លោកស្រី Sheikh Hasina នឹងត្រូវស្បថចូលកាន់តំណែងជានាយករដ្ឋមន្ត្រីបង់ក្លាដែសសម្រាប់អាណត្តិទីបួនក្នុងកំណត់ត្រាក្រោយពីទទួលជ័យជម្នះក្នុងការបោះឆ្នោតមួយដែលត្រូវបានរំខានដោយអំពើហិង្សាដ៏សាហាវនិងការអះអាងអំពីការក្លែងបន្លំរីករាលដាល។
លោកស្រី Hasina អាយុ៧១ឆ្នាំបានជួយជំរុញដល់កំណើនសេដ្ឋកិច្ចក្នុងកំណត់ត្រានៅប្រទេសអាស៊ីខាងត្បូងដែលមានប្រជាជន១៦៥លាននាក់មួយនេះប៉ុន្តែក្រុមអ្នករិះគន់បានចោទប្រកាន់លោកស្រីសម្រាប់អំពើផ្តាច់ការ។
គណបក្ស Awami League របស់លោកស្រីនិងសម្ព័ន្ធមិត្តរបស់ខ្លួនបានឈ្នះការបោះឆ្នោតភ្លូកទឹកភ្លូកដីកាលពីថ្ងៃទី៣០ខែធ្នូដោយទទួលបានអាសនៈចំនួន២៨៨នៅក្នុងសភាដែលមាន៣០០អាសនៈបើធៀបទៅនឹងគណបក្សប្រឆាំងដែលទទួលបានត្រឹមតែប្រាំពីរអាសនៈប៉ុណ្ណោះ។
ក្នុងអំឡុងយុទ្ធនាការឃោសនាបោះឆ្នោត គេបានឃើញពីការចាប់ខ្លួនសកម្មជននិងបេក្ខជនគណបក្សប្រឆាំងនិងការចោទប្រកាន់ពីការបន្លំសន្លឹកឆ្នោតយ៉ាងទូលំទូលាយរួមទាំងការរៀបចំសន្លឹកឆ្នោតទុកជាមុននិងការបំភិតបំភ័យអ្នកបោះឆ្នោតផងដែរ។
មនុស្សចំនួន១៧នាក់ត្រូវបានសម្លាប់នៅថ្ងៃបោះឆ្នោត។
សហភាពអឺរ៉ុបបានអំពាវនាវឲ្យមានការស៊ើបអង្កេតទៅលើការចោទប្រកាន់ពីភាពមិនប្រក្រតីដោយនិយាយថា “ឧបសគ្គយ៉ាងសំខាន់ចំពោះការស្មើភាពគ្នាបានធ្វើឲ្យប៉ះពាល់ដល់យុទ្ធនាការឃោសនាបោះឆ្នោតនិងការបោះឆ្នោត”។
សហរដ្ឋអាមេរិកបានសម្តែងនូវការព្រួយបារម្ភអំពីរបាយការណ៍គួរឲ្យទុកចិត្តនៃការយាយី ការបំភិតបំភ័យនិងអំពើហិង្សា។
គណបក្សប្រឆាំងដែលបានធ្វើពហិការមិនចូលរួមក្នុងពិធីស្បថចូលកាន់តំណែងសភាថ្មីកាលពីសប្តាហ៍មុនបានទាមទារឲ្យមានការបោះឆ្នោតថ្មីនៅក្រោមរដ្ឋាភិបាលអព្យាក្រឹត្យមួយដែលជាអ្វីត្រូវបានលោកស្រី Hasina និងគណៈកម្មការបោះឆ្នោតច្រានចោលទាំងស្រុង។
គួរបញ្ជាក់ថា លោកស្រី Hasina ត្រូវបានជ្រើសរើសជានាយករដ្ឋមន្ត្រីជាលើកដំបូងនៅក្នុងឆ្នាំ ១៩៩៦ប៉ុន្តែលោកស្រីបានព្យាយាមងើបចេញពីស្រមោលនៃឪពុករបស់លោកស្រីក្នុងអំឡុងអាណត្តិដំបូងហើយបានចាញ់ការប្រជែងក្នុងឆ្នាំ២០០១៕ AFP
[caption id="attachment_1012244" align="alignnone" width="700"]
[/caption]Source: Kampuchea Thmey Daily
0 Comments