឋមន្ត្រីក្រសួងបរិស្ថានលោក Francois de Rugy បានជួបតំណាងអ្នកតវ៉ាដែលគេហៅថាបាតុករ “អាវកាក់ពណ៌លឿង” កាលពីសប្ដាហ៍មុនប៉ុន្តែបានបរាជ័យក្នុងការបញ្ចុះបញ្ចូលពួកគេឲ្យបញ្ចប់បាតុកម្ម។
រដ្ឋាភិបាលមិនបានបដិសេធការដាក់រដ្ឋក្នុងគ្រាអាសន្នដើម្បីប្រឆាំងនឹងការតវ៉ានោះទេដែលបានចាប់ផ្តើមដោយសារតែពន្ធប្រេងឥន្ទនៈប៉ុន្តែបានប្រែក្លាយទៅជាកំហឹងកាន់តែខ្លាំងឡើងលើរបៀបវារៈរបស់លោក Macron។
មុននេះលោកប្រធានាធិបតីបានវាយតម្លៃអំពីការខូចខាតនៅឯវិមាន Arc de Triomphe ដែលជាបូជនីយដ្ឋានដ៏ធំមួយសម្រាប់អ្នកស្លាប់ក្នុងសង្គ្រាមរបស់ប្រទេសបារាំងដែលស្ថិតនៅលើមហាវិថីដ៏ល្បីល្បាញ Champs Elysees ។ នៅទីនោះក្រុមកុបករបានគូរគំនូរលើជញ្ជាំងហើយរើកកាយកន្លែងលក់សំបុត្រនិងកន្លែងទទួលភ្ញៀវ។
លោក Macron ក៏បានឃើញសំណល់រថយន្ដដែលត្រូវដុតកម្ទេចនិងអគារដែលរងការបំផ្លិចបំផ្លាញពីកុបកម្មនៅកន្លែងផ្សេងទៀតផងដែរ។
ប៉ូលិសក្រុងប៉ារីសបាននិយាយថា មនុស្សចំនួន៤១២នាក់ត្រូវបានចាប់ខ្លួនកាលពីថ្ងៃសៅរ៍អំឡុងការប៉ះទង្គិចដ៏អាក្រក់បំផុតក្នុងរយៈពេលជាច្រើនឆ្នាំមកនេះនៅក្នុងរដ្ឋធានីខណៈ៣៧៨នាក់ស្ថិតនៅក្នុងការឃុំឃាំង។
មនុស្សសរុបចំនួន២៦៣នាក់បានរងរបួសនៅទូទាំងប្រទេសដោយក្នុងនោះមាន១៣៣នាក់រងរបួសនៅក្នុងរដ្ឋធានីរួមទាំងកងកម្លាំងសន្តិសុខចំនួន២៣នាក់ផងដែរ៕ AFP
Source: Kampuchea Thmey Daily
0 Comments