ភ្នំពេញ ៖ នៅព្រឹកថ្ងៃទី២៤ ខែមករា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងជានាយឧត្តមសេនីយ៍ផុតលេខផ្កាយមាស៥ បានអញ្ជើញជាអធិបតីដ៏ខ្ពង់ខ្ពស់នៅក្នុងពិធីប្រារព្ធខួប២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ។ នៅក្នុងឳកាសនោះសម្តេចតេជោ ហ៊ុន សែន បានដាក់ចេញនូវអនុសាសន៍ចំនួន១០ចំណុចសម្រាប់បញ្ជាការដ្ឋានកងទ័ពជើងគោកយកទៅអនុវត្តឲ្យទទួលបានជោគជ័យ។
ពិធីអបអរសាទរខួបលើកទី ២០ឆ្នាំនេះគឺបានប្រារព្ធធ្វើឡើងនៅទីបញ្ជាការដ្ឋានកងទ័ពជើងគោកស្ថិតនៅតាមបណ្តោយផ្លូវជាតិលេខ៤ ក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
អនុសាសន៍ទាំងអស់របស់សម្តេចតេជោ ហ៊ុន សែន រួមមាន ៖ ទី១.ត្រៀមខ្លួនជាស្រេចការពារអធិបតេយ្យភាពជាតិ ឯករាជ្យជាតិបន្តអនុវត្តឲ្យបាននូវខឿនការពារជាតិប្រជាជន។ ខឿនការពារជាតិរបស់ប្រជាជនព្រោះកងទ័ពបានកើតចេញពីប្រជាជននិងធ្វើអ្វីៗដើម្បីសេចក្តីសុខរបស់ប្រជាជន។ ប្រជាជនគឺជាប្រភពជ្រើសរើសកងទ័ព ប្រជាជនគឺជាប្រភពនៃការគ្រប់គ្រងកម្លាំងទាំងកម្លាំងទ័ពនិងភស្តុភារនិងទាំងកម្លាំងគ្រប់យ៉ាងទាំងអស់។ ខឿនការពារជាតិរបស់ប្រជាជនគឺមិនសំដៅទៅលើកងទ័ពប៉ុន្មានម៉ឺននាក់ទេ ប៉ុន្តែសំដៅទៅលើថាមនុស្សម្នាក់គឺជាទៅកងទ័ពម្នាក់សម្រាប់ប្រជាជាតិរបស់យើង។ ដូច្នេះត្រូវបន្តអនុវត្ត នូវខឿនការពារជាតិរបស់ប្រជាជនដើម្បីធានាថា ប្រទេសរបស់យើងជាប្រទេសរួមរបស់ប្រជាជនមិនមែនជារបស់កងទ័ពឬរបស់អ្នកណាមួយនោះទេ។
ទី២.ត្រូវចូលរួមជាមួយកម្លាំងផ្សេងៗទៀតរក្សាសន្តិភាពធានាបានសន្តិសុខសណ្តាប់ធ្នាប់សង្គមចូលរួមអនុវត្តន៍នយោបាយភូមិឃុំមានសុវត្ថិភាពប្រយុទ្ធប្រឆាំងជាមួយអំពើចោរកម្មគ្រឿងញៀនជួញដូរមនុស្សនិងអំពើអសកម្មផ្សេងៗ។ ត្រូវធ្វើឲ្យប្រទេសរបស់យើងទៅជាប្រទេសដែលមានសុខសន្តិភាពពិតប្រាកដ។ ទោះបីតម្លៃណាក៏ដោយមិនឲ្យអ្នកណាមួយបំផ្លាញសុខភាពដែលយើងរកបានដោយលំបាក។
ទី៣.ខិតខំប្រយុទ្ធប្រឆាំងអំពើរភេវរកម្មទប់ស្កាត់អំពើប៉ុនប៉ងផ្តួលរំលំរាជរដ្ឋាភិបាលស្របច្បាប់តាមមធ្យោបាយមិនប្រជាធិបតេយ្យនិងផ្ទុយជាមួយរដ្ឋធម្មនុញ្ញ។កម្លាំងប្រដាប់អាវុធមានភារកិច្ចការពាររដ្ឋដូចនេះមិនមានពាក្យអព្យាក្រឹតជាមួយពួកឧទ្ទាមទាំងនោះទេទាំងក្នុងព្រៃនិងឧទ្ទាមទីក្រុង។ ត្រូវចងចាំឲ្យបានទី១ ប្រយុទ្ធប្រឆាំងអំពើភេរវកម្មគ្រប់ទម្រង់នៃភេរវកម្មដែលវាកំពុងគំរាមកំហែងពិភពលោកបច្ចុប្បន្ននេះមិនត្រូវឲ្យកម្ពុជាក្លាយទៅជាជម្រករបស់ក្រុមភេរវកម្មឬក៏ជាទីកន្លែងវាយប្រហារភេរវកម្មនោះទេ យើងក៏ត្រូវផ្ដល់នូវកិច្ចសហប្រតិបត្តិការជាមួយប្រទេសទាំងអស់នៅលើពិភពលោកដើម្បីរួមគ្នាប្រឆាំងនឹងអំពើភេរវកម្ម។
សម្តេចតេជោបានបន្តថា ពិតមែនតែកងទ័ពកម្ពុជាតូចតាច ប៉ុន្តែយើងមានសមត្ថភាពការពារជាតិរបស់យើងចំណុចនេះជាចម្លើយដែលយើងត្រូវចង់ប្រាប់ទៅពួកឧទ្ទាមទីក្រុង និង ឧទ្ទាមក្នុងព្រៃយើងមិនយល់ព្រមឲ្យអ្នកឯងមកផ្តួលរំលំរដ្ឋបានទេ។ សូម្បីនៅក្នុងប្រទេសបារាំងបច្ចុប្បន្នក៏បានដាក់ប្រកាសប្រទេសក្នុងគ្រាមានអាសន្នដើម្បីទប់ស្កាត់នៃចលនាអាវកាក់ពណ៌លឿងហេតុអ្វីបានជាបារាំងអាចធ្វើបានតែកម្ពុជាមិនអាចធ្វើបាន? ប្រទេសខ្លះប្រើកងទ័ពទៅដណ្ដើមយកអធិបតេយ្យភាពរបស់ប្រទេសដទៃ គេអាចធ្វើបានដោយគ្មានបញ្ហាទេតែសម្រាប់កម្ពុជាគ្រាន់តែការពារនូវសុខសន្តិភាព ការពារនូវរដ្ឋាភិបាលស្របច្បាប់ បែរជាមានឈ្មោះថាជាជនផ្តាច់ការវាមិនយុត្តិធម៌ទេនៅលើលោកិយនេះ។
ទី៤.កងទ័ពទាំងអស់ចូលរួមជាមួយកម្លាំងផ្សេងៗទៀតដើម្បីជួយដល់ប្រជាជនពិសេសពេលមានគ្រោះមហន្តរាយកងទ័ពជាកូនចៅប្រជាជននៅទីកន្លែងណាក៏ដោយត្រូវដឹងសុខទុក្ខប្រជាជនជួយដល់ប្រជាជនដែលជួបការលំបាកខិតខំធ្វើនូវកិច្ចការដែលយើងអាចធ្វើទៅរួចជួយដល់ប្រជាជនជាពិសេសប្រជាជនដែលមានជីវភាពក្រីក្រជួបការលំបាកចំនួនបានបង្ហាញច្បាស់អំពីធាតុពិតនៃកងទ័ពនោះក៏ជាផ្នែកមួយនៃខឿនការពារជាតិរបស់ប្រជាជនផងដែរ។ ដូច្នេះសូមអ្នកទាំងអស់ចាំឲ្យបានត្រូវជួយដល់ប្រជាជនហើយកុំធ្វើអោយប្រជាជនស្រក់ទឹកភ្នែកដោយសារតែទង្វើមិនគប្បីរបស់កងទ័ពត្រូវធ្វើឲ្យកងទ័ពរបស់យើងស្អាតស្អំឡើងហើយជួយដល់ប្រជាជននៅគ្រប់កាលៈទេសៈរួមសុខរួមទុក្ខជាមួយប្រជាជន។ នៅមុនពេលដែលកងទ័ពរបស់យើងត្រូវបញ្ជូនចេញទៅប្រទេសជប៉ុននៅឆ្នាំ ២០០៦ ខ្ញុំបានផ្តាំផ្ញើទៅកងទ័ពរបស់យើងថានៅពេលចេញទៅប្រទេសក្រៅប្រទេសត្រូវធ្វើភារកិច្ចដែលជួយដល់ប្រជាជននៅប្រទេសនោះ។ សូមផ្តាំផ្ញើពីទីនេះទៅកងទ័ពរបស់យើងដែលកំពុងរស់នៅស៊ូដង់ខាងត្បូងនៅលីបង់នៅម៉ាលី សូមជួយដល់ប្រជាជននៅទីនោះតាមលទ្ធភាពដែលអាចធ្វើទៅបាន។ កុំធ្វើឲ្យប៉ះពាល់ទៅដល់ទឹកចិត្តប្រជាជននៅក្នុងប្រទេសមួយដែលយើងទៅចូលរួមរក្សាសន្តិភាពនៅទីនោះ។
ទី៥.កងទ័ពត្រូវគាំទ្រកម្លាំងអនុវត្តច្បាប់ដើម្បីការការពារព្រៃឈើជលផលនិងធនធានធម្មជាតិដទៃទៀត។ កងទ័ពទាំងអស់ត្រូវចូលរួមរក្សាព្រៃឈើមិនត្រូវក្លាយទៅជាអ្នកកាប់ឈើឬជាអ្នកការពារឈ្មួញកាប់ឈើនោះទេ ចូលរួមរក្សានូវត្រីធនធានជលផលដ៏កម្ររបស់យើងមិនត្រូវចូលរួមជាមួយនឹងអំពើអសកម្មនានាទាក់ទងទៅវិស័យជលផលការធ្វើនេសាទដោយខុសច្បាប់នោះទេ។
ត្រូវចូលរួមថែរក្សាធនធានធម្មជាតិដទៃទៀតដែលមាននៅក្នុងព្រះរាជាណាចក្រកម្ពុជារបស់យើង។ ត្រូវហ៊ានដាក់ទោសទណ្ឌជាមួយអ្នកណាក៏ដោយស័ក្តិប៉ុណ្ណាក៏ដោយដែលធ្វើការឃុបឃិតឬក៏បំពានទៅលើបទបញ្ជាទាំងនោះ។ ធ្វើយ៉ាងដូច្នេះយើងក្លាយទៅជាអង្គភាពដែលគាំទ្រនៅអាជ្ញាធរមានសមត្ថកិច្ចអនុវត្តច្បាប់ទាំងច្បាប់ព្រៃឈើច្បាប់បរិស្ថាននិងច្បាប់ដទៃទៀតដែលទាក់ទងទៅនឹងការការពារសម្បត្តិធម្មជាតិ។
ទី៦.កងទ័ពគាំទ្រដល់ការប្រមូលចំណូលថវិកាជាតិទាំងថ្នាក់ជាតិទាំងថ្នាក់ក្រោមជាតិចំណុចនេះគឺជាចំណុចដែលគ្រប់អង្គភាពមិនថាតែកងកម្លាំងប្រដាប់អាវុធក្នុងក្របខ័ណ្ឌនៃកងកម្លាំងខេមរភូមិន្ទប៉ុណ្ណោះទេ តែកងកម្លាំងដទៃទៀតដូចជាកងនគរបាលជាតិក៏ត្រូវតែចូលរួមដើម្បីគាំទ្រឲ្យអង្គភាពប្រមូលចំណូលឲ្យថវិកាជាតិ។ ខិតខំទប់ស្កាត់ការរកស៊ីគេចពន្ធទប់ស្កាត់នូវឧក្រិដ្ឋកម្មឆ្លងដែនហើយត្រូវដាក់ទោសទណ្ឌចំពោះអ្នកដែលរកស៊ីខុសច្បាប់។ ការការពារអ្នករកស៊ីខុសច្បាប់វាបានផ្តល់ប្រយោជន៍ទៅតែមនុស្ស ២ ទៅ៣នាក់ ។ ក៏ប៉ុន្តែកងទ័ពរបស់យើងមានច្រើនម៉ឺននាក់ដូច្នេះនាយទាហាននាយទាហានរងនិងពលទាហានមិនត្រូវអត់ឱនឲ្យបុគ្គលមួយចំនួនតូចបំផ្លាញកិត្តិយសសេចក្តីថ្លៃថ្នូររបស់កងទ័ពនោះទេ។
ជាមួយនេះ សម្តេចក៏បានធ្វើការណែនាំទៅមន្ត្រីយោធាទាំងអស់ផងដែរថា ខ្លួនយើងក៏ត្រូវបំពេញកាតព្វកិច្ចពន្ធដែរដូចគ្នាអស់លោកមានលុយទិញឡានត្រូវខិតខំបង់ពន្ធឡានឲ្យរដ្ឋ ការមិនបង់ពន្ធឲ្យរដ្ឋវាជាការកាត់បន្ថយចំណូលរបស់ជាតិតើយើងបានលុយពីណាដូច្នេះត្រូវខិតខំពង្រឹងវប្បធម៌បង់ពន្ធដើម្បីឲ្យរដ្ឋាភិបាលមានប្រាក់សម្រាប់វិនិយោគទៅលើគម្រោងរបស់យើង។ ការអភិវឌ្ឍប្រទេសនេះ មិនមែនគ្រប់តែគំរោងសុទ្ធតែបានមកពីលុយបរទេសទេ។ គំរោងជាច្រើនគឺត្រូវបានអនុវត្តដោយថវិកាជាតិរបស់យើងផ្ទាល់តាមរយៈនៃការខិតខំប្រមូលចំណូលជាតិរបស់យើង។
ទី៧.ខិតខំពង្រឹងវិន័យកងទ័ពបង្កើនសមត្ថភាពលើគ្រប់ផ្នែកចំណុចនេះគឺជាចំណុចដ៏សំខាន់មួយដែលត្រូវតែយកចិត្តទុកដាក់ការហ្វឹកហ្វឺនត្រូវធ្វើជាប្រចាំគ្រប់មុខជំនាញទាំងអស់សម្ភារៈកាន់តែទំនើបបើមនុស្សមិនទំនើប គឺស្មើនឹងគ្មានសម្ភារៈទាំងនោះទេ អាវុធយុទ្ធភណ្ឌរបស់យើងពិតមែនតែថ្ងៃនេះមានមួយចំនួនមិនបង្ហាញមុខនៅទីនេះក៏ប៉ុន្តែបើទោះបីជានៅទីនេះបង្ហាញមុខក៏នៅតែមានការហ្វឹកហាត់ឲ្យស្ទាត់ជំនាញនៃការប្រើប្រាស់ដូចជាកាំជ្រួចបេអិម២១ជាដើម បើបាញ់ខុសមុំតែបន្តិចគ្រាន់វានឹងធា្លក់ខុសគោលដៅ។ តែខុស 1° ចេញពីចំណុចបាញ់ទៅវាខុសប៉ុន្មានគីឡូម៉ែត្រនៅឯគោលដៅពេលដែលវាធ្លាក់ទៅនោះ។
សម្តេចបានរំលឹកថា ខិតខំតស៊ូបង្ហូរញើសឈាមនៅទីលានហ្វឹកហាត់ គឺកាត់បន្ថយការហូរឈាមនិងការស្លាប់នៅទីលានប្រយុទ្ធ។ សម្តេចបានស្នើឲ្យពលទាហាននាយទាហានស្ដាប់ឲ្យបានហើយយកការផ្ដាំផ្ញើនេះទៅអនុវត្ត។ ជាមួយនេះសម្តេចក៏បានស្នើឲ្យមេទាហានទាំងអស់ខិតខំសម្រក់ក្បាលពោះ ព្រោះពោះរបស់អស់លោកកាន់តែធំហើយមិនថានាយទាហានថ្នាក់ណាទេហើយបើនៅឥណ្ឌូណេស៊ីអត់គ្រប់លក្ខណៈទេកាលណាមានប៉ូលិស ឬ ទាហានក្បាលពោះធំគេបញ្ចេញពីកងទ័ពភ្លាមគេមិនទុកឲ្យនៅដើរយួរក្បាលពោះចឹងទេ រកវិធីទម្លាក់ក្បាលពោះចុះបើមិនអញ្ចឹងទេតែយើងអាចលោតផ្លោះរបងបានទេ។ សម្តេចបន្តថា ឥឡូវនេះកងទ័ពស្រួលពេកហើយមិនដូចមុនកងទ័ពនាពេលមុនទេត្រូវដើរ២០ ទៅ ៣០ គីឡូដីក្នុងមួយថ្ងៃៗ។
ទី៨.ត្រូវយកចិត្តទុកដាក់ថែទាំយុទ្ធុបករណ៍ទាំងអស់ ដែលជាគ្រឿងបំពាក់របស់កងទ័ពរបស់យើងហើយត្រូវពិនិត្យវាជាប្រចាំ។ ចំណុចនេះសម្តេចបានដាស់តឿនចំពោះគ្រប់អង្គភាពទាំងអស់នៃកងកម្លាំងប្រដាប់អាវុធរបស់កម្ពុជាមិនថាជើងគោក ជើងទឹក ជើងអាកាស ឬ អង្គភាពជំនាញផ្សេងៗត្រូវតែថែទាំឲ្យបានគត់មត់ធានាថា យុទ្ធុបករណ៍របស់យើងនេះប្រើប្រាស់បានហើយចំគោលដៅទៀតនៅពេលដែលមានការចំបាច់កើតឡើង។
សម្តេចតេជោបន្តថា វាមិនមែនជាចម្ពាមកៅស៊ូទេនេះគឺជាកាំភ្លើងហើយទិញក្នុងតម្លៃច្រើនមែនតម្លៃថោកទេនៅទីនេះ។
ទី៩.ត្រូវយកចិត្តទុកដាក់ដល់ជីវភាពកងទ័ពជាពិសេសចំពោះតំបន់ដាច់ស្រយាលទាំងអស់ត្រូវតែមានការរៀបចំដើម្បីឲ្យកងទ័ពយើងមានគ្រប់លក្ខណៈសម្បត្តិនិងថែទាំសុខភាពជម្រកស្នាក់នៅទីកន្លែងនានាម្ហូបអាហារអ្វីៗក៏ត្រូវតែមើលកងទ័ពរបស់យើងពីចុងជើងដល់ក្បាលនិងពីក្បាលដល់ចុងជើងខ្ញុំអរគុណណាស់ដែលព្រឹត្តិការណ៍ក្រោយខែកក្កដាឆ្នាំ ២០០៨ នាយទាហានរបស់យើងបានប្រសិទ្ធនាមឲ្យខ្ញុំថាជាអគ្គភស្តុភារជាន់ខ្ពស់របស់កងទ័ព។
ទី១០.ជាចំណុចចុងក្រោយហើយក៏ជាចំណុចសំខាន់ណាស់ដែលកងទ័ពត្រូវដើរតួនាទីជាអ្នកការទូតក្នុងការកសាងទំនាក់ទំនងល្អជាមួយប្រទេសជិតខាងនិងកសាងទំនាក់ទំនងល្អជាមួយប្រទេសជាមិត្តទាំងអស់នៅលើពិភពលោកកងទ័ពពិតជាមានតួនាទីសំខាន់ណាស់ដើម្បីបង្កើតឡើងនូវបរិយាកាសល្អជាមួយប្រទេសជិតខាង។ ទំនាក់ទំនងល្អជាមួយប្រទេសជិតខាងនោះហើយបានធ្វើឲ្យទំនាក់ទំនងរវាងរដ្ឋនិងរដ្ឋក្នុងការធ្វើពាណិជ្ជកម្មវិនិយោគទេសចរណ៍បានប្រសើរឡើង។
ទំហំពាណិជ្ជកម្មរវាងកម្ពុជានិងវៀតណាម នៅតាមព្រំដែនដែលរកស៊ីជាមួយគ្នាគឺមានជិត ៥ ពាន់លានដុល្លារទំហំពាណិជ្ជកម្មរវាងយើងនិងថៃជាង ៦ ពាន់លានដុល្លារនេះ គឺពិតជាបានមកពីការមានទំនាក់ទំនងល្អរវាងកងទ័ពនៃប្រទេសជិតខាងគ្នាជាមួយថៃជាមួយវៀតណាមនិងជាមួយឡាវ។
នៅក្នុងឱកាសនេះដែរ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញផ្ដល់កិត្តិយសដ៏ខ្ពង់ខ្ពស់បំពាក់គ្រឿងឥស្សរិយយសជូនដល់អង្គភាព និងនាយទាហាន និងពលទាហានជាច្រើនរូប ដែលមានគុណបំណាច់ចំពោះជាតិមាតុភូមិកន្លងមកនៅក្នុងបរិយាកាសស្និទ្ធស្នាល និងរីករាយក្រៃលែង៕
Source: Kampuchea Thmey Daily
0 Comments