អតីតអភិបាលក្រុងហ្សាការតា ត្រូវបានដោះលែងពីពន្ធនាគារនៅថ្ងៃព្រហស្បតិ៍ បន្ទាប់ពីរយៈពេលជិត២ឆ្នាំក្រោយពេលគាត់ ត្រូវបានកាត់ទោសពីបទប្រមាថមើលងាយព្រះដែលជាហេតុជំរុញឲ្យមានការភ័យខ្លាចចំពោះការមិនអត់ឱនផ្នែកសាសនានៅក្នុងប្រទេស ដែលមានប្រជាជនមូស្លីមច្រើនជាងគេបំផុតនៅលើពិភពលោកមួយនេះ។
លោក Basuki Tjahaja Purnama ដែលជាអភិបាលរដ្ឋធានីមិនមែនជាជនមូស្លីមដំបូងគេនៅក្នុងរយៈពេលពាក់កណ្តាលសតវត្សរ៍និងជាមេដឹកនាំជនជាតិដើមភាគតិចចិនដំបូងគេគឺជាអ្នកនយោបាយដ៏មានប្រជាប្រិយភាពម្នាក់ដែលបានទទួលការកោតសរសើរសម្រាប់ការព្យាយាមរបស់គាត់ក្នុងការសម្អាតទីក្រុងដែលស្ទះចរាចរនិងការបង្ក្រាបអំពើពុករលួយ។
ប៉ុន្តែការដួលរលំរបស់គាត់បានកើតឡើងយ៉ាងឆាប់រហ័សបន្ទាប់ពីគាត់បញ្ចេញមតិយោបល់អំឡុងយុទ្ធនាការឃោសនាបោះឆ្នោតដែលគាត់ត្រូវគេចោទប្រកាន់ថាប្រមាថសាសនាឥស្លាម។
សុន្ទរកថារបស់គាត់បានបង្កការភ្ញាក់ផ្អើលតាមអ៊ីនធើណិតហើយបានបង្កឲ្យមានបាតុកម្មទ្រង់ទ្រាយធំនៅទីក្រុងហ្សាការតាដែលដឹកនាំដោយក្រុមរ៉ាឌីកាល់ប្រឆាំងនឹងមេដឹកនាំមិនមែនជនមូស្លីមរូបនេះនិងត្រូវបានលើកទឹកចិត្តដោយគូប្រជែងនយោបាយរបស់គាត់។
គាត់បានចាញ់ការបោះឆ្នោតក្រោមថ្វីដៃរបស់គូប្រជែងដែលជាអ្នកកាន់សាសនាឥស្លាមហើយបន្ទាប់មកគាត់ត្រូវបានកាត់ទោសឲ្យជាប់ពន្ធនាគាររយៈពេល២ឆ្នាំក្នុងខែឧសភាឆ្នាំ២០១៧។
វាជាការផ្តន្ទាទោសឃោឃៅខុសពីធម្មតាខណៈរដ្ឋអាជ្ញាបានផ្តល់អនុសាសន៍ចំពោះការព្យួរទោសសម្រាប់បុរសវ័យ៥២ឆ្នាំរូបនេះ។
ករណីរបស់គាត់បានទាក់ទាញចំណាប់អារម្មណ៍ជាអន្ដរជាតិនិងរលកនៃការរិះគន់រាប់បញ្ចូលទាំងពីអង្គការសហប្រជាជាតិផងដែរដែលបានជំរុញឲ្យប្រទេសដែលមានប្រជាជន២៦០លាននាក់មួយនេះត្រូវកែប្រែច្បាប់ប្រមាថសាសនាដែលមានអាយុកាលរាប់ទសវត្សរបស់ខ្លួន។
ច្បាប់ប្រមាថសាសនារបស់ប្រទេសឥណ្ឌូនេស៊ីបានចែងថា នរណាម្នាក់ដែលរកឃើញថាមានកំហុសពីបទ “បញ្ចេញមតិអរិភាព” ចំពោះសាសនាអាចជាប់ពន្ធនាគាររហូតដល់៥ឆ្នាំ៕ AFP
Source: Kampuchea Thmey Daily
0 Comments