ភ្នំពេញ ៖ បុរសម្នាក់ បានឡើងទៅជាន់ទី៤ នៃអគារផ្សារទំនើប AEON ទី១ ហើយលោតមកក្រោមបោកក្បាលសម្លាប់ខ្លួនស្លាប់មួយរំពេច ប៉ុន្តែគេពុំដឹងថា បុរសរូបនោះ មានបញ្ហា ឬ វិបត្តិអ្វីនោះទេ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង១០និង៤០នាទីយប់ ថ្ងៃអាទិត្យ ទី០៦ ខែមករា ឆ្នាំ២០១៩នេះ ស្ថិតនៅផ្លូវព្រះសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
សពបុរសខាងលើ នៅមិនទាន់មានអ្នកស្គាល់អត្តសញ្ញាណនៅឡើយទេ អាយុប្រហែល២០ឆ្នាំជាង ។ ជនរងគ្រោះភិនភាគស្លៀកពាក់ខោខ្លី ពណ៌ខៀវ អាវយឺតដៃខ្លី ពណ៌ខៀវ និងមិនមែនជាបុគ្គលិកផ្សារទំនើប AEON នោះទេ គឺប្រជាពលរដ្ឋដើរមកពីខាងក្រៅ ឡើងទៅលើជាន់ទី៤ លោតសម្លាប់ខ្លួនតែម្ដង។
តាមការបំភ្លឺពីសាក្សីនៅកន្លែងកើតហេតុបានប្រាប់សមត្ថកិច្ចឲ្យដឹងថា នៅវេលាម៉ោងខាងលើ គេបានឃើញបុរសម្នាក់ធ្លាក់ពីលើផ្សារទំនើប ជាន់ទី៤ ចុះក្រោមបោកក្បាលរហូតដេកស្ដូកស្ដឹង និងមានឈាមហូរចេញពីក្បាលស្លាប់ភ្លាមៗ មួយរំពេច បង្កឲ្យមានការភ្ញាក់ផ្អើល និងរាយការណ៍ប្រាប់សន្តិសុខផ្សារទំនើប AEON និងសមត្ថកិច្ចមូលដ្ឋានឲ្យបានដឹងផងដែរ។
បច្ចុប្បន្ន សព កំពុងរង់ចាំខាងសមត្ថកិច្ចជំនាញចុះមកត្រួតពិនិត្យ និងធ្វើកោសល្យវិច័យ រួចរង់ចាំស្វែងរកបងប្អូន ឬ សាច់ញាតិ ក្រុមគ្រួសារ មកយកទៅធ្វើបុណ្យតាមប្រពៃណី។
ជាមួយនោះផងដែរ សមត្ថកិច្ចបាន និងកំពុងអំពាវនាវ ដល់បងប្អូនណាដែលបាត់សមាជិកគ្រួសារ ដូចភិនភាគបានរៀបរាប់ខាងលើ មេត្តាទៅទាក់ទងមកសមត្ថកិច្ចប៉ុស្តិ៍នគរបាលទន្លេបាសាក់ ឬសមត្ថកិច្ចខណ្ឌចំការមន នឹងដឹងព័ត៌មានពីអ្នកស្លាប់ហើយ៕
Source: Kampuchea Thmey Daily
0 Comments