ប្រដាល់ ៖ សារឿន ច័ន្ទ អ្នកប្រដាល់ជើងចាស់ នៃក្លិបតាព្រហ្មមានជ័យ បានវាយឈ្នះ អ្នកប្រដាល់ថៃឈ្មោះ Yorth Savich ក្នុងទឹកទី៥ នៅក្នុងការជួបប្រកួតគ្នាក្នុងកម្មវិធីប្រដាល់Wurkz លើសង្វៀនSEA-TV រសៀលថ្ងៃអាទិត្យ ទី០៩ ខែធ្នូ ឆ្នាំ២០១៨។
សារឿន ច័ន្ទ បានវាយកែងត្រូវ Yorth Savich នៅក្នុងទឹកទី៤ ធ្វើឲ្យអាជ្ញាកណ្ដាលរាប់ដល់៨។ បន្ទាប់មក នៅក្នុងទឹកទី៥ អ្នកប្រដាល់ថៃរូបនេះ ត្រូវ សារឿន ច័ន្ទ វាយដួលទៀត ត្រូវអាជ្ញាកណ្ដាលរាប់៨ពីរដងទៀត ហើយក្រោយមកក៏ត្រូវ សារឿន ច័ន្ទ វាយដួលម្តងទៀតជាលើកទី៣ ក្នុងទឹក៥នេះ ដែលនាំឲ្យអាជ្ញាកណ្ដាលបញ្ឈប់ Yorth Savich លែងឲ្យប្រកួត ហើយផ្ដល់ជ័យជម្នះឲ្យ សារឿន ច័ន្ទ ឈ្នះ ក្នុងទឹកទី៥នេះ។
ពីរនាក់នេះ ប្រកួតគ្នាក្នុងទម្ងន់៦០គីឡូក្រាម។ អ្នកប្រដាល់ថៃរូបនេះ មិនធ្លាប់ មកប្រកួតនៅស្រុកខ្មែរនោះទេកន្លងមក។
ចំណែក ចាន់ សំអាត អ្នកប្រដាល់ក្លិបអប់រំកាយកីឡាស្រុកអន្លង់វែង បានវាយស្មើពិន្ទុជាមួយអ្នកប្រដាល់ថៃ Phat Senchhai បន្ទាប់ពីប្រកួតគ្នា៥ទឹកពេញនោះ។ ពួកគេប្រកួតគ្នាក្នុងប្រភេទទម្ងន់៦០ គីឡូក្រាម។
Phat Senchhai នេះ នៅស្រុកថៃគេជាជើងខ្លាំងមួយដែរនៅក្នុងប្រភេទទម្ងន់៦០គ.ក្រនេះ។ អ្នកប្រដាល់ថៃនេះ មានកំណត់ត្រាប្រកួតចំនួន៦៤លើក ឈ្នះ៥៣លើក និង ចាញ់១១លើក មិនដែលស្មើ។ ដូច្នេះហើយ ទើប ចាន់ សំអាត មិនអាចផ្ដួលយកឈ្នះគេបាននោះ។ ចាន់ សំអាត ជើងខ្លាំងរបស់កម្ពុជានេះ ធ្លាប់បំបាក់ថៃអស់ប្រមាណជាង១០នាក់មកហើយ ពិសេសនោះ គេធ្លាប់ឈ្នះជើងចាស់ថៃថែមទៀត តែលើកនេះទៅមិនរួចជាមួយ Phat Senchhai ដោយបានត្រឹមស្មើប៉ុណ្ណោះ។
ចំពោះការប្រកួតរវាងអ្នកប្រដាល់រួមជាតិវិញ សុខ សុវណ្ណ អ្នកប្រដាល់សមាគមកីឡាប្រដាល់ក្រសួងការពារជាតិ ប្រកួតចាញ់ អ្នកប្រដាល់ ពុទ្ធ សំបូរ ក្លិបពុទ្ធសេរីវង្សកីឡា ដោយពិន្ទុ ហើយ គ្រី សុខលីន អ្នកប្រដាល់ក្លិបយុវវាលស្បូវខណ្ឌច្បារអំពៅ ប្រកួតចាញ់ ធីម ទាន់ អ្នកប្រដាល់ក្លិបបូរីរាជសីហ៍ខេត្តរតនគិរី ក្នុងទឹកទី៣។
•ឌុន រដ្ឋា មិនអាចយកឈ្នះAbolfazl បានទេ
អ្នកប្រដាល់ជើងខ្លាំងកម្ពុជា ឌុន រដ្ឋា ក្លិបអេភូថងកីឡា ដែលត្រូវគេផ្គូឲ្យជួបប្រកួតជាមួយអ្នកប្រដាល់អ៊ីរ៉ង់ Abolfazl Alipour Andi នាព្រឹកថ្ងៃអាទិត្យទី០៩ ខែធ្នូ ឆ្នាំ២០១៨ នៅក្នុងកម្មវិធីប្រដាល់Boo strong Fighter On Fire របស់ស្ថានីយទូរទស្សន៍អាស៊ីអាគ្នេយ៍នោះ បានវាយចាញ់ដោយពិន្ទុ។ ពីរនាក់នេះ ជួបគ្នាក្នុងប្រភេទទម្ងន់៧១គីឡូក្រាម។
Abolfazl នេះ គេទើបតែមកប្រកួតនៅសង្វៀនSEATV ជាលើកទី១ ប៉ុណ្ណោះ។ ប៉ុន្តែគេវាយល្អ និងខ្លាំង ដោយបានធ្វើឲ្យ ឌុន រដ្ឋា ត្រូវអាជ្ញាកណ្ដាលរាប់៨ ដល់ទៅ២ដង ក្នុងទឹកទី១ នោះ។ ការរាប់ ឌុន រដ្ឋា នេះ បន្ទាប់ពីត្រូវកណ្ដាប់ដៃរបស់ Abolfazl ឡើងចង់វង្វេងទិសនោះ។ យ៉ាងណា ឌុន រដ្ឋា គេអាចតស៊ូ និងទប់ទល់ជាមួយ Abolfazl រហូតដល់ចប់ទឹក៥ ចាញ់ត្រឹមពិន្ទុប៉ុណ្ណោះ។
Abolfazl គេជាអ្នកប្រដាល់ជើងថ្មី ដែលហ្វឹកហាត់នៅស្រុកថៃ។ គេចេះប្រដាល់ស្ទាត់គួរសមដែរ ដោយមានស្នៀតកណ្ដាប់ដៃល្អ និងស្នៀតទាត់ក៏ល្អ ហើយចេះវាយកែងទៀត។ អ្នកប្រដាល់រូបនេះ មានប្រវត្តិប្រកួតចំនួន១៥លើក ដោយឈ្នះ១២លើក និង ចាញ់០៣លើក មិនដែលស្មើ។
ចំពោះការប្រកួតរវាងអ្នកប្រដាល់រួមជាតិវិញ សំ ភក្តី អ្នកប្រដាល់ក្លិបរ៉ាហាប់ស្វាយប៉ាក ប្រកួតឈ្នះ ទី ពន្លែត អ្នកប្រដាល់ជើងចាស់ក្លិបអង្គរមានជ័យ ខេត្តសៀមរាប ដោយពិន្ទុជួបគ្នា។ ចំណែក សំណាង សុខនឿន អ្នកប្រដាល់ក្លិបកងចក្ររាជសីហ៍មានរិទ្ធ ប្រកួតចាញ់ ប្រាក់ ស៊ីណាត អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែងក្នុងទឹកទី២ ខណៈដែល ធន់ វណ្ណា អ្នកប្រដាល់ក្លិបមជ្ឈមណ្ឌលកីឡា ខ.ភ.ម ប្រកួតស្មើពិន្ទុជាមួយ ឡុង ភារម្យ អ្នកប្រដាល់ក្លិបរាជសីហ៍ខេត្តរតនគិរី ក្នុងប្រភេទទម្ងន់៥៧គីឡូក្រាម៕
Source: Kampuchea Thmey Daily
0 Comments