ព្រះមហាក្សត្ររបស់ប្រទេសម៉ាឡេស៊ី បានដាក់រាជ្យកាលពីថ្ងៃអាទិត្យជាលើកដំបូងក្នុងប្រវត្តិសាស្ត្ររបស់ប្រទេសនេះ។ ការដាក់រាជ្យនេះបានបញ្ចប់ការរំពឹងទុករយៈពេលច្រើនសប្តាហ៍អំពីអនាគតរបស់ទ្រង់បន្ទាប់ពីព្រះអង្គបានឈប់សម្រាកទទួលការព្យាបាលនិងត្រូវបានគេរាយការណ៍ថាបានរៀបអភិសេកជាមួយអតីតបវរកញ្ញារុស្ស៊ី។
ការសម្រេចព្រះទ័យរបស់ព្រះមហាក្សត្រ Sultan Muhammad ទី៥គឺជាលើកទីមួយដែលស្ដេចមួយអង្គបានដកខ្លួនចេញពីតំណែងអំឡុងអាណត្តិ៥ឆ្នាំរបស់ទ្រង់នៅក្នុងប្រទេសកាន់សាសនាមូស្លីមភាគច្រើនមួយនេះ។
ព្រះបរមរាជវាំងបានបញ្ជាក់ពីការលាលែងនេះ។ សេចក្តីថ្លែងការណ៍មួយពីអ្នកត្រួតពិនិត្យការិយាល័យព្រះមហាក្សត្រលោក Wan Ahmad Dahlan Abdul Aziz បាននិយាយថា “ព្រះអង្គប្រាប់ប្រជាជនម៉ាឡេស៊ីឲ្យបន្តរួបរួមគ្នាដើម្បីរក្សាសាមគ្គីភាព អត់ធ្មត់និងធ្វើការរួមគ្នា”។
បណ្តាថ្នាក់ដឹកនាំឥស្លាមរបស់ប្រទេសម៉ាឡេស៊ីនឹងជួបប្រជុំគ្នាដើម្បីសម្រេចរកស្តេចបន្ទាប់។
ប្រទេសម៉ាឡេស៊ីគឺមានរបបរាជាធិបតេយ្យអាស្រ័យរដ្ឋធម្មនុញ្ញជាមួយការរៀបចំតែមួយគត់ដែលរាជ្យបល្ល័ង្កត្រូវផ្លាស់ប្តូររាល់ប្រាំឆ្នាំម្តងរវាងមេដឹកនាំនៃរដ្ឋម៉ាឡេស៊ីទាំង៩ដែលដឹកនាំដោយរាជវង្សឥស្លាមអាយុកាលច្រើនសតវត្ស។
ប្រព័ន្ធនេះត្រូវបានដាក់ចាប់តាំងពីការទទួលឯករាជ្យភាពពីប្រទេសអង់គ្លេសក្នុងឆ្នាំ១៩៥៧។
ទោះបីជាយ៉ាងណាក៏ដោយ មន្ត្រីរាជវាំងមិនបានប្រាប់ហេតុផលណាមួយសម្រាប់ការសម្រេចព្រះទ័យរបស់ព្រះមហាក្សត្រ Sultan Muhammad ទី៥ទេប៉ុន្តែមានសំនួរអំពីការគ្រប់គ្រងរបស់ស្តេចអង្គនេះចាប់តាំងពីទ្រង់បានឈប់សម្រាទទួលការព្យាបាលកាលពីខែវិច្ឆិកា។
ហើយរហូតមកដល់ពេលនេះ មន្ត្រីរាជវាំងក្នុងប្រទេសម៉ាឡេស៊ីមិនបានធ្វើអត្ថាធិប្បាយអំពីពាក្យចចាមអារ៉ាមនៃការរៀបអភិសេកឬផ្តល់ព័ត៌មានលម្អិតអំពីស្ថានភាពសុខភាពរបស់ព្រះអង្គទេ។
ព្រះបរមរាជវាំងមិនបានចង្អុលបង្ហាញថានៅពេលណាទើបមេដឹកនាំឥស្លាមនឹងជួបប្រជុំគ្នាដើម្បីជ្រើសរើសស្តេចបន្ទាប់ទេ៕ AFP
Source: Kampuchea Thmey Daily
0 Comments