ផ្លូវក្រាលកៅស៊ូប្រភេទAC ចំនួន៣ខ្សែ ប្រវែង១.៧០០ម៉ែត្រ មន្ទីរសាធារណការ និងដឹកជញ្ជូនខេត្តកំពង់ឆ្នាំង បានបញ្ចប់គម្រោងសាងសង់ហើយ

កំពង់ឆ្នាំង ៖ លោក កែវ ពៅ ប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង នៅព្រឹកថ្ងៃទី ២៨ ខែមករា ឆ្នាំ២០១៩ បានបញ្ជាក់ថា ផ្លូវចាក់កៅស៊ូប្រភេទAC ចំនួន៣ខ្សែ ប្រវែង១៧២១ម៉ែត្រ ដែលបានកសាងនៅចំណុចភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង គឺបានកសាងរួចរាល់ជាស្ថាពរហើយ ដោយបញ្ចប់ការសាងសង់។

លោក កែវ ពៅ បានបន្តថា ផ្លូវចំនួន៣ខ្សែ ដែលមានប្រវែង១៧២១ម៉ែត្រនេះ ចែកចេញជា៣កំណាត់មានផ្លូវលេខ៥០, ផ្លូវលេខ៥២ និងផ្លូវលេខ៥៤ , ដែលផ្លូវទាំង៣ខ្សែនេះ ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង ជាផ្លូវចាក់កៅស៊ូប្រភេទ AC មានកម្រាស់៥ហ៊ុន ទទឹងពី៥ ទៅ៦ម៉ែត្រ តាមស្ថានភាពជាក់ស្ដែង។ ផ្លូវខាងលើ ជាថវិការបស់រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន អនុវត្តគម្រោងដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង។

ការកសាងផ្លូវទាំង៣ខ្សែនេះ គឺដើម្បីសម្រួលការធ្វើចរាចរណ៍របស់ប្រជាពលរដ្ឋឲ្យបានកាន់តែទូលំទូលាយជាងមុន និងអាចបញ្ចៀសនូវគ្រោះថ្នាក់ចរាចរណ៍បាន។

ចំពោះការបញ្ចប់គម្រោងកសាងផ្លូវខាងលើនេះ ក្នុងនាម លោក ជា សាម៉ីមន្ទីរ សំណូមពរប្រជាពលរដ្ឋ ដែលរស់នៅអមសងខាងផ្លូវ បើចង់ចាក់សាបភ្ជាប់ផ្លូវ ចូលទៅកាន់លំនៅឋាន សូមអនុវត្តតាម ការណែនាំដូចខាងក្រោមនេះ ៖
ទី១-ការចាក់សាបមុខផ្ទះ ចូលទៅកាន់លំនៅដ្ឋាន ត្រូវធ្វើឲ្យទាប ជាងផ្លូវ
ទី២-សូមទុកប្រឡោះឲ្យទឹកហូរធ្លាក់ចុះទៅក្រោមផ្ទះ ឲ្យបានត្រឹមត្រូវ ដើម្បីបញ្ចៀសបានការហូរច្រោះបាក់ដី ផ្លូវ
ទី៣-សូម កុំចាក់សាប រំលោភចូលលើផ្លូវកៅស៊ូជាដាច់ខាត ដែលធ្វើឲ្យផ្លូវរួមតូច។ បើធ្វើបែបនេះបាន ធ្វើនឹងឲ្យផ្លូវ និងមុខផ្ទះរបស់បងប្អូនធំទូលាយ មានសោភ័ណភាព គ្មានធូលីដីនៅមុខផ្ទះ ហើយ ផ្លូវនឹងមានគុណភាពបានប្រើប្រាស់យូរអង្វែង។

ទន្ទឹមគ្នានេះដែរ លោកសំណូមពរដល់អ្នកបើកបររថយន្តដឹកជញ្ជូន ដែលមានទម្ងន់ធ្ងន់លើសចំណុះ សូមកុំបើកបរលើផ្លូវដ៏ស្រស់ស្អាតនេះ ដែលនាំឲ្យឆាប់ខូច ហើយបើយើងអនុវត្តតាមការណែនាំខាងលើនេះបាន ផ្លូវមួយខ្សែនេះ នឹងមានអាយុចាប់ពី៧ ទៅ ១០ ឆ្នាំ។

អាជ្ញាធរសង្កាត់ផ្សារឆ្នាំបានឲ្យដឹងថា កំណាត់ផ្លូវចាក់កៅស៊ូប្រភេទ AC ទាំង៣ខ្សែ គឺមានតែមួយខ្សែប៉ុណ្ណោះ ដែលមានផលប៉ះពាល់សតិអារម្មណ៍ប្រជាពលរដ្ឋ ដែលរស់នៅសងខាងផ្លូវ ឲ្យពួកគាត់មិនសូវសប្បាយចិត្ត ដោយសារធ្វើប៉ះពាល់ផ្ទះពួកគាត់។ ប៉ុន្តែនៅពេលផ្លូវបានសាងសង់រួចរាល់ស្អាតបាតនៅចំមុខផ្ទះរបស់គាត់ ពួកគាត់បានរីករាយសប្បាយចិត្តគ្រប់ៗគ្នា ព្រោះមានផ្លូវកៅស៊ូស្អាត កាត់បន្ថយបានដីហ៊ុយ មិនប៉ះពាល់ដល់សុខភាព ស្រួលធ្វើដំណើរ ទឹកលែងលិច និងក៏អាចកាត់បន្ថយគ្រោះថ្នាក់ចរាចរណ៍បានផងដែរ៕