បាត់ដំបង ៖ ជនរងគ្រោះម្នាក់ ដែលមាននាទីជាមន្ត្រីសឹករងស្រុកសំឡូត បានរងរបួសយ៉ាងធ្ងន់ធ្ងរ រហូតធ្លាយបែកកែងជើងម្ខាង ដែលមជ្ឈដ្ឋានខ្លះបាននិយាយថា ខណៈដែលមន្ត្រីយោធារូបនេះ ចេញប្រតិបត្តិការល្បាតតាមខ្សែបន្ទាត់ ព្រំដែន។
ករណីផ្ទុះគ្រាប់មីននេះ បានកើតឡើង កាលពីថ្ងៃទី២៣ ខែមករា ឆ្នាំ២០១៩ វេលាម៉ោង១១និង១៥ នាទីយប់ ត្រង់ចំណុចខាងមុខប៉ុស្តិ៍សារិកា ជិតខ្សែបន្ទាត់ព្រំដែន កម្ពុជា-ថៃ ស្ថិតក្នុងភូមិពាមតា ឃុំតាតោក ស្រុកសំឡូត ខេត្តបាត់ដំបង។
ជាក់ស្តែងនៅនឹងកន្លែងកើតហេតុ គេសង្កេតឃើញថា មានទាហានផ្នែកសឹករងស្រុកម្នាក់ ឈ្មោះ សាយ ពៅ ភេទប្រស អាយុ៤៥ឆ្នាំ រស់នៅភូមិពាមតា ឃុំតាតោក ស្រុកសំឡូត បានដើរជាន់ទៅលើគ្រាប់មីន ដែលគេសន្និដ្ឋានថា ជាប្រភេទមីនស្គរ បណ្តាលឲ្យផ្ទុះបែកធ្លាយកែងជើងខាងឆ្វេងម្ខាង។
បើតាមប្រភពមួយចំនួនផ្សេងទៀតបាននិយាយថា គេសង្ស័យមិនមែនជារឿងដើរល្បាតនោះទេ ព្រោះជិតពាក់កណ្ដាលអធ្រាត្រទៅហើយ ការដើរថ្មើរហ្នឹង ភាគច្រើនគឺអាចជាការដើរឆ្លុះសត្វ ឬក៏ដើររុករកបទល្មើសតាមខ្សែបន្ទាត់តែប៉ុណ្ណោះ។
ទោះបីជាយ៉ាងនេះក្តី ក៏បច្ចុប្បន្នជនរងគ្រោះ កំពុងត្រូវបានបញ្ជូនទៅសង្គ្រោះនៅមន្ទីរពេទ្យហើយ ដោយមិនទាន់ដឹងថា តើជើងម្ខាងនេះត្រូវកាត់ចោលដែរឬទេ?៕
Source: Kampuchea Thmey Daily
0 Comments