ភ្នំពេញ ៖ នារីស្រស់ស្អាតម្នាក់ ត្រូវបានគេប្រទះឃើញស្លាប់នៅតាមផ្លូវ ដោយសារតែមានរថយន្តស៊េរីទំនើបមួយគ្រឿង តាមបុកម៉ូតូរបស់នាង ខណៈកំពុងជិះ បណ្តាលដួលជាប់ឡានបង្កនោះ អូសជាង១០០ម៉ែត្រ ទើបរបូត រួចបើកគេចខ្លួនបាត់តែម្ដង។
ហេតុការណ៍នេះបានកើតកាលពីវេលាម៉ោង២៤និង០០នាទី កណ្តាលអធ្រាត្រ នាថ្ងៃទី២២ ខែមករា ឆ្នាំ២០១៩ តាមបណ្តោយផ្លូវលេខ២០១១ អតីតផ្លូវឧកញ៉ា ទ្រី ហេង ស្ថិតក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ប៉ូលិសមូលដ្ឋានបាននិយាយថា តាមការបំភ្លឺពីសាក្សីជាច្រើននាក់ដែលឃើញហេតុការណ៍នេះផ្ទាល់ភ្នែកបានឲ្យដឹងថា នៅមុនពេលកើតហេតុ នាងជនរងគ្រោះបានកំពុងតែជិះម៉ូតូម៉ាក zoomer តែម្នាក់ឯង ទិសដៅពីជើងទៅត្បូងនៅតាមបណ្តោយផ្លូវលេខ២០១១ លុះមកដល់ចំណុចកើតហេតុក៏ស្រាប់តែមានរថយន្តម៉ាកលុចស៊ីសមួយគ្រឿង បានតាមបើកបុកនាងពីក្រោយ បណ្តាលឲ្យនាងជាប់ក្រោមឡាន ហើយឡាននោះ បើកអូសទៅមុខរហូត ប្រហែលជាង១០០ម៉ែត្រ ទើបរបូត ហើយរថយន្តនោះបានបើករត់គេចខ្លួនភ្លាមៗ ប៉ុន្តែបានជ្រុះសញ្ញាឡូហ្គោប៉ែកខាងមុខរថយន្ត នៅក្បែរសាកសពនាង។
នាងរងគ្រោះត្រូវបានគេស្គាល់ឈ្មោះ រឿន ស្រីម៉ុម អាយុ២៧ឆ្នាំ មុខរបរកម្មករ មានស្រុកកំណើតនៅភូមិគងជ័យ ឃុំព្រែកគុយ ស្រុកកងមាស ខេត្តកំពង់ចាម។
លោក ស៊ិន សុវណ្ណ នាយផ្នែកនគរបាលចរាចរណ៍ប្រចាំខណ្ឌសែនសុខ បានធ្វើការសន្និដ្ឋានជាផ្លូវការថា ករណីនេះ ជនបង្កមានចេតនាបើករថយន្តតាមបុកសម្លាប់ រួចបើកគេចខ្លួនបាត់តែម្តង ដែលរថយន្តបង្កហេតុនោះម៉ាកលុចស៊ីស មិនស្គាល់ស្លាកលេខ។
ប៉ូលិសបានកំពុងតែធ្វើការស្រាវជ្រាវតាមរកភិនភាគរថយន្តបង្កនោះ ដែលគេអាចធ្វើបានតាមរយៈការសុំសហការជាមួយផ្ទះប្រជាពលរដ្ឋណានៅតាមផ្លូវលេខ២០១១នេះ មានបំពាក់ម៉ាស៊ីនកាមេរ៉ា សុវត្ថិភាព ដើម្បីឲ្យស្លាកលេខ ហើយនឹងអាចស្រាវជ្រាវតាមចាប់ខ្លួនដៃដល់បាន។ ដោយសារតែការពារខ្លាចមានរឿងចឹងៗកើតឡើងបែបនេះហើយ ទើបយានយន្តទាំងអស់ តម្រូវឲ្យមានស្លាកលេខសម្គាល់នោះ៕
Source: Kampuchea Thmey Daily
0 Comments