កំពត ៖ ទោះបីឪពុកក្មេករបស់ខ្លួនបានស្លាប់ដែលសមត្ថកិច្ចសន្និដ្ឋានថា បណ្តាលមកពីជិះម៉ូតូប៉ះអ្នកថ្មើរជើង រួចដួលបោកក្បាលទៅនឹងថ្នល់ ដោយផ្តោតលើតឹកតាងគ្រប់គ្រាន់ក្តី រយៈពេលជិតមួយខែមកនេះ កូនប្រសាសព កំពុងចិញ្ចឹមចិត្តសង្ស័យលើករណីមានអ្នកធ្វើទារុណកម្ម ក្រោយគ្រោះថ្នាក់ចរាចរណ៍ ទើបបណ្ដាលឲ្យជនរងគ្រោះបាត់បង់ជីវិត។
បុរស ឈ្មោះ គាត ណុន អាយុ៣៥ឆ្នាំ រស់នៅភូមិលក ឃុំឫស្សីស្រុកខាងលិច ស្រុកកំពង់ត្រាច ខេត្តកំពតបានរៀបរាប់នារសៀលថ្ងៃទី២៣ ខែមករា ឆ្នាំ២០១៩ ថា កាលពីយប់ថ្ងៃ៣១ ខែធ្នូ ឆ្នាំ២០១៨ ឪពុកក្មេករបស់ខ្លួន ត្រូវបានគេប្រទះឃើញស្លាប់នៅលើដងផ្លូវក្នុងភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច។
សមត្ថកិច្ចសន្និដ្ឋានថា ការស្លាប់របស់គាត់បណ្ដាលមកពីជិះម៉ូតូប៉ះក្មេងស្រី រួចដួលបោកក្បាលនឹងផ្លូវថ្នល់។ ប៉ុន្តែខ្លួនមិនអស់ចិត្តសោះ ព្រោះជាធម្មតាគាត់មិនដែលបើកម៉ូតូលឿនទេ ហើយទំហំ នៃម៉ូតូខូចខុសគ្នានឹងស្លាកស្នាមរបួសក្បាលដែលនាំឲ្យគាត់ស្លាប់។ បុរសដដែលបានបន្តថា ចំណែកក្មេងស្រីមានរបួសលើខ្នង និងក្បាលតែបន្តិចបន្តួចប៉ុណ្ណោះ។ នេះអាចមកពីក្រោយកើតហេតុមានអ្នកធ្វើទារុណកម្មលើឪពុកក្មេករបស់ខ្លួន ទើបបណ្ដាលឲ្យគាត់ស្លាប់បែបនេះ។ ដូច្នេះសូមឲ្យសមត្ថកិច្ចស្រាវជ្រាវរឿងរ៉ាវឡើងវិញ។
ពាក់ព័ន្ធនឹងករណីខាងលើ លោក សេង សុគន្ធចាត់ អធិការនគរបាលស្រុកកំពង់ត្រាច បានបញ្ជាក់ថា ក្រោយកើតហេតុ ពោលគឺនៅព្រឹកថ្ងៃទី១ ខែមករា ឆ្នាំ២០១៩ កូនប្រសាសពបានទូរស័ព្ទមកលោក ដោយប្រាប់ថា សង្ស័យមកពីរឿងផ្សេង។ ក្នុងស្ថានភាពបែបនេះ លោកក៏បានឲ្យមន្ត្រីជំនាញបច្ចេកទេស នៃអធិការដ្ឋានស្រុកចុះធ្វើការងារយ៉ាងល្អិតល្អន់រហូតរកឃើញថា ករណីនោះបណ្តាលមកពីជនរងគ្រោះដួលម៉ូតូ រួចធ្លាក់បោកក្បាលទៅនឹងជង្ហុកនៅលើថ្នល់ដោយមិនមានអ្នកណាធ្វើទុកបុកម្នេញអ្វីលើគាត់ទេ។
លោកអធិការបានបញ្ជាក់ថា ក្រុមការងារបានស្រាវជ្រាវតាំងពីដំណើរដំបូង នៃថ្ងៃកើតហេតុ គឺបុរសរងគ្រោះជុំគ្នាផឹកស៊ីនៅផ្ទះមិត្តភ័ក្ដិតាំងពីព្រឹកព្រលឹមរហូតដល់យប់ ក៏ស្រវឹងទប់ខ្លួនស្ទើរមិននឹងទៅហើយ។ លុះពេលចាប់ផ្ដើមចេញពីវង់ផឹក មិត្តភ័ក្ដិគ្រប់គ្នាបានហាមឃាត់មិនឲ្យជិះម៉ូតូទេ តែគាត់មិនស្តាប់ឡើយ។
លោក សេង សុគន្ធចាត់ បានបន្តថា នៅក្បែរកន្លែងគ្រោះថ្នាក់នោះ ក៏មានផ្ទះរបស់អនុប្រធានប៉ុស្តិ៍នគរបាលរដ្ឋបាលម្នាក់ដែរ ដោយកាលកើតហេតុបានទាំងចូលទៅជួយ ហើយធ្វើសាក្សីពេលសមត្ថកិច្ចជំនាញចុះស្រាវជ្រាវតាមសំណូមពរសាច់ញាតិសពនោះផង។ ម្យ៉ាងទៀតក្រោយសន្និដ្ឋានអំពីមូលហេតុ នៃការស្លាប់បណ្តាលមកពីគ្រោះថ្នាក់ចរាចរណ៍នោះ សមត្ថកិច្ចបញ្ជាក់ថា បើមិនអស់ចិត្តចំពោះការស្រាវជ្រាវនេះ អធិការដ្ឋានស្រុកនឹងស្នើទៅស្នងការដ្ឋានដើម្បីបញ្ជូនសមត្ថកិច្ចជំនាញថ្នាក់ខេត្តចុះធ្វើការងារឡើងវិញ។ ថ្ងៃនោះក្រុមគ្រួសាររងគ្រោះ រួមទាំងសាមីខ្លួន ដែលកំពុងដាក់ការសង្ស័យលើករណីផ្សេងនេះ ក៏បានផ្តិតមេដៃយល់ព្រមថា ស្លាប់ដោយគ្រោះថ្នាក់ចរាចរណ៍ដែរ។
លោកអធិការបានសម្តែងការសង្ស័យថា ករណីនេះអាចក្នុងបំណងបំពុលបរិយាកាសសង្គមក៏ថាបាន។ សូមរម្លឹកថា កាលពីយប់ថ្ងៃទី៣១ ខែធ្នូ ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើង លើកំណាត់ផ្លូវជាតិលេខ៣៣ ស្ថិតក្នុងភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច បណ្តាលឲ្យបុរសម្នាក់បាត់បង់ជីវិតនៅនឹងកន្លែង។ ករណីនេះសមត្ថកិច្ចបញ្ជាក់ថា បុរសរងគ្រោះបានបើកម៉ូតូទាំងកំពុងស្រវឹង រួចរេចង្កូតប៉ះអ្នកថ្មើរជើងលើចិញ្ចើមផ្លូវបណ្ដាលឲ្យដួលបោកក្បាលស្លាប់ដោយខ្លួនឯងតែម្ដង៕
Source: Kampuchea Thmey Daily
0 Comments