រតនគីរី ៖ ជនសង្ស័យ៣នាក់ រួមទាំងថ្នាំញៀន៥កញ្ចប់ធំ និងវត្ថុតាងពាក់ព័ន្ធមួយចំនួនធំទៀត ត្រូវនគរបាលខេត្តរតនគីរី បង្ក្រាបបាន។
សមត្ថកិច្ចប្រាប់ឲ្យដឹងថា កាលពីវេលាម៉ោង១៥និង០០នាទីរសៀល ថ្ងៃទី០៦ ខែធ្នូ ឆ្នាំ២០១៨ កម្លាំងជំនាញបានចុះបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន (វិធានញុះញង់) ស្ថិតក្នុងភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី ឃាត់ខ្លួនមុខជនសង្ស័យ ០១នាក់ ដកហូតម្សៅក្រាមសថ្លា សង្ស័យសារធាតុញៀន០១កញ្ចប់។
ប្រភពព័ត៌មានប្រាប់បន្តថា ប្រតិបត្តិការនេះ ដឹកនាំដោយលោកឧត្ដមសេនីយ៍ត្រី វ៉ាន់ សង្វាត់ ស្នងការរងផែនការងារប្រឆាំងបទល្មើស កម្លាំងជំនាញបានធ្វើការសាកសួររួចបន្តទៅឃាត់ខ្លួនជនសង្ស័យ០២នាក់ផ្សេងទៀត ក្នុងផ្ទះមុខសញ្ញា ស្ថិតក្នុងភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី ដោយមានការសម្របសម្រួលពី លោក រ៉ាបូ រ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី បានធ្វើការឆែកឆេររកឃើញម្សៅក្រាមសថ្លា សង្ស័យសារធាតុញៀនមួយចំនួនទៀត។
ជនសង្ស័យទាំង៣នាក់ ដែលត្រូវឃាត់ខ្លួន ១.ឈ្មោះ ជាង ណាង ភេទប្រុស អាយុ៣៥ឆ្នាំ, ២.ឈ្មោះតាល់ ពឹង ភេទប្រុស អាយុ២៤ឆ្នាំ, ៣.ឈ្មោះ ដួង សុភ័ណ ភេទប្រុស អាយុ៣៦ឆ្នាំ ក្រោយពីឃាត់ខ្លួនបានធ្វើតេស្តទឹកនោម លទ្ធផលវិជ្ជមាន (+) ទាំង០៣នាក់។
ចំណែក វត្ថុតាងដកហូតរួមមាន ម្សៅក្រាមសថ្លា សង្ស័យសារធាតុញៀន ចំនួន០៥កញ្ចប់ធំ ទម្ងន់១១.២០ក្រាម ថ្លឹងទាំងសំបកថង់ ទូរស័ព្ទ០១គ្រឿង ដាវសាំមូរៃ០២ដើម ជញ្ជីងថ្លឹងថ្នាំញៀន០១គ្រឿង ម៉ូតូ០២គ្រឿង ថង់ច្រកថ្នាំញៀនមួយចំនួនធំ និងសម្ភារៈសេពថ្នាំញៀនមួយចំនួនធំទៀត។
បច្ចុប្បន្ន ជនសង្ស័យ រួមទាំងវត្ថុតាង បានឃាត់ និងរក្សាទុកបណ្ដោះអាសន្ននៅការិយាល័យជំនាញ ដើម្បីកសាងសំណុំរឿងបញ្ជូនទៅអយ្យកាអមសាលាដំបូងខេត្តចាត់ការតាមនីតិវិធី៕
Source: Kampuchea Thmey Daily
0 Comments