នាយករដ្ឋមន្ត្រីអ៊ីស្រាអែលលោក Benjamin Netanyahu កាលពីប៉ុន្មានថ្ងៃថ្មីៗនេះបានកំណត់គោលដៅទៅលើអ្វីដែលត្រូវបានគេមើលឃើញថាជាការប្រឆាំងដ៏ធំមុនការបោះឆ្នោតនាពេលខាងមុខ។ នោះគឺជាការស៊ើបអង្កេតអំពីអំពើពុករលួយដែលអាចនាំឲ្យមានការប្តឹងចោទប្រកាន់គាត់។
នៅក្នុងវីដេអូមួយដែលទទួលរងការរិះគន់យ៉ាងខ្លាំងកាលពីចុងសប្តាហ៍ លោក Netanyahu បាននិយាយប្រឆាំងនឹងលទ្ធភាពដែលថា អគ្គមេធាវីនឹងប្រកាសអំពីការសម្រេចចិត្តរបស់គាត់ថាតើត្រូវចោទប្រកាន់គាត់មុនការបោះឆ្នោតថ្ងៃទី៩ខែមេសាដែរឬក៏អត់។
ការស្ទង់មតិបានបង្ហាញថា នាយករដ្ឋមន្ត្រីរូបនេះទំនងជានឹងឈ្នះថ្វីបើមានការស៊ើបអង្កេតលើគាត់ក៏ដោយប៉ុន្តែការខិតខំប្រឹងប្រែងដើម្បីចោទប្រកាន់គាត់អាចរំខានដល់យទ្ធនាការឃោសនាបោះឆ្នោត។
លោកបានជំរុញជាសាធារណៈឲ្យអគ្គមេធាវីពន្យាការប្រកាសដែលជាហេតុនាំឲ្យមានការរិះគន់ថា ការអត្ថាធិប្បាយរបស់គាត់គឺស្ថិតនៅក្រៅព្រំដែន។
បន្ទាប់ពីវីដេអូរបស់គាត់កាលពីថ្ងៃសៅរ៍ អតីតចៅក្រមតុលាការកំពូលលោក Eliyahu Matza បានប្រៀបធៀបវោហាសាស្ត្ររបស់លោក Netanyahu ទៅនឹងមេក្រុមឧក្រិដ្ឋកម្ម។
លោក Netanyahu បាននិយាយនៅក្នុងវីដេអូនោះថា “អ្នកកុំចាប់ផ្តើមសវនាការមុនការបោះឆ្នោតអីប្រសិនបើអ្នកមិនអាចសន្និដ្ឋានបានមុនការបោះឆ្នោត”។
សវនាការមុនការចោទប្រកាន់គឺជាជំហានដ៏សំខាន់មួយនៅក្នុងដំណើរការយុត្តិធម៌របស់ប្រទេសអ៊ីស្រាអែល។
ប្រសិនបើលោកឧត្តមសេនីយ៍ Avichai Mandelblit ប្រកាសពីគោលបំណងរបស់លោកក្នុងការចោទប្រកាន់គាត់នោះ លោក Netanyahu នឹងទទួលបានឱកាសចុងក្រោយដើម្បីការពារខ្លួននៅក្នុងសវនាការមួយមុនពេលដែលការចោទប្រកាន់ត្រូវបានដាក់។
នាយករដ្ឋមន្ត្រីដែលប្រឈមមុខនឹងការចោទប្រកាន់ក្នុងការស៊ើបអង្កេតចំនួនបីដាច់ដោយឡែកពីគ្នាបាននិយាយថា គាត់គ្មានចេតនាលាលែងពីតំណែងទេប្រសិនបើគាត់ត្រូវបានកោះហៅឲ្យឡើងសវនាការបែបនេះមុនពេលបោះឆ្នោត។
យោងតាមអ្នកវិភាគជាច្រើនបានឲ្យដឹងថា លោក Netanyahu បានជំរុញឲ្យមានការបោះឆ្នោតនៅខែមេសា ប្រាំពីរខែមុនការគ្រោងទុកដោយសារតែគាត់ចង់ប្រយុទ្ធប្រឆាំងនឹងការចោទប្រកាន់ជាមួយអាណត្តិបោះឆ្នោតថ្មី៕ AFP
Source: Kampuchea Thmey Daily
0 Comments