កំពង់ឆ្នាំង ៖ ក្នុងពេលថ្មីៗកន្លងមកនេះ នៅក្នុងព្រៃសហគមន៍ព្រៃឈើពោធិជ្រក ជម្រករិទ្ឌសែន មានជាង២០ហិកតា ដែលមានចម្ការដើមធ្នង់រាប់ម៉ឺនដើម ស្ថិតនៅក្នុងភូមិពោធិ ឃុំពោធិ ស្រុកកំពង់លែង អាជ្ញាធរមូលដ្ឋាន និងសហគមន៍ព្រៃឈើ កំពុងមានការព្រួយបារម្ភ ដោយបានដឹងថា មានជនមិនស្គាល់អត្តសញ្ញាណមួយក្រុម បានចុះបាញ់ថ្នាំសម្គាល់លើដើមឈើ ព័ទ្ធយកដីព្រៃចម្ការធ្នង់ និងដីព្រៃភ្នំ រាប់រយហិកតា ដោយស្នើសុំស្ថាប័ន និងជំនាញពាក់ព័ន្ធជួយចុះស្រាវជ្រាវ និងទប់ស្កាត់ជាបន្ទាន់ផង។
លោក សឿន លីត សមាជិកសហគមន៍ព្រៃឈើពោធិជ្រកជម្រករិទ្ធីសែននៅក្នុងភូមិពោធិ៍ ឃុំពោធិ៍ស្រុកកំពង់លែង នៅព្រឹកថ្ងៃទី២៣ ខែមករា ឆ្នាំ២០១៩ នេះ បាននាំក្រុមអ្នកកាសែតយើងចុះទៅក្នុងព្រៃចម្ការធ្នង់ ហើយបាននិយាយឲ្យដឹងថា នៅក្នុងអំឡុងពាក់កណ្ដាលខែតុលា ឆ្នាំ២០១៨កន្លងទៅលោកបានឃើញជនមិនស្គាល់អត្តសញ្ញាណមួយក្រុមបានជិះរថយន្តមួយគ្រឿង មកឈប់នៅក្នុងភូមិពោធិ ហើយបានបង្ហោះយន្តហោះដ្រូន ថតរូបនៅលើចម្ការដើមធ្នង់ក្នុងព្រៃសហគមន៍ បន្ទាប់មកពួកគេក៏បានចាកចេញទៅវិញបាត់។
ក្រោយមក នៅក្នុងខែវិច្ឆិកា ឆ្នាំ២០១៨ លោក និងមន្ត្រីនគរបាលប៉ុស្តិ៍រដ្ឋបាលពោធិ បានចុះពិនិត្យព្រៃចម្ការធ្នង់ ដែលគ្រប់គ្រងដោយសហគមន៍ ក៏បានឃើញមានគេបាញ់ថ្នាំពណ៌ស និងពណ៌ក្រហមតាមដើមធ្នង់ ចាប់ពីចំណុចព្រៃឈើក្រោយសាលាឃុំពោធិ៍ អូរថ្មទឹក ដានជើងតាព្រេង ភ្នំរបង រហូតដល់ថ្នល់ក្រ ហម ដែលមានប្រវែងដីរាប់គីឡូដីម៉ែត្រ និងមានទំហំប្រមាណរាប់សិបហិកតា ដែលគាត់ក៏មិនដឹងដែរថា តើគេបាញ់ថ្នាំតាមដើមធ្នង់ព័ទ្ធតាមព្រៃឈើខាងលើនេះ ក្នុងគោលបំណងអ្វីនោះឡើយ។
ទាក់ទងនឹងករណីខាងលើនេះ លោក សំ ចាន់ថន អភិបាលស្រុកកំពង់លែង នៅព្រឹកថ្ងៃទី២៣មករា នេះក៏បានឲ្យដឹងដែរថា លោកក៏បានដឹងព័ត៌មានដូចខាងលើនេះដែរ។ ករណីនេះ សហគមន៍ព្រៃឈើ ក៏ដូចជាប្រជាពលរដ្ឋ និងអាជ្ញាធរមូលដ្ឋាន ស្នើសុំមន្ត្រីជំនាញ និងស្ថាប័នពាក់ព័ន្ធមេត្តាចុះស៊ើបអង្កេតស្រាវជ្រាវ និងទប់ស្កាត់ជាបន្ទាន់ផង ដើម្បីវែកមុខជនល្មើស និងបង្ក្រាបការទន្ទ្រានយកដីព្រៃចម្ការធ្នង់របស់សហគមន៍ ព្រៃឈើរបស់រដ្ឋ នៅក្នុងឃុំពោធិ ស្រុកកំពង់លែង នេះឲ្យមានប្រសិទ្ធភាព។
ដោយឡែក លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង និងលោក ហោ ដារា មន្ត្រីខណ្ឌរដ្ឋបាលព្រៃឈើកំពង់ឆ្នាំង នៅល្ងាចថ្ងៃទី២៣មករានេះ បានឲ្យដឹងថា លោកក៏ទើបតែទទួលបានព័ត៌មានខាងលើនេះ នៅព្រឹកថ្ងៃទី២៣មករា នេះដែរ គឺនៅពេលក្រុមអ្នកកាសែតយើងសួរ តែមិនដឹងថារឿងនេះពិតជាកើតមានពិតមែន ឬយ៉ាងណានោះទេ។ ពេលនេះ លោកកំពុងចាត់មន្ត្រីជំនាញឲ្យចុះស៊ើបអង្កេត និងស្រាវជ្រាវជាបន្ទាន់ផងដែរ នៅក្នុងមូលដ្ឋាន ដើម្បីស្វែងការពិត និងរកមុខសញ្ញាជនសង្ស័យចំណាត់ការតាមផ្លូវច្បាប់៕
Source: Kampuchea Thmey Daily
0 Comments