រិទ្ធ ភូលូ អ្នកប្រដាល់ជើងខ្លាំងស្រករក្រោយកម្ពុជា ក្លិបថ្មគោលពោធិសែនជ័យ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃជើងចាស់Loom Leng ដោយប្រកួតគ្នាក្នុងទម្ងន់៦៣,៥០០ គ.ក្រ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
រិទ្ធ ភូលូ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃ១០លើក និងឡាវ២លើកប៉ុណ្ណោះ។ ដូច្នេះ លើកនេះជាលើកទី១១ ដែលគេជួបប្រកួតជាមួយថៃនោះ។ ក្នុងការជួបប្រកួតជាមួយថៃ១០នោះ ភូលូ វាយឈ្នះ៨ លើកនិងចាញ់ ២ លើកប៉ុណ្ណោះ។
ភូលូ មានប្រវត្តិប្រកួតប្រមាណ៥៩លើក ក្នុងនោះវាយឈ្នះ៤២លើក ចាញ់១៣ លើក និងស្មើ ០៤លើកហើយធ្លាប់ផ្ដួលគូប្រកួតឲ្យសន្លប់បានចំនួន១៨លើក។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ភូលូ អាចយកឈ្នះ Loom Leng បានឬក៏អត់នោះទេ?។
Loom Leng ជាជើងខ្លាំង និងជាម្ចាស់ខ្សែក្រវាត់ថែមទៀត។ គេមានស្នៀតទាត់ និងកណ្តាប់ដៃល្អ។ ដូច្នេះ រិទ្ធភូលូ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អ និងខ្លាំង។ តែបើអាចឈ្នះបាន គឺមានតែការវាយប្ដូរកែងមួយមុខគត់ ដែលប្រថុយដូរជាមួយនឹងជ័យជំនះ។ អ្នកប្រដាល់ថៃរូបនេះ មានប្រវត្តិប្រកួតចំនួន៧៨លើក ឈ្នះ៦៤លើក ចាញ់១៣លើក និង ស្មើ០១លើក។ ចាំមើល រវាងរិទ្ធ ភូលូ និង Loom Leng តើនរណាជាអ្នកឈ្នះនៅក្នុងការជួបគ្នានេះ?។
ចំពោះ ហេង សំរាំង អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្គូឲ្យជួបប្រកួតជាមួយអ្នកប្រដាល់ជនជាតិអ៊ីរ៉ង់ Matin។ សំរាំង អ្នកប្រដាល់ជើងចាស់របស់កម្ពុជា និងអ្នកប្រដាល់អ៊ីរ៉ង់នេះ ពួកគេទាំងពីរជួបប្រកួតគ្នាក្នុងទម្ងន់៧០គីឡូក្រាម។
ជាលើកទី៣ហើយ បន្ទាប់ពីរូបគេវិលមកកាន់សង្វៀនវិញ ហើយត្រូវគេផ្តល់ឱកាសឲ្យជួបប្រកួតជាមួយបរទេសនេះ។
ហេង សំរាំង ជាអ្នកប្រដាល់ជើងចាស់ធ្លាប់ហែលឆ្លងកាត់ប្រកួតជាមួយបរទេស ពិសេសជាមួយថៃ ច្រើនលើកណាស់មកហើយ កាលពីគេនៅមានឈ្មោះបោះសំឡេង។ តែពេលនេះ គេមិនដូចពីមុននោះទេ ដោយសារគេចាស់ ឡើងទម្ងន់ គួបផ្សំគេស្ទើរកម្ពស់ផង ធ្វើឲ្យការប្រកួតជាមួយបរទេស ពិបាកសង្ឃឹមឈ្នះ។
យ៉ាងណា ប៉ះជាមួយអ្នកប្រដាល់អ៊ីរ៉ង់ ដែលទើបប្រកួតបាន២១លើក ឈ្នះ១៧លើក ចាញ់០៤លើក ប្រហែលជាមិនពិបាកប៉ុន្មានឡើយ។ ប៉ុន្តែ ហេង សំរាំង ក៏ប្រហែលត្រូវប្រឈមការលំបាករឿងចាញ់កម្ពស់ហើយ ព្រោះអ្នកប្រដាល់រុស្សី មកលើកនេះ មានកម្ពស់ខ្ពស់ជាងប្រមាណជិត១តឹកឯណោះ គឺ១,៧៨ម៉ែត្រ ខណៈដែលខ្លួនគេកម្ពស់១,៧០ម៉ែត្រ។ តែយ៉ាងណា ដោយសារគេមានចិត្តប្រដាល់ធំនោះ សង្ឃឹមថា ហេង សំរាំង នឹងយកឈ្នះអ្នកប្រដាល់អ៊ីរ៉ង់បានមិនខាន។ សំរាំង មានកំណត់ត្រាប្រកួតចំនួន១០២លើក ឈ្នះ៧០លើក ចាញ់២៨លើក និងស្មើ០៤លើក។
Matin គេមិនធ្លាប់មកប្រកួតនៅកម្ពុជានោះទេកន្លងមក។ យ៉ាងណា អ្នកប្រដាល់អ៊ីរ៉ង់រូបនេះ គេខ្លាំងគួរសមដែរ ដោយសារគេជាម្ចាស់ខ្សែក្រវាត់។ យ៉ាងណា ប៉ះជាមួយហេង សំរាំង Matin ក៏មិនជាស្រួលប៉ុន្មានដែរ ព្រោះថា សំរាំង គេវាយបុកខ្លាំង កណ្ដាប់ដៃខ្លាំង ទម្ងន់ជើងក៏ធ្ងន់ដែរ។ តែយ៉ាងណា សំរាំង ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើ ហេង សំរាំង អាចយកឈ្នះអ្នកប្រដាល់អ៊ីរ៉ង់នេះបានឬអត់?៕
Source: Kampuchea Thmey Daily
0 Comments