ភ្នំពេញ ៖ អតីតមនុស្សជំនិតរបស់ លោក សម រង្ស៉ី ហើយជាអតីតថ្នាក់ដឹកនាំជាន់ខ្ពស់មួយរូបនៅក្នុងជួរអតីតគណបក្សប្រឆាំង លោក គង់ គាំ បានអះអាងថា លោកនឹងចូលបំភ្លឺជូនចៅក្រមស៊ើបសួរ នៃសាលាដំបូងរាជធានីភ្នំពេញ នៅថ្ងៃទី២៣ ខែមករា ឆ្នាំ២០១៩ ខាងមុខ តាមការកោះហៅបំភ្លឺរបស់ចៅក្រមស៊ើបសួរ។
ចៅក្រមស៊ើបសួរ នៃសាសាដំបូងរាជធានីភ្នំពេញ លោក គី ឫទ្ធី កាលពីខែធ្នូ ឆ្នាំ២០១៨ បានចេញដីកាមួយកោះហៅ លោក គង់ គាំ ចូលខ្លួនមកបំភ្លឺនៅសាលាដំបូងរាជធានីភ្នំពេញ នាទី២៣ ខែមករា ឆ្នាំ២០១៩ វេលាម៉ោង៨ និង៣០នាទីព្រឹក ជាន់ទី៤ បន្ទប់ “គ” ពាក់ព័ន្ធនឹងសំណុំរឿង “សន្ទិដ្ឋិភាពជាមួយបរទេស” របស់លោក កឹម សុខា។
ទាក់ទងនឹងការកោះហៅឲ្យបំភ្លឺនេះ លោក គង់ គាំ បានថ្លែងប្រាប់កម្ពុជាថ្មីកាលពីរសៀលថ្ងៃទី០៧មករា ថា លោកបានទទួលដីការកោះអញ្ជើញរបស់ចៅក្រមហើយ ហើយក៏យល់ព្រមចូលទៅបំភ្លឺផងដែរ។ លោកបញ្ជាក់យ៉ាងនេះថា “ទទួលហើយ ខ្ញុំបានយល់ព្រមទៅបំភ្លឺតាមការអញ្ជើញរបស់ចៅក្រមហើយបាទ “។ លោកបញ្ជាក់ថា “ខ្ញុំគ្មានឯកសារ និងដឹងអីច្រើនទេ ប៉ុន្តែខ្ញុំមិនអាចរុញរា និងបដិសេធនូវការចង់បានព័ត៌មាន ដើម្បីឲ្យគ្រប់ជ្រុងជ្រោយរបស់ចៅក្រមស៊ើបសួរសាលាដំបូងរាជធានីភ្នំពេញ ដើម្បីជាកាវិនិច្ឆ័យលើជនជាប់ចោទនោះឲ្យមានពន្លឺយុត្តិធម៌ថែមទៀតនោះបានទេបាទ”។
ចំពោះការចោទប្រកាន់របស់ចៅក្រមស៊ើបសួរលើ លោក កឹម សុខា ពីបទសន្ធិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌកម្ពុជានោះ លោក គង់ គាំ អះអាងថា “មេធាវីដើមចោទបានដាក់បន្ទុកទៅលើជនជាប់ចោទ ហើយមេធាវីជនជាប់ចោទត្រូវព្យាមយាមដោះបន្ទុកពីជនជាប់ចោទ ខ្ញុំគ្រាន់តែជាសាក្សីទេ អ្វីដែលចៅក្រមស៊ើបសួរចង់ដឹង ហើយខ្ញុំដឹង ខ្ញុំនឹងជម្រាបគាត់ ហើយអ្វីដែលខ្ញុំមិនបានដឹង ខ្ញុំនឹងប្រាប់ចៅក្រមថា ខ្ញុំមិនបានដឹងទេបាទ”។
សូមបញ្ជាក់ថា លោក កឹម សុខា ត្រូវបានចាប់ និងឃុំខ្លួន កាលពីថ្ងៃទី៣ ខែកញ្ញា ឆ្នាំ២០១៧ ដោយចោទប្រកាន់ពីបទធ្វើសន្ធិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ យោងតាមក្រមព្រហ្មទណ្ឌបទធ្វើសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ ឆ្នាំដល់៣០ឆ្នាំ។ តែត្រូវបានតុលាការសម្រេចដោះលែងឲ្យនៅក្រៅឃុំបណ្តោះអាសន្ន នៅវេលាទៀបភ្លឺ ឈានចូលថ្ងៃទី១០ ខែកញ្ញា ឆ្នាំ២០១៨ ដោយដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
ការដោះលែង លោក កឹម សុខា ឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យតាមផ្លូវតុលាការនេះ បានភ្ជាប់នូវលក្ខខណ្ឌចាំបាច់មួយចំនួនសម្រាប់អតីតមេបក្សប្រឆាំងនេះ ដែលរួមមានដូចជា មិនអនុញ្ញាតឲ្យចេញក្រៅពីព្រំប្រទល់ នៃដែនដីដែលខណ្ឌដោយផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គល ឬជនបរទេសដែលពាក់ព័ន្ធនឹងសំណុំរឿង និងមិនត្រូវជួបជុំធ្វើសកម្មភាពនយោបាយជាដើម៕
Source: Kampuchea Thmey Daily
0 Comments