ភ្នំពេញ ៖ ដូចដែលមហាជនបានដឹងគ្រប់គ្នាហើយថា ដំណឹង នៃការទទួលមរណភាពរបស់តារាសិល្បៈជើងចាស់ដ៏មានសមត្ថភាព និងជាធនធានមនុស្សយ៉ាងសំខាន់ អ្នកគ្រូ គង់ ណារី គឺភ្លាមៗនោះ បានធ្វើឲ្យមហាជនគ្រប់មជ្ឈដ្ឋានពិសេសអ្នកសិល្បៈគ្រប់រូបមានការតក់ស្លុតក្នុងចិត្តខ្លាំង។
មិនតែប៉ុណ្ណោះ ក៏បានធ្វើទស្សនិកជនបង្ហាញពីអារម្មណ៍សោកសៅ ដោយភាពសោកស្តាយ និងក្រៀមក្រំបំផុតនូវការបាត់បង់អ្នកសិល្បៈជើងចាស់រូបនេះ។
មិនខុសគ្នាពីទស្សនិកជន និងអ្នកសិល្បៈឯទៀតនោះទេ សម្រាប់តារាចម្រៀង និងជាអតីតប្រធានសមាគមសិល្បករខ្មែរ២អាណត្តិ លោក សុះ ម៉ាច ក៏បានបង្ហាញពីអារម្មណ៍សោកសៅ និងក្រៀមក្រំបំផុតនៅពេលដែលទទួលបានដំណឹង នៃការស្លាប់របស់ អ្នកគ្រូ គង់ ណារី។ ម្យ៉ាងទៀត លោកបានចាត់ទុកថា មរណភាពរបស់អ្នកគ្រូ គង់ ណារី គឺជាការបាត់បង់នូវធនធានមនុស្សដ៏សំខាន់ម្នាក់លើផ្នែកវិស័យសិល្បៈបច្ចុប្បន្ន។
នាឱកាសអញ្ជើញចូលរួមពិធីបុណ្យសព និងគោរពវិញ្ញាណក្ខន្ធរបស់តារាជើងចាស់អ្នកគ្រូ គង់ ណារី តារាចម្រៀងចាស់វស្សា រក្សាបានប្រជាប្រិយភាពខ្ពស់ លោក សុះ ម៉ាច បានធ្វើការបញ្ជាក់ប្រាប់ទៅមហាជនបែបនេះថា ការបាត់បង់អ្នកគ្រូ គង់ ណារី ជាការបាត់មរតកធនធានសិល្បៈដ៏ធំធេង។
អ្នកគ្រូបានរួមចំណែកក្នុងការបណ្ដុះបណ្ដាលថ្នាលសិល្បៈ ដែលជាទំពាំងស្នងឫស្សីជាច្រើនទម្រង់ផងដែរ។
លោក សុះ ម៉ាច បានបន្ថែមទៀតថា ខ្ញុំបាទសូមចូលរួមសោកស្ដាយ និងរំលែកនូវទុក្ខដ៏ក្រៀមក្រំជាមួយនឹងក្រុមគ្រួសាររបស់អ្នកគ្រូ និងសូមបួងសួង សូមឲ្យដួងវិញ្ញាណក្ខន្ធអ្នកគ្រូបានដល់ឋាន សុគតិភពកុំបីខានឡើយ។ រូបកាយរបស់អ្នកគ្រូ នឹងរលាយចាកផុតពីភពផែនដីនៅម៉ោង៩យប់(ថ្ងៃទី២៣មករា)នេះហើយ។
សូមបញ្ជាក់ថា សាស្ត្រាចារ្យ គង់ ណារី ដែលជាគ្រូបង្ហាត់ចម្រៀងដ៏ល្បីមួយរូប នាទសវត្សរ៍៨០ បានទទួលមរណភាពនាវេលា ម៉ោង១និង០៥នាទីថ្ងៃត្រង់ ថ្ងៃទី២០ ខែមករា ឆ្នាំ២០១៩ ស្ថិតនៅមន្ទីរពេទ្យ ព្រះកុសុមៈ ហៅពេទ្យលោកសង្ឃ។ សពរបស់ អ្នកគ្រូ គង់ ណារី ត្រូវបានយកទៅតម្កល់នៅវត្តស្រះចក ខណ្ឌដូចពេញ ដើម្បីបូជាតាមប្រពៃណីនាយប់ថ្ងៃទី២៣មករា។
ជាការកត់សម្គាល់ភ្លាមៗ នៃការទទួលបានដំណឹងដ៏ក្រៀមក្រំនេះដែរ គឺមានសិល្បករ-សិល្បការិនី និងសិស្សរបស់អ្នកគ្រូជាច្រើនបានបង្ហាញអារម្មណ៍ក្ដុកក្ដួលនៅលើបណ្តាញសង្គមហ្វេសប៊ុកគ្រប់ៗគ្នា ដោយហេតុថា ការបាត់បង់អ្នកគ្រូ គង់ ណារី គឺស្មើនឹងការបាត់បង់បុគ្គលក៏មានតម្លៃម្នាក់ សម្រាប់បណ្ដុះបណ្ដាលសិល្បករជំនាន់ក្រោយ៕
Source: Kampuchea Thmey Daily
0 Comments