ឧត្តមសេនីយ៍កូរ៉េខាងជើងកំពូលម្នាក់កំពុងស្ថិតនៅក្នុងរដ្ឋធានីវ៉ាស៊ីនតោននៅថ្ងៃសុក្រ សម្រាប់ដំណើរទស្សនកិច្ចដ៏កម្រមួយដែលក្នុងអំឡុងពេលនេះ លោកត្រូវបានគេរំពឹងថានឹងជួបជាមួយលោកប្រធានាធិបតី Donald Trump ខណៈដែលប្រទេសទាំងពីរកំពុងខិតខំសម្រេចឲ្យបាននូវកិច្ចប្រជុំកំពូលថ្មីមួយដែលផ្តោតលើការលុបបំបាត់អាវុធនុយក្លេអ៊ែរនិងបន្ធូរបន្ថយភាពតានតឹងរយៈពេលជាច្រើនទសវត្ស។
លោក Kim Yong Chol ដែលជាដៃស្ដាំរបស់មេដឹកនាំកូរ៉េខាងជើងគីមជុងអ៊ុនបានទៅដល់រដ្ឋធានីអាមេរិកកាលពីល្ងាចថ្ងៃព្រហស្បតិ៍ដែលនេះជាបេសកកម្មបង្កើតសន្តិភាពថ្មីបំផុតបន្ទាប់ពីភាពតានតឹងបានកើនឡើងជាថ្មីកាលពីមួយឆ្នាំមុន។
អ្នកចរចាកូរ៉េខាងជើងរូបនេះបានលុបចោលកិច្ចពិភាក្សាដែលបានគ្រោងទុកចុងក្រោយរបស់គាត់នៅក្នុងសហរដ្ឋអាមេរិកជាមួយរដ្ឋមន្ត្រីក្រសួងការបរទេស Mike Pompeo ហើយពេលនេះរដ្ឋបាលអាមេរិកបានប្រុងប្រយ័ត្នដោយមិនប្រកាសពីដំណើរទស្សនកិច្ចរបស់គាត់ជាមុនទេ។
ប៉ុន្តែប្រភពអាមេរិកមួយបាននិយាយថា លោក Pompeo នឹងស្វាគមន៍លោក Kim នៅថ្ងៃសុក្រសម្រាប់អាហារមួយពេលក្នុងរដ្ឋធានីវ៉ាស៊ីនតោនមុនពេលអ្នកទាំងពីរត្រូវបានគេរំពឹងថានឹងឆ្ពោះទៅសេតវិមានជាមួយគ្នា។
លោក Trump បាននិយាយម្តងហើយម្តងទៀតនូវការខ្នះខ្នែងដើម្បីជួបលោកគីមជុងអ៊ុនសារជាថ្មីបន្ទាប់ពីជំនួបកំពូលជាប្រវត្តិសាស្ត្ររបស់ពួកគេនៅក្នុងប្រទេសសិង្ហបុរីកាលពីខែមិថុនាដែលជាកិច្ចប្រជុំលើកដំបូងមិនធ្លាប់មានរវាងមេដឹកនាំកំពុងកាន់តំណែងនៃប្រទេសទាំងពីរ។
លោកបាននិយាយថា លោករំពឹងថានឹងមានសេចក្តីប្រកាសមួយក្នុងពេលឆាប់ៗនេះអំពីកិច្ចប្រជុំកំពូលលើកទី២ខណៈក្រុមអ្នកការទូតបានមើលឃើញប្រទេសវៀតណាមនិងថៃថាជាទីកន្លែងដែលអាចរៀបចំកិច្ចប្រជុំនេះបាន។
គួររម្លឹកថា នៅក្នុងប្រទេសសិង្ហបុរី លោកគីមបានសន្យាថានឹងធ្វើការប្តេជ្ញាចិត្តឥតងាករេដើម្បីសម្រេចការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ។
ប៉ុន្តែភាគីទាំងពីរហាក់ដូចជាមានគំនិតខុសគ្នាអំពីរបៀបដើម្បីសម្រេចវាដោយសហរដ្ឋអាមេរិករំពឹងថា កូរ៉េខាងជើងនឹងបោះបង់ចោលអាវុធនុយក្លេអ៊ែរហើយទីក្រុងព្យុងយ៉ាងព្យាយាមបញ្ចប់នូវអ្វីដែលខ្លួនមើលឃើញថាជាការគំរាមកំហែងរបស់អាមេរិក៕ AFP
Source: Kampuchea Thmey Daily
0 Comments