កំពង់ស្ពឺ ៖ យ៉ាងហោចណាស់មនុស្ស ម្នាក់ស្លាប់ភ្លាមៗ និង ០៣នាក់ទៀត រងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងម៉ូតូបុកជាមួយម៉ូតូ នៅតាមបណ្ដោយផ្លូវក្រាលកៅស៊ូ ត្រង់ចំណុចភូមិទួល ឃុំព្រៃក្រសាំង ស្រុកឧដុង្គ ខេត្តកំពង់ស្ពឺ នាល្ងាចថ្ងៃទី០៦ ខែមករា ឆ្នាំ២០១៩នេះ។
មន្ត្រីនគរបាលស្រុកឧដុង្គបានឲ្យដឹងថា ជនរងគ្រោះ០២នាក់ជិះម៉ូតូមួយគ្រឿងម៉ាក អ៊ីស៊ីទ័រ ពណ៌ខ្មៅ គ្មានស្លាកលេខ បើកបរដោយឈ្មោះ រ៉ុង ភេទប្រុស អាយុ២០ឆ្នាំ និងអ្នករួមដំណើរឈ្មោះ ម៉ី ភេទប្រុស អាយុ២៦ឆ្នាំ រស់នៅភូមិច្រកពពូល ឃុំជំពូព្រឹក្ស ស្រកឧដុង្គ បើកបរពីកើតទៅលិច លុះមកដល់ចំណុចកើតហេតុខាងលើ បើកជែងរថយន្តមួយគ្រឿងកំពុងធ្វើដំណើរស្របគ្នា ក៏ជ្រុលទៅបុកជាមួយម៉ូតូមួយគ្រឿងទៀត ម៉ាកហុងដា សេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ កំពង់ស្ពឺ 1j-0551បើកបរដោយឈ្មោះ ឌឿន ភេទស្រី អាយុ១៨ឆ្នាំ និងអ្នករួមដំណើឈ្មោះ ភ័ស ភេទស្រី អាយុ២២ឆ្នាំ នៅភូមិពាណិជ្ជ ឃុំយាអង្គ ស្រុកថ្ពង ពេញទំហឹងបណ្តាលឲ្យឈ្មោះ រ៉ុង ស្លាប់ភ្លាមៗនៅនឹងកន្លែងកើតហេតុ និង៣នាក់ទៀតរងរបួសធ្ងន់។
ជនរងគ្រោះ ត្រូវសមត្ថកិច្ចជួយសង្គ្រោះដោយដឹកបញ្ជូនទៅមន្ទីរពេទ្យភ្លាមៗតែម្តង។ សពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី។
ចំណែកវត្ថុតាងម៉ូតូទាំងពីរគ្រឿង យកមករក្សាទុកនៅអធិការដ្ឋាននគរបាលស្រុកឧដុង្គ រង់ចាំដោះស្រាយនៅពេលក្រោយ៕
Source: Kampuchea Thmey Daily
0 Comments