ភ្នំពេញ ៖ ក្រុមនិស្សិតកូរ៉េមកពីសាកលវិទ្យាល័យ Inje University នៃសាធារណរដ្ឋកូរ៉េខាងត្បូងបានបង្កើតនូវកម្មវិធីផ្លាស់ប្ដូរវប្បធម៌រវាងកម្ពុជា និងកូរ៉េ ដោយបានសម្ដែងនូវរបាំបែបប្រពៃណីបុរាណកូរ៉េនិងរាំបែបទំនើប K-POP ដើម្បីអបអរសាទរទិវា៧មករា។
ការសម្តែងនេះបានធ្វើឡើងនៅក្នុងខេត្តកំពង់ធំ ខណៈក្រុមនិស្សិត និងគ្រូកូរ៉េបានចុះមកធ្វើទស្សនកិច្ចសិក្សានៅសាលាបឋមសិក្សា កំពង់ធំក្រុង ស្ថិតនៅសង្កាត់កំពង់ធំក្រុងស្ទឹងសែនខេត្តកំពង់ធំចាប់ពីថ្ងៃទី២៩ ខែធ្នូ ឆ្នាំ២០១៨ រហូតដល់ថ្ងៃទី១៣ ខែមករា ឆ្នាំ២០១៩។
ក្រោមការដឹកនាំរបស់លោកគ្រូសាស្ត្រាចារ្យ Ph.D. Kin Sungsoo ប្រធានសាកលវិទ្យាល័យ Inje Uni versity បានដឹកនាំនិស្សិតសកលវិទ្យាល័យនេះ ធ្វើទស្សនកិច្ចសិក្សានៅក្នុងប្រទេសកម្ពុជា ដើម្បីយកបទពិសោធន៍ និងស្វែងយល់ ព្រមទាំងជួយបង្រៀនដល់សិស្សានុសិស្សនៅក្នុងសាលាបឋមសិក្សា កំពង់ធំក្រុង។
ក្រុមនេះបានជួយជួសជុល អគារសិក្សា បំពាក់ឧបករណ៍ក្មេងលេងចាក់បេតុងផ្លូវចូលសាលា បំពាក់សម្ភារៈសិស្ស សម្រាប់ការិយាល័យ និងសំអាតទីធ្លាសាលា លាបថ្នាំថ្មី១អគារ មាន៣បន្ទប់ គូរូបលម្អសាលាសម្រាប់ក្មេង ធ្វើតារាងបាល់ ចាក់ដីបំពេញទីធ្លាសាលា ព្រមទាំងបានជួយអង្ករ និង ធ្វើម្ហូបអាហារដល់កុមារ ចំនួន៥០០នាក់ នៅក្នុងអង្កការដែល(DAIL) នៅក្នុងខេត្តសៀមរាបផងដែរ។
សម្រាប់ទស្សនកិច្ចសិក្សាចាប់ពីថ្ងៃទី២៩ ខែធ្នូ ឆ្នាំ២០១៨ ដល់ ថ្ងៃទី១៣ ខែមករា ឆ្នាំ២០១៩ សាកលវិទ្យាល័យនេះបានចុះមក សាលាបឋមសិក្សា កំពង់ធំក្រុងដឹកនាំដោយលោកសាស្ត្រាចារ្យ Yang Yeong Ae សហការជាមួយអង្គការសេវាកម្មដើម្បីសន្តិភាពកម្ពុជា ដែលមាន លោក ហួរ ឡុងផេង ជាប្រធានអង្គការ បាននាំយកនិស្សិតកូរ៉េមកចុះកម្មសិក្សាចំនួន៣០នាក់ ស្រីចំនួន១៨នាក់ គ្រូ២នាក់និងនិស្សិតកម្ពុជាយើងចំនួន៧នាក់ផងដែរ។
ក្រុមនិស្សិតទាំងនេះបានចុះជួយអប់រំផ្នែកអនាម័យ សិក្សាសង្គម កីឡាសម្ព័ន្ធ និងជួយធ្វើផ្លូវបេតុង ដាក់ឧបករណ៍ក្មេងលេង ចាក់ដី ធ្វើទីលានកីឡា នៅក្នុងសាលាបឋមសិក្សាកំពង់ធំក្រុងនេះ និងផ្តល់នូវសម្ភារៈសិក្សាមួយចំនួនទៀត ដើម្បីជាការចូលរួមចំណែកជួយអភិវឌ្ឍន៍ និងស្វែងយល់អំពីវប្បធម៌រវាងប្រទេសកម្ពុជា និងប្រទេសកូរ៉េខាងត្បូង ដែលជាការទំនាក់ទំនងដ៏ជិតស្និទ្ធជាមួយប្រទេសកម្ពុជា ក្នុងនាមជាគ្រួសារមនុស្សជាតិតែមួយ បើទោះបីជាមានសញ្ជាតិ និង ជំនឿផ្សេងៗគ្នាក៏ដោយ ប្រយោជន៍ គឺដើម្បីបង្កើតនូវសន្តិភាពជាសកលនៅលើពិភពលោក និង ការចូលរួមសកម្មភាពជួយដល់សហគមន៍ក្រីក្រ ព្រមទាំងការចូលរួមអភិវឌ្ឍន៍វិស័យអប់រំ និងសេដ្ឋកិច្ច នៅក្នុងប្រទេសកម្ពុជា។
សូមរំលឹកថា ចាប់ពីឆ្នាំ២០១០ មកដល់បច្ចុប្បន្ន សាកលវិទ្យាល័យមានគម្រោង និងជួយដល់សាលាបឋមសិក្សានានា ដោយជួយសាងសង់នូវបង្គន់ និងប្រព័ន្ធទឹកស្អាតសម្រាប់សិស្សានុសិស្សប្រើប្រាស់ជាប្រចាំថ្ងៃ ដែលអាចពិសាបាននៅក្នុងសាលាថែមទៀត ព្រោះថាសាកលវិទ្យាល័យ មកប្រទេសកម្ពុជា ក្នុងគោលបំណងដើម្បីចូលរួមជាមួយអ្នកស្ម័គ្រចិត្តនៅក្នុងកម្មវិធីអភិវឌ្ឍន៍សហគមន៍ ដើម្បីលើកកម្ពស់កំណើន និងការអភិវឌ្ឍន៍របស់បុគ្គល និងសហគមន៍តាមរយៈបទពិសោធន៍ចែករំលែក នៃសេវាកម្មស្ម័គ្រចិត្ត។
ដោយមានការគាំទ្រពីសេវាសន្តិភាពសហគមន៍នៅទូទាំងពិភពលោក នឹងក្លាយជាគំរូ នៃការអភិវឌ្ឍន៍តាមសហគមន៍ដោយប្រជាជនគ្រប់មជ្ឈដ្ឋានធ្វើការជាមួយគ្នា ដើម្បីបំពេញនូវចក្ខុវិស័យរួមគ្នានៃសុខុមាលភាព។ហើយក៍ដើម្បីសិក្សាស្វែងយល់អំពីវប្បធម៌រវាងប្រទេសទាំងពីរគឺ កម្ពុជា-កូរ៉េ ក្នុងការរួមចំណែកជួយនៅក្នុងប្រទេសកម្ពុជា ជាក់ស្ដែងនៅពេលកន្លងមកនេះ យើងបានចុះតាមស្រុកមួយចំនួននៅក្នុងខេត្តកំពង់ធំមានដូចជា នៅក្រុងស្ទឹងសែន ស្រុកកំពង់ស្វាយ ស្រុកសន្ទុក និងតាមបណ្តាខេត្តនានា ជាដើម ហើយក៏បានចុះជួយនៅតាមសាសាបឋមសិក្សា សហគមន៍ក្រីក្រ មជ្ឈមណ្ឌលកុមារកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមាររស់នៅដោយមានផ្ទុកមេរោគអេដស៍ ឧបត្ថម្ភនូវសម្ភារៈសិក្សាមួយចំនួន ដូចជា សម្ភារៈសម្រាប់សិស្សសិក្សា និងសម្ភារៈកីឡាមួយចំនួនទៀតដល់សាលា និងមជ្ឈមណ្ឌលផ្សេងៗផងដែរ៕
Source: Kampuchea Thmey Daily
0 Comments