រតនគិរី ៖ មានការរិះគន់យ៉ាងច្រើននៅពេលដែលប្រធានមន្ទីរព័ត៌មានខេត្តរតនគិរីបានបង្ហោះរូបភាពអគារប៉ុស្តិ៍នគរបាលរដ្ឋបាលឃុំប៉ក់ញ៉ៃ ស្ថិតក្នុងភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ គ្មានមន្ត្រីនគរបាលនៅកន្លែងធ្វើការសូម្បីតែម្នាក់ ខណៈដែលប្រធានមន្ទីររូបនេះចុះទៅរកកម្លាំងប៉ុស្តិ៍ដើម្បីសុំការសហការ គ្រាដែលលោកដឹកនាំក្រុមការងារចុះពិនិត្យវិទ្យុសហគមន៍នៅក្នុងភូមិឡុំ ឃុំប៉ក់ញ៉ៃ ស្រុកអូរយ៉ាដាវ កាលពីថ្ងៃទី២ ខែមករា ឆ្នាំ២០១៩កន្លងទៅ នៅវេលាម៉ោង៣និង៣០នាទីរសៀល។
ភ្លាមនោះ លោកប្រធានមន្ទីរបានទាក់ទងតាមប្រព័ន្ធទូរស័ព្ទទៅលោកអធិការរងនគរបាលស្រុកអូរយ៉ាដាវម្នាក់ តែអធិការរងរូបនោះបានឆ្លើយយ៉ាងខ្លីថា លោកមិនមែនជាអ្នកទទួលខុសត្រូវខាងនគរបាលប៉ុស្តិ៍នោះទេ។
បើយោងតាមប្រភពពីប្រជាពលរដ្ឋដែលរស់នៅតំបន់នោះបានលួចបង្ហើបប្រាប់ឲ្យដឹងថា មេប៉ុស្តិ៍ឃុំប៉ក់ញ៉ៃនេះ មានឈ្មោះ ឌឹម ជឿន ដែលទើបតែមកកាន់តំណែងជាមេប៉ុស្តិ៍នៅពេលថ្មីៗនេះ។
មជ្ឈដ្ឋានទូទៅបានចោទជាសំណួរថា តើឲ្យប្រជាពលរដ្ឋសង្ឃឹមអ្នកណាបើកន្លែងផ្តល់សេវាសាធារណៈមិនមានមន្ត្រីនៅកន្លែងយ៉ាងនេះ? ហើយតើមានប៉ុស្តិ៍នគរបាលប៉ុន្មានដែលដូចប៉ុស្តិ៍នគរបាលរដ្ឋបាលឃុំប៉ក់ញ៉ៃនេះ បើសូម្បីតែលោក ប្រធានមន្ទីរព័ត៌មានចុះមកធ្វើការ ហើយសុំសហការ បែរជាមិនឃើញមានមន្ត្រី និងនាយប៉ុស្តិ៍នៅកន្លែងធ្វើការបែបនេះនោះ?៕
Source: Kampuchea Thmey Daily
0 Comments