ភ្នំពេញ ៖ ស្ត្រីម្នាក់ បែកក្បាលរយះហូរឈាម ខណៈកំពុងចេញមកឈរទិញទឹកអំពៅ ក៏មានជម្លោះរវាងអ្នកលក់ឥវ៉ាន់ឲ្យម៉ូយ ឈានទៅដល់ប្រើហិង្សាទៅលើជនរងគ្រោះ កាលពីវេលាម៉ោង១៦និង៣០នាទី ថ្ងៃទី០៤ ខែមករា ឆ្នាំ២០១៩ នៅចំណុចផ្លូវលេខ០៥ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
បើតាមសមត្ថកិច្ចបានឲ្យដឹងថា ជនរងគ្រោះ បាននិងកំពុងឈរទិញទឹកអំពៅនៅកន្លែងកើតហេតុ ស្រាប់តែជនសង្ស័យបានជិះម៉ូតូមកជេរប្រមាថជនរងគ្រោះ ពីរឿងដែលជនរងគ្រោះលក់ឥវ៉ាន់ឲ្យម៉ូយម្នាក់ ហើយបានឈ្លោះប្រកែកគ្នាបន្តិចបន្តួច ពេលនោះស្ត្រីរងគ្រោះ និងជនសង្ស័យបានឈ្លោះប្រកែកគ្នា ក្រោយមកជនសង្ស័យបានជិះម៉ូតូចេញបានប្រហែលជា៣០ម៉ែត្រ ក៏ជិះបកត្រឡប់មកវិញ ឈប់ម៉ូតូនៅជិតជនរងគ្រោះ រួចទាញយកច្រវាក់ចាក់ម៉ូតូរបស់ខ្លួន មកវាយក្បាលជនរងគ្រោះបណ្តាលឲ្យបែកក្បាលខាងឆ្វេង រួចជិះម៉ូតូគេចខ្លួនបាត់ទៅ។
ស្ត្រីរងគ្រោះឈ្មោះ មួង វ៉េង អាយុ៤៦ឆ្នាំ មុខរបរលក់ដូរ ស្នាក់នៅផ្ទះលេខ៦០ ផ្លូវលេខ០៥ ក្រុមទី១៤ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ។ ក្រោយកើតហេតុ អ្នករងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ឫស្សីកែវ ដើម្បីឲ្យសមត្ថកិច្ចជួយចាត់ចំណាត់ការអន្តរាគមន៍គ្រាដែលជនសង្ស័យបានមកវាយខ្លួនយ៉ាងនេះ។
ក្រោយទទួលបានពាក្យបណ្ដឹងពីជនរងគ្រោះ លុះមកដល់ថ្ងៃទី០៧ ខែមករា ឆ្នាំ២០១៩នេះ ក្នុងវេលាម៉ោង០១និង០០នាទី រំលងអធ្រាត្រ ជំនាញខណ្ឌ និងប៉ុស្តិ៍រដ្ឋមូលដ្ឋាន បានឈានទៅឃាត់ខ្លួនជនសង្ស័យ នៅចំណុចផ្លូវជាតិលេខ៥ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ និងបានដកហូតម៉ូតូ ០១គ្រឿង ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 1FI-2019 រួមជាមួយនឹងច្រវាក់មួយខ្សែ ពណ៌ខៀវ ដែលជនសង្ស័យបានប្រព្រឹត្តសកម្មភាពបទល្មើស។
ជនសង្ស័យ ដែលត្រូវបានសមត្ថកិច្ចចាប់ឃាត់ខ្លួននោះ ឈ្មោះ មុត រ៉ា ភេទប្រុស អាយុ៤០ឆ្នាំ មុខរបររត់ម៉ូតូឌុប ស្នាក់នៅផ្ទះជួល ផ្លូវលេខ០៥ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ។
បច្ចុប្បន្ន ជនសង្ស័យរូបនេះ ត្រូវបានកម្លាំងនគរបាលប៉ុស្តិ៍ឫស្សីកែវ បញ្ជូនមកកាន់អធិការដ្ឋាននគរបាលខណ្ឌឫស្សីកែវ ដើម្បីសួរយកចម្លើយ និងកសាងសំណុំរឿង បញ្ចូនទៅសាលាដំបូងរាជធានីភ្នំពេញដើម្បីអនុវត្តន៍តាមនីតិវិធី៕
Source: Kampuchea Thmey Daily
0 Comments