ភ្នំពេញ ៖ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំសហរដ្ឋអាមេរិកបានសម្ដែងការតក់ស្លុត និងស្រងាកចិត្តយ៉ាងខ្លាំង នៅពេលឃើញរូបភាពនៃប្រាសាទរបស់ខ្មែរ ដែលបានចុះបញ្ជីជាបេតិកភណ្ឌពិភពលោករួចទៅហើយនោះ ត្រូវបានក្រុមហ៊ុនផលិតទំនិញមួយចំនួន យកធ្វើជារូបភាពដាក់នៅលើផលិតផលរបស់ខ្លួនបង្កភាពអាម៉ាស់យ៉ាងខ្លាំង។
សេចក្តីប្រកាសព័ត៌មានចុះថ្ងៃទី១៧ ខែមករា ឆ្នាំ២០១៩ របស់ស្ថានទូតនៃព្រះរាជាណាចក្រកម្ពុជាប្រចាំសហរដ្ឋអាមេរិកបានលើកឡើងថា រូបភាពនៃប្រាសាទអង្គរ ដោយរួមមានដូចជាប្រសាទអង្គរវត្ត ប្រាសាទតាព្រហ្ម ប្រាសាទបាយ័ន និងបឹងមាលាជាដើម ដែលត្រូវបានចុះបញ្ជីជាបេតិកភណ្ឌពិភពលោកតាំងពីឆ្នាំ១៩៩២ និងទទួលបានអត្ថប្រយោជន៍ពីអង្គការអភិរក្សអន្តរជាតិ UNESCO ហើយនៅឆ្នាំ២០១៧ ត្រូវបានក្រុមហ៊ុនផលិតទំនិញមួយចំនួនយកទៅធ្វើជារូបភាពដាក់លើផលិតផលបង្កភាពអាម៉ាស់យ៉ាងខ្លាំង ក្នុងនោះមានដូចជា គម្របបង្គន់ កម្រាលបន្ទប់ទឹក កម្រាលជើងមុខបង្គន់ វាំងននងូតទឹក និងកម្រាលផ្ទះបាយជាដើម។ លើសពីនេះទៀតក្រុមហ៊ុនបានប្រើប្រាស់វិធីគួរឲ្យស្អប់ខ្ពើម ដោយប្រើប្រាស់ទង់ជាតិនៃព្រះរាជាណាចក្រកម្ពុជាទៅរចនាធ្វើជាកម្រាលបន្ទប់ទឹក កម្រាលព្រំ និងបង្គន់ ហើយត្រូវបានដាក់លក់នៅលើគេហទំព័រ amazon.com និង amazon fr។
ក្នុងនាមព្រះរាជាណាចក្រកម្ពុជា លោកឯកអគ្គរាជទូត បានថ្កោលទោសបណ្ដាក្រុមហ៊ុនផលិតផលិតផលទាំងអស់នោះ និងទាមទារឲ្យក្រុមហ៊ុន amazon បញ្ឈប់ជាបន្ទាន់នូវការលក់របស់ខ្លួន ហើយដកចេញពីគេហទំព័រនូវផលិតផល ដែលធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយសជាតិ និងកិត្យានុភាពនៃព្រះរាជាណាចក្រកម្ពុជា។
សូមបញ្ជាក់ថា នៅពេលថ្មីៗនេះ គេឃើញក្រុមហ៊ុន Online ដ៏ល្បីរបស់អាមេរិកមួយ ឈ្មោះ Amazon បានរចនារូបប្រាសាទអង្គរវត្ត និងរូបប្រាសាទល្បីៗមួយចំនួនទៀតរបស់កម្ពុជា ដែលត្រូវបានគេទទួលស្គាល់ទូទាំងពិភពលោក យកទៅដាក់លើគ្របបង្គន់ និងកម្រាលជើងជាដើម ហើយដាក់តាំងលក់នៅលើអនឡាញ។ បញ្ហានេះ ធ្វើឲ្យប្រជាពលរដ្ឋ ក៏ដូចជាមហាជនទូទៅ បានសម្តែងការមិនពេញចិត្ត និងបានប្រតិកម្មយ៉ាងខ្លាំង ហើយបានថ្កោលទោសថា ក្រុមហ៊ុនអាមេរិក Amazon បានប្រមាថជាតិសាសន៍ខ្មែរ ក៏ដូចជាបុព្វបុរសខ្មែរយ៉ាងខ្លាំង ដែលមិនអាចទទួលយកបានឡើយ។
តាមក្រុមហ៊ុន Amazon ដែលបានបង្ហោះនៅលើអនឡាញ បានយករូបប្រសាទអង្គរវត្ត ព្រះបាទជ័យវរ្ម័នទី៧ ព្រហ្មមុខបួន និងប្រសាទនានារបស់ខ្មែរ យកមកធ្វើជាគម្របបង្គន់ និងជាកម្រាលជើង ដាក់លក់ក្នុងតម្លៃត្រឹមតែ១៩.៩៩ដុល្លារអាមេរិកប៉ុណ្ណោះ ហើយបញ្ហានេះ កាន់តែបង្ហាញថា ក្រុមហ៊ុននេះផ្គើនដល់ប្រជាជនកម្ពុជាកាន់តែខ្លាំងឡើងៗ៕
Source: Kampuchea Thmey Daily
0 Comments