កណ្ដាល ៖ ស្នងការដ្ឋាននគរបាល ខេត្តកណ្ដាល ប្រើប្រាស់រយៈពេល៣ថ្ងៃ បំបែកសំណុំរឿងឃាតកម្មគិតទុកជាមុននៅស្រុកកណ្ដាលស្ទឹង ដោយចាប់បានជនដៃដល់ជាស្ត្រីម្នាក់ ខណៈគេចខ្លួនទៅពួនសំងំនៅខេត្តកំពង់ធំ។
ដោយមានបញ្ជាពី នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានកិច្ចសហការយ៉ាងស្អិតរមូត ជាមួយ ស្នងការដ្ឋាននគរបាលខេត្តកំពង់ធំ ផងនោះ កាលពីយប់ថ្ងៃទី១៦ .មករា. ២០១៩ លោកព្រះរាជអាជ្ញារងខេត្តកណ្តាល ឯក ស៊ុនរស្មី និង ឧ.ទោ អ៊ាវ ចំរើន ស្នងការនគរបាលខេត្ត កណ្តាល បានបញ្ជាឲ្យ ឧ.ត្រី រឿនណារា ស្នងការរងទទួលបន្ទុកព្រហ្មទណ្ឌដឹកនាំកម្លាំងជំនាញឡើងទៅខេត្តកំពង់ធំ ដោយផ្អែកតាមលទ្ធផលស្រាវជ្រាវរយៈពេល៣ថ្ងៃ ក្រោយហេតុការណ៍កើតឡើង នៅ ថ្ងៃទី១៤ ខែមករា ឆ្នាំ២០១៩ ចំណុចភូមិ ឃុំរកា ស្រុកកណ្ដាលស្ទឹងខេត្តកណ្ដាល ដើម្បីតាមចាប់ជនសង្ស័យ ដែលជាឃាតករត់គេចទៅកំពង់ធំសម្រេចបានដោយជោគជ័យនៅព្រឹក ថ្ងៃទី១៧ ខែមករា ឆ្នាំ២០១៩ រួមទាំងវត្ថុតាងជាច្រើន។
ជនសង្ស័យដែលចាប់ខ្លួនបាន ឈ្មោះ សុខ ចាន់ថា អាយុ៣៦ឆ្នាំ ភេទស្រី មុខរបរ នៅផ្ទះមានស្រុកកំណើតនៅភូមិបឹង ឃុំរកា ស្រុកកណ្ដាលស្ទឹង ខេត្តកណ្ដាល បច្ចុប្បន្នស្នាក់នៅក្នុងចំណុចភូមិឃុំកើតហេតុ។ រីឯជនរងគ្រោះ ត្រូវជនសង្ស័យប្លន់យកទ្រព្យសម្បត្តិឈ្មោះ ឈុន ទូ ភេទស្រី អាយុ៥៦ ឆ្នាំ កម្ពស់ ១៥២ ស.ម. មុខរបរ ចងការប្រាក់ មានស្រុកកំណើតនៅឃុំស្រែអំបិល ស្រុកបូទុមសាគរ ខេត្តកោះកុងសព្វថ្ងៃ មានទីលំនៅនៅភូមិបឹង ឃុំរកា ស្រុកកណ្ដាលស្ទឹងខេត្តកណ្តាល។ នៅចំពោះមុខសមត្ថកិច្ចជំនាញ ជនដៃដល់ រូបនេះ បានសារភាពថា ក្រោយពីខ្លួនមានបានជាប់ជំពាក់បំណុល លុយកាក់ អ្នកក្នុងភូមិជាមួយគ្នា និងលុយធនាគារ ខ្លួនពិបាកចិត្ត គេតាមមកទារលុយជាបន្តបន្ទាប់ ហើយបានគិតគម្រោងថាធ្វើយ៉ាងណារកប្រាក់យកមកដោះស្រាយបំណុលនេះក៏បានរៀបចំ ខ្សែអង្រឹង ប្រវែងកន្លះម៉ែត្រ ត្រៀមទុកក្នុងហោប៉ៅខោ ហើយរកឱកាស សម្លាប់ជនរងគ្រោះ។ បន្ទាប់ពីគិតរួចបានធ្វើដំណើរជិះម៉ូតូ មកផ្ទះជនរងគ្រោះនៅថ្ងៃកើតហេតុ ពេលថ្ងៃជិតត្រង់ ហើយគោះទ្វារ ហៅជនរងគ្រោះ ចូលទៅអង្គុយមើលទូរទស្សន៍ នៅក្នុងផ្ទះជាមួយជនរងគ្រោះព្រោះជាមនុស្ស រាប់អានគ្នា និយាយគ្នាពីនេះ ពីនោះខ្លះរួចមក ជនរងគ្រោះនាំជនសង្ស័យចូលមើលកម្រាលពូកថ្មី នៅក្នុងបន្ទប់ បានឱកាសមកដល់ជនសង្ស័យ ក៏យកខ្សែអង្រឹងដែលត្រៀមទុកស្រេច រឹតក វាយប្រតាយប្រតប់គ្នា ជាមួយជនរងគ្រោះនៅកន្លែងខាងក្នុងបន្ទប់ដេក ហើយជនរងគ្រោះដណ្ដើមបានខ្សែអង្រឹង ក៏រឹតកជនសង្ស័យវិញ។ ក្រោយរើបម្រាស់រួច ជនសង្ស័យ ក៏ រឹតកជនរងគ្រោះវិញ និងច្របាច់ក បន្ថែមរហូតដល់ជនរងគ្រោះលែងកម្រើក រួចខ្លួនអង្គុយសំងំ នៅខាងក្នុងបន្ទប់ ទាល់តែបាត់ហត់ ទើបបន្តសកម្មភាព យកខ្សែដៃ០១ ខ្សែ យកខ្សែក ០១ខ្សែ របស់ជនរងគ្រោះ ហើយដើរមកទាញថតទូជ័រ បើកឃើញកូនកាបូបដាក់លុយនៅក្រោមខោអាវ ដកយកតែលុយ ដុល្លារ ក្រដាស១០០ និងក្រដាស ៥០ ក្រដាស ២០ ខ្លះ ជាមួយ លុយខ្មែរ ដោយមិនបានរើ កកាយបើកទូឈើ និងបើកកាបូបខ្មៅ យួរដៃ របស់ជនរងគ្រោះទេ។ បន្ទាប់មកដើរគេចចេញតាមរបងខាងត្បូង ចេញមកផ្លូវ ហើយគេចខ្លួនសំដៅមក ស្រុកគងពិសី ខេត្តកំពង់ស្ពឺនិងបន្តទៅខេត្តតាកែវស្នាក់នៅបាន១យប់ទើបធ្វើដំណើរទៅខេត្តកំពង់ធំ ក៏ត្រូវសមត្ថកិច្ចចាប់ខ្លួនតែម្តង៕
Source: Kampuchea Thmey Daily
0 Comments