បាត់ដំបង ៖ ជនរងគ្រោះម្នាក់ បានស្លាប់ភ្លាមៗ ដែលសពស្ទើរមើលមិនយល់ ខណៈដែលបានចុះទៅកាប់ឫស្សីនៅក្នុងមាត់អូរ ហើយបានជាន់ទៅលើគ្រាប់មីនខ្យល់ ដែលជាប្រភេទមីនប្រឆាំងនឹងរថក្រោះ បណ្តាលឲ្យផ្ទុះឡើង ធ្វើឲ្យរាងកាយខ្ទេចខ្ទីស្ទើរគ្មានសល់។
ករណីនេះបានកើតឡើង កាលពីថ្ងៃទី២៣ ខែមករា ឆ្នាំ២០១៩ វេលាម៉ោង២និង២០នាទីរសៀល នៅចំណុច អូរតាចាន់ ស្ថិតនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង ចន្លោះពីភ្នំចម្បាំង ប្រមាណជាង៥០០ម៉ែត្រ ដែលបង្កជាសំឡេងលាន់ឮកក្រើកព្រះធរណី។
នៅក្នុងករណីផ្ទុះគ្រាប់មីននេះដែរ គឺគេសង្កេតឃើញថា មានមនុស្សម្នាក់បានស្លាប់ ពេលដែលគេចុះទៅកាប់ឫស្សីនៅមាត់អូរ ដែលជនរងគ្រោះមានឈ្មោះ សែម សារី ភេទប្រុស អាយុ៣៧ឆ្នាំ រស់នៅភូមិ/ឃុំ កើតហេតុខាងលើ។
លោកអធិការ សន និល បានបញ្ជាក់ថា ទីតាំងខាងលើនេះ កាលពីអតីតកាលគឺជាតំបន់សមរភូមិដ៏ក្តៅគគុក និងជាតំបន់ប្រទាញប្រទង់គ្នា រវាងកងទ័ពរដ្ឋាភិបាលជាមួយនឹងទ័ពខ្មែរក្រហមផងដែរ ដូច្នេះហើយបានជានៅតំបន់នេះ នៅមានសេសសល់គ្រាប់មីនប្រភេទនេះ ដែលគេហៅថា ប្រភេទមីនខ្យល់ សម្រាប់ប្រឆាំងរថក្រោះ និងរថពាសដែក។
បច្ចុប្បន្ន សព ត្រូវបានកម្លាំងសមត្ថកិច្ចចូលទៅយកមកប្រគល់ទៅឲ្យក្រុមគ្រួសាររួចហើយ ដើម្បីរៀបចំធ្វើបុណ្យ ហើយលោកអធិការក៏បានទាក់ទងទៅអង្គភាព ស៊ីម៉ាក់ ខេត្តដែរ ដើម្បីចុះស្រាវជ្រាវ និងរុករកយុទ្ធភណ្ឌមិនទាន់ផ្ទុះដែលនៅសល់ក្នុងតំបន់នេះ៕
Source: Kampuchea Thmey Daily
0 Comments