កំពង់ស្ពឺ ៖ ការប្រកួតកីឡាកងទ័ពឆ្នាំប្រចាំឆ្នាំ២០១៩នេះ បានប្រារព្ធធ្វើឡើងនៅសាលានាយទាហានសកម្ម (ត្មាតពង) ក្រោមការយកចិត្តទុកដាក់ពីសំណាក់លោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ក្នុងគោលបំណង ដើម្បីឲ្យមហាជន យុវជន បានស្វែងយល់ដឹងពីកងទ័ព ចូលរួមការពារជាតិមាតុភូមិ និងរឹតចំណងសាមគ្គីភាព រវាងកងទ័ព និងកងទ័ព កងទ័ពជាមួយនឹងប្រជាជន ជាពិសេសដើម្បីអបអរសាទរ និងរំលឹកគុណដល់ថ្ងៃជ័យជំនះ ៧មករា ខួបលើកទី៤០។
ថ្លែងនៅក្នុងឱកាសបិទការប្រកួតនោះ លោកឧត្ដមសេនីយ៍ឯក ប៊ុត សុភាព នាយកសាលានាយទាហានសកម្ម ប្រធានគណៈកម្មការកីឡាកងយោធពលខេមរភូមិន្ទ បានលើកឡើងថា ការប្រកួតកីឡានេះ មិនមែនទើបតែរៀបចំលើកទី១នោះទេ គឺបានធ្វើឡើងតាំងពីឆ្នាំ១៩៩៧មកម្ល៉េះ។
ក្រសួងការពារជាតិ បានរៀបចំបង្កើតឲ្យមានការប្រកួតកីឡា របស់កងយោធពលខេមរភូមិន្ទនេះឡើង គឺដើម្បីឲ្យមហាជន យុវជន បានស្វែងយល់ដឹងពីកងទ័ព ចូលរួមការពារជាតិមាតុភូមិ និងរឹតចំណងសាមគ្គីភាព រវាងកម្លាំងប្រដាប់អាវុធជាមួយប្រជាជន ហើយនៅឆ្នាំនេះ ដើម្បីចូលរួមអបអរសាទរនិងរំលឹកគុណដល់ថ្ងៃជ័យជម្នះ ៧មករា ខួបលើកទី៤០។
ជាមួយគ្នានោះ លោកបានថ្លែងនូវការកោតសរសើរ និងវាយតម្លៃខ្ពស់ចំពោះកីឡាករ កីឡារិនី ដែលខិតខំពុះពារប្រកួតនៅគ្រប់វិញ្ញាសា និងទទួលជោគជ័យ ប្រកបដោយមិត្តភាព សាមគ្គីភាព និងសុខភាព។ លោកបន្តថា ការពារជាតិ ដើម្បីទាំងអស់គ្នា ទាំងអស់គ្នា ដើម្បីការពារជាតិ។
ចំណែក លោកឧត្ដមសេនីយ៍ឯក ប៊ុត សុភាព បានជំរុញដល់គ្រប់បណ្តាអង្គភាពកងយោធពលខេមរភូមិន្ទបន្តចូលរួមដកបទពិសោធន៍ ដើម្បីឲ្យការប្រកួតលើកក្រោយៗទៀតទទួលបានជោគជ័យ និងកាន់តែច្រើនឡើង ដើម្បីទ្រទ្រង់ប្រទេសជាតិឲ្យបានរឹងមាំ មានស្ថិរភាព ឈានទៅរកការអភិវឌ្ឍន៍ ក្រោមគោលនយោបាយឈ្នះ-ឈ្នះ របស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
សូមបញ្ជាក់ថា នៅថ្ងៃទី០៤ ខែមករា ការប្រកួតកីឡាកងទ័ពបានធ្វើឡើងនៅសាលានាយទាហានសកម្ម (ត្មាតពង) ដោយមានកីឡាករកីឡាការិនី ចំនួន១៦០នាក់ ស្មើនឹង១៦ក្រុម មកពីតាមបណ្តាអង្គភាពចំនួន៥ចូលរួម ក្នុងនោះរួមមាន បញ្ជាការដ្ឋានជាតិកម្លាំងពិសេសប្រឆាំងភេរវកម្ម, កងពលតូចទ័ពពិសេសឆត្រយោងលេខ៩១១, សាលានាយទាហានសកម្ម វិទ្យាស្ថានទ័ពជើងគោក និងក្រសួងបរិស្ថាន ដោយចែកចេញជា២ប្រភេទ ដែលប្រភេទ១ មាន៤ក្រុម ស្មើ៤អង្គភាព មានវិញ្ញាសារត់ប្រដាប់អាវុធចម្ងាយ៤km រត់ឆ្លងកាត់ឧបសគ្គ និងបាញ់គ្រាប់ពិត។
ជាលទ្ធផលចំណាត់ថ្នាក់លេខ១ កងពលតូចពិសេសឆត្រយោង៩១១, លេខ២ សាលានាយទាហានសកម្ម និងលេខ៣ បញ្ជាការដ្ឋានជាតិកម្លាំងពិសេសប្រឆាំងភេរវកម្ម។ ប្រភេទ២ មានវិញ្ញាសាសែងហ្វ្រង់ការត់ចម្ងាយ២km, រត់ឆ្លងកាត់ឧបសគ្គ និងចោលគ្រាប់បែក ផ្នែកនារីមាន៥ក្រុម លទ្ធផលចំណាត់ថ្នាក់លេខ១ លេខ២ និងលេខ៣ បានទៅលើ សាលានាយទាហានសកម្ម។
ផ្នែកបុរសមាន៤ក្រុម ចំណាត់ថ្នាក់លេខ១ កងពលតូចទ័ពពិសេសឆត្រយោង៩១១ ,លេខ២ និងលេខ៣ សាលានាយទាហានសកម្ម។ ជាមួយគ្នានេះ គណៈកម្មការក៏បានផ្តល់រង្វាន់ដល់បុគ្គលល្អឆ្នើម បុរសនារី ដោយបានទៅលើក្រុមនិស្សិតវគ្គជំនាន់ទី២១ នៃសាលានាយទាហានសកម្មផងដែរ៕
Source: Kampuchea Thmey Daily
0 Comments