ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថាសម្តេចបានកត់សំគាល់ឃើញថា ដោយសារទំនាក់ទំនងចំណងមិត្តភាពរវាងប្រទេសកម្ពុជា និងកូរ៉េ គឺមានការរីកចម្រើន ទាំងការផ្លាស់ប្ដូររវាងប្រជាជន និងប្រជាជន ក៏ដូចជាការផ្លាស់ប្ដូរពាណិជ្ជកម្មរវាងប្រទេសទាំងពីរផងដែរ។
សម្តេចក្រឡាហោម បានថ្លែងបន្តថា ក្នុងន័យនេះ សម្ដេចយល់ឃើញថា ពិតជាមានសារៈសំខាន់ណាស់ក្នុងការថែរក្សាចំណងមិត្តភាពរវាងប្រទេសទាំងពីរ ក្នុងការរក្សាសន្តិសុខ សណ្ដាប់ធ្នាប់ ជូនប្រជាជនទាំងពីរ ដែលបានធ្វើដំណើរចេញចូលប្រទេសទាំងពីរ។
សម្តេចថ្លែងយ៉ាងដូច្នេះ ក្នុងជំនួបទ្វេភាគីរវាង សម្ដេចក្រឡាហោម ស ខេង និងឯកឧត្ដម Nakyoung Oh ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជា ជួបសម្តែងការគួរសម និងពិភាក្សាការងារ នាថ្ងៃទី២៣ ខែមករា ឆ្នាំ២០១៩ នៅទីស្ដីការក្រសួងមហាផ្ទៃ គឺដើម្បីស្វែងយល់ អំពីកម្ពុជាឲ្យបានច្បាស់ក្នុងការអភិវឌ្ឍប្រទេសជាតិ និងធ្វើការគោរព អញ្ជើញ សម្ដេចក្រឡាហោម ស ខេង និងគណៈប្រតិភូកម្ពុជា ទៅពេញទស្សនកិច្ចផ្លូវការនៅសាធារណៈកូរ៉េ នាពេលខាងមុខ។
សម្ដេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែងជម្រាបបញ្ជាក់ប្រាប់ភ្ញៀវថា ក្រសួងមហាផ្ទៃ មានភារកិច្ចធំៗ២ ដើម្បីធ្វើការអភិវឌ្ឍសង្គមជាតិ ក្នុងនោះរួមមាន ការងារគ្រប់គ្រងរដ្ឋបាលថ្នាក់ក្រោមជាតិ និងវិស័យគ្រប់គ្រងសណ្ដាប់ធ្នាប់សន្តិសុខសាធារណៈក្នុងសង្គម។
ដូច្នេះដំណើរទស្សនកិច្ចរបស់ សម្ដេចក្រឡាហោម នៅសាធារណរដ្ឋកូរ៉េ គឺដើម្បីដឹកនាំគណៈប្រតិភូ ទៅសិក្សាស្វែងយល់បន្ថែម អំពីការដឹកនាំល្អៗ នៃការងារគ្រប់គ្រងរដ្ឋបាលដែនដីរបស់សាធារណរដ្ឋកូរ៉េ ដែលអនុវត្តបានជោគជ័យ ក្នុងការកែទម្រង់ប្រព័ន្ធដឹកនាំរដ្ឋបាលថ្នាក់ក្រោមជាតិរបស់កូរ៉េ។
ជាមួយគ្នានោះ ចំណុចទី២-ដែលសម្ដេចក្រឡាហោមចំណាប់អារម្មណ៍នោះ គឺ ការងារគ្រប់គ្រងលើវិស័យសន្តិសុខសណ្ដាប់ធ្នាប់របស់សាធារណរដ្ឋកូរ៉េ ដែលបានអនុវត្តបានជោគជ័យ។ ក្នុងចំណុចនេះ សម្ដេចបាន កត់សំគាល់ឃើញថា ដោយសារទំនាក់ទំនងចំណងមិត្តភាពរវាងប្រទេសកម្ពុជា និងកូរ៉េ គឺមានការរីកចម្រើន ទាំងការផ្លាស់ប្ដូររវាងប្រជាជន និងប្រជាជន ក៏ដូចជាការផ្លាស់ប្ដូរពាណិជ្ជរវាងប្រទេសទាំងពីរផងដែរ៕
Source: Kampuchea Thmey Daily
0 Comments