ភ្នំពេញ ៖ នៅថ្ងៃទី០៩ ខែមករា ឆ្នាំ២០១៩ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនចោរលួច០៤នាក់ ទៅតុលាការ ដើម្បីផ្ដន្ទាទោស ក្នុងនោះមាន០៣នាក់ជាចោរលួចម៉ូតូ និង០១នាក់ ជាចោរលួចអាគុយឡាន។
មន្ត្រីអាវុធហត្ថប្រាប់ឲ្យដឹងថា ជនសង្ស័យទាំង០៤នាក់នេះ ត្រូវបានសមត្ថកិច្ចអាវុធហត្ថ រាជធានីភ្នំពេញ ស្រាវជ្រាវ និងឃាត់ខ្លួនជាក់ស្ដែងបាន កាលពីថ្ងៃទី០៦ ខែធ្នូ ឆ្នាំ២០១៨ ១/ ឈ្មោះ ជុំ បូរ៉ា ភេទប្រុស អាយុ២៥ឆ្នាំ ,២/ ឈ្មោះ វណ្ណី នុត ហៅវិត ភេទប្រុស អាយុ១៧ឆ្នាំ ,៣/ឈ្មោះ លី មករា ភេទប្រុស អាយុ៣១ឆ្នាំ។
ពួកគេទាំង០៣នាក់នេះ ត្រូវបានកម្លាំងអាវុធហត្ថមូលដ្ឋានខណ្ឌមានជ័យ សហការជាមួយសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ ធ្វើការស្រាវជ្រាវ និងឃាត់ខ្លួនបាន កាលពីវេលាម៉ោង១៧និង៣០នាទី បន្ទាប់ពីពួកគេបានធ្វើសកម្មភាពលួចម៉ូតូ ០១គ្រឿង ម៉ាក MSX ពណ៌ស ស្លាកលេខ តាកែវ 1K-3226 ជារបស់ជនរងគ្រោះឈ្មោះ ចាន់ វាស្នា ភេទប្រុស អាយុ២៦ឆ្នាំ កាលពីថ្ងៃទី៣១ ខែធ្នូ ឆ្នាំ២០១៨ នៅចំណុច ក្នុងការដ្ឋានសំណង់មួយកន្លែង ភូមិដំណាក់ធំ១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
ចំណែក ជនសង្ស័យ ទី៤/ ឈ្មោះ សេន សាគី ភេទប្រុស អាយុ១៨ឆ្នាំ ត្រូវបានកម្លាំងល្បាតមូលដ្ឋានអាវុធហត្ថខណ្ឌសែនសុខ ឃាត់ខ្លួនបាន កាលពីវេលាម៉ោង១១ និង៣០នាទី នៅចំណុច ក្នុងការដ្ឋានមួយកន្លែង ភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បន្ទាប់ពីរូបគេ បានធ្វើសកម្មភាពលួចដោះអាគុយអាប៊ុលឈូសដី នៅក្នុងការដ្ឋានមួយកន្លែង ចំណុចខាងលើ ក្នុងពេលរូបគេធ្វើសកម្មភាពនោះ ស្រាប់តែមានកម្លាំងល្បាតមូលដ្ឋានអាវុធហត្ថខណ្ឌសែនសុខ ឃើញក៏ធ្វើការឃាត់ខ្លួនតែម្ដង៕
Source: Kampuchea Thmey Daily
0 Comments