ក្លិបបាល់ទាត់ភ្នំពេញក្រោន សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) កំពុង ដែលដឹកនាំដោយលោក Leonardo Vitorino ជាគ្រូបង្វឹកបង្គោល ត្រូវចូលរួមប្រកួតនៅក្នុងពានរង្វាន់ Leo Pre-Season Cup 2019 ដែលត្រូវធ្វើឡើងនៅប្រទេសថៃ ខណៈពានរង្វាន់នេះមានក្រុមចូលរួមសរុបមានចំនួន១៦ ផ្សេងគ្នាមកពី៤ប្រទេស ហើយជម្រុះដល់វគ្គ៨ក្រុមចុងក្រោយហើយ។
ក្រុមភ្នំពេញក្រោន បានធ្វើដំណើរទៅប្រកួតនៅប្រទេសថៃ នៅថ្ងៃព្រហស្បតិ៍ សប្ដាហ៍នេះ ខណៈត្រូវប្រកួតប៉ះក្រុមម្ចាស់ផ្ទះ Nakorn Ratchasima Mazda FC នៅថ្ងៃសៅរ៍ ទី១៩ ខែមករា ឆ្នាំ២០១៩ នៅវេលាម៉ោង៦ល្ងាច លើទីលានកីឡដ្ឋាន 80th Birthday ខេត្ត Nakhon Ratchasima នៃប្រទេសថៃ។ នៅវគ្គ៨ក្រុមចុងក្រោយនេះក៏ត្រូវប្រកួតនៅល្ងាចថ្ងៃសៅរ៍ដូចគ្នាដែរដោយក្រុមថៃ SCG Muangthong United ត្រូវប៉ះក្រុម Hanoi FC របស់វៀតណាម ហើយក្រុមRayong FC ប៉ះក្រុមLaos Toyota FC និងក្រុមChiang Rai FCប៉ះក្រុមTampines Rovers។
យោងតាមសារព័ត៌មាននៅក្នុងស្រុករបស់ថៃ បានបញ្ជាក់ថា ពានរង្វាន់នេះគ្រោងនឹងផ្ដើមនៅថ្ងៃទី ១២ ខែមករា ឆ្នាំ ២០១៩ រហូតដល់ថ្ងៃទី២៦ ខែ មករា ឆ្នាំ ២០១៩។ ការប្រកួតគឺមានការជម្រុះជាបន្តបន្ទាប់មុនរកឃើញក្រុមជើងឯក។ ចំណែកក្រុមដែលចូលរួមមានក្រុមមកពីលីគកំពូលថៃ ចំនួន៦ក្រុមគឺSCG Muangthong United, Port FC, Chiangrai United, PT Prachaup, Nakorn Ratchasima Mazda FC, Bangkok Glass (ដែលត្រូវធ្លាក់ទៅលីគទី២ នារដូវកាល២០១៩)។ លីគលំដាប់ទី២ ថៃ មាន៦ក្រុមដូចជាChiangmai FC ( ឡើងទៅលីគកំពូលនារដូវកាល២០១៩ ), Khonkaen FC, Nong Bua Pitchaya FC, Singha Samut Sakorn FC, Udon Thani FC, Rayong FC។ លីគកំពូលកម្ពុជា មានក្លិបបាល់ទាត់ភ្នំពេញក្រោន លីគកំពូលម៉ាឡេស៊ី មានក្រុមជើងឯករង Perak លីគកំពូលវៀតណាម មានក្រុមជើងឯក Hanoi FCលីគកំពូលឡាវ មានក្រុមជើងឯក Lao Toyota FC
គោលដៅនៃការបង្កើតពានរង្វាន់អន្តរជាតិនេះឡើងគឺដោយសារតែលីគតាមប្រទេសដែលជាបេក្ខភាពទាំងអស់កំពុងតែសម្រាកត្រៀមរដូវកាលឆ្នាំ២០១៩ ក្រោយក្រុមជម្រើសជាតិប្រមូលផ្តុំកីឡាកររៀងៗខ្លួនដើម្បីប្រកួតក្នុងពានរង្វាន់ធំប្រចាំតំបន់អាស៊ាន AFF Suzuki Cup 2018 នៅចុងឆ្នាំនេះ។ ដូច្នេះក្រុមទាំង ១៦មានឱកាសបានពង្រឹងសមត្ថភាពតាមរយៈការប្រកួតប្រជែងដ៏ស្វិតស្វាញក្នុងដំណាក់កាលត្រៀមខ្លួនសម្រាប់រដូវកាលថ្មីនៃលីគតាមបណ្តាប្រទេសនីមួយៗ។
សូមបញ្ជាក់ថានៅរដូវកាលឆ្នាំ២០១៨ ថ្មីៗនេះក្នុងពានរង្វាន់លីគកំពូលកម្ពុជា ក្រុមភ្នំពេញក្រោន រក្សាចំណាត់ថ្នាក់លេខ៥ក្រោយប្រកួតបាន២២លើក ឈ្នះបាន១១លើក ស្មើគ្នា៣លើកនិងចាញ់៨លើកមាន៣៦ពិន្ទុ ពោលគឺចាញ់ក្រុមកំពូលតារាងណាហ្គាវើល រហូតដល់២០ពិន្ទុ។ ភ្នំពេញក្រោន ទាត់បញ្ជូលទីគូប្រកួតបាន៤១គ្រាប់ ហើយគេទាត់ចូលវិញចំនួន៣៣គ្រាប់។ ចំណែកនៅក្នុងពានរង្វាន់សម្តេចតេជោ ហ៊ុន សែន (Hun Sen Cup)វិញក្រុមក្រុមភ្នំពេញក្រោន បានធ្លាក់ចេញត្រឹមវគ្គ៨ក្រុមចុងក្រោយ បន្ទាប់ពីចាញ់ក្រុមអង្គរថាយហ្គឺរ ដែលមកពីខេត្តសៀមរាប ដោយបាល់ប៉េណាំងទីកាត់សេចក្តី៤ទល់៣ ក្រោយប្រកួតស្មើគ្នាទាំង២ជើង៤ទល់៤៕
Source: Kampuchea Thmey Daily
0 Comments