VJ DADA និង អោក សុម៉ាវត្តី នាំយកសម្ភារៈសិក្សាចែកដល់សិស្ស នាសាលាបឋមសិក្សាព្រែកថ្មីស្ថិតក្នុងស្រុកកោះធំ

Cambodia News December 26, 2018

ភ្នំពេញ ៖ តារាប្រុស-ស្រី២រូប គឺVJ DADA និងកញ្ញា អោក សុម៉ាវត្តី ព្រមទាំងព្រះសង្ឃមួយអង្គកាលពីថ្ងៃទី២៤ ខែធ្នូ ឆ្នាំ២០១៨កន្លងមកនេះ បានចំណាយពេលទំនេរផ្ទាល់ខ្លួនឆ្លៀតនាំយកសម្ភារៈសិស្ស និងថវិកាមួយចំនួនចែកជូនដល់សិក្សាជាច្រើននាក់ ដែលកំពុងសិក្សានៅសាលាបឋមសិក្សាព្រែកថ្មី ស្ថិតក្នុងស្រុកកោះធំ ខេត្តកណ្ដាល។

ជាការកត់សម្គាល់នេះពុំមែនជាសកម្មភាពលើកដំបូងរបស់តារាប្រុសរូបសង្ហាមានប្រជាប្រិយភាពនិងការគាំទ្រពីទស្សនិកជនគឺ VJ DADA នោះទេ ចំពោះការបង្ហាញវត្តមាននៅក្នុងសកម្មភាពមនុស្សធម៌ជួយដល់កុមារ ចាស់ជរា និងប្រជាពលរដ្ឋ ជួបការខ្វះខាតនៅតាមបណ្ដាសហគមន៍ នៃតំបន់ដាច់ស្រយាលនាខេត្តមួយចំនួន។ សកម្មភាពនេះ កំពុងទទួលបានការគាំទ្រ និងលើកសរសើរខ្លាំងពីមហាជន។

តាមរយៈសកម្មភាព នៃការចុះចែកសម្ភារៈសិក្សា និងថ្នាំពេទ្យពីសំណាក់ពិធីករ VJ DADA និងកញ្ញា អោក សុម៉ាវត្តី រួមទាំងព្រះសង្ឃខាងលើនេះមានដូចជា ៖ សៀវភៅ ប៊ិច ខ្មៅដៃ បន្ទាត់ ជ័រលុប ថ្នាំពេទ្យជាច្រើនបន្ទះ និងថវិកាខ្លះៗទៀតផង។ ចំពោះសម្ភារៈសិក្សាដែលត្រូវបានចែកជូនសិស្សសាលាខាងលើនេះត្រូវបានតារាប្រុស VJ DADA បញ្ជាក់ថា បានមកពីការចូលរួមឧបត្ថម្ភពីសប្បុរសជន និងថវិកាផ្ទាល់ខ្លួនផងដែរ។

ពិធីករប្រុស VJ DADAបាននិយាយទៀតថា ខ្ញុំពិតជាមានអារម្មណ៍សប្បាយរីករាយខ្លាំងមែនទែនក្រោយពេលដែលបានមកជួប និងចែករំលែកក្តីស្រលាញ់ដល់សិស្សរាប់រយនាក់នៅសាលាបឋមសិក្សាព្រែកថ្មី ស្ថិតក្នុងស្រុកកោះធំ។ នេះគឺជាសកម្មភាពមនុស្សធម៌មួយដើម្បីចូលរួមលើកទឹកចិត្តដល់សិស្ស ក៏ដូចជាការជួយជំរុញក្នុងសិក្សាដើម្បីក្រេបយកចំណេះវិជ្ជានាថ្ងៃអនាគត។

ជាមួយគ្នានេះ VJ DADA ក៏បានអះអាងពីជំហររបស់ខ្លួនថា លោកនឹងបន្តធ្វើសកម្មភាពមនុស្សធម៌ចែករំលែកក្តីស្រលាញ់ដល់ក្មេងៗជាច្រើនទៀតនៅតាមបណ្ដាសាលារៀនមួយចំនួន នាបណ្ដាខេត្តជិតឆ្ងាយ ព្រោះថានេះគឺជាការងារជួយសង្គមដែលខ្លួនចូលចិត្ត និងចង់ធ្វើជាយូរមកហើយ៕