ភ្នំពេញ ៖ អន្ទិតទើបតែសឹកពីបួសបានរងរបួសជើងស្តាំធ្ងន់ធ្ងរ បន្ទាប់ពីជិះម៉ូតូទៅលេងបងប្រុស មិនទាន់ដល់ផ្ទះផងជួបគ្រោះថ្នាក់ចរាចរណ៍ អ្វីដែលហួសចិត្តនោះគឺភាគីរថយន្ដបានទារសំណងពីអ្នកជិះម៉ូតូ១០០ដុល្លារ ដើម្បីជួសជុលរថយន្ដថែមទៀតព្រោះពេលភ្លាមៗនោះជនរងគ្រោះហាក់មិនទាន់ដឹងថា ឈឺទេតែបន្ដិចក្រោយមកស្រាប់តែរបួសឈឺខ្លាំងដួលនៅនឹងកន្លែងនិងឃើញឡានពេទ្យមក ទើបភាគីរថយន្ដបានហុចឲ្យ២០ម៉ឺនរៀល បើកឡានចេញទៅបាត់ កាលពីវេលាម៉ោង១០និង៤០នាទីព្រឹក ថ្ងៃទី១៧ ខែមករា ឆ្នាំ២០១៩ ស្ថិតនៅតាមផ្លូវជាតិលេខ៣ ភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិ៍សែនជ័យ។
ជនរងគ្រោះឈ្មោះ ពៅ សាវុធ ភេទប្រុស អាយុ២៦ឆ្នាំ ទើបតែសឹកពីបួសមិនទាន់បានមួយសប្តាហ៍ផង មានទីលំនៅភូមិ ព្រៃគុយ ឃុំគោកចក ស្រុកកំពង់ត្របែក ខេត្តព្រៃវែង។ ជនរងគ្រោះជិះម៉ូតូមួយគ្រឿងម៉ាក ហុងដាឌ្រីម សេ១២៥ ស៊េរី២០១៩ ពណ៌ខ្មៅ ពាក់ស្លាកលេខ កណ្តាល 1AC-7821។ ចំណែករថយន្តបង្ក ម៉ាក Chevrolet ពណ៌ខ្មៅ ពាក់ស្លាកលេខ ភ្នំពេញ 2R-2568 បើកបរដោយស្ត្រីម្នាក់ជាភរិយា របស់មន្ត្រីនគរបាលពន្ធនាគារ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ រថយន្តបើកពីជើងទៅត្បូង ដល់ចំណុចខាងលើ បត់ឆ្វេងត្រឡប់ក្រោយ ស្របពេលដែលជនរងគ្រោះជិះម៉ូតូពីជើងទៅត្បូងដែរ គេចមិនទាន់បុកជាមួយរថយន្តតែម្តង បណ្តាលឲ្យដួលរងរបួសជើងស្តាំ ម៉ូតូរងខូចខាតយ៉ាងដំណំ ចំណែករថយន្តដាច់ធ្លាក់កាងមុខ។
ក្រោយកើតហេតុភ្លាមៗ ជនរងគ្រោះមិនទាន់ដឹងថា ជើងខ្លួនឈឺកម្រិតណាទេនឹកថា មិនអីនិយាយសម្រួលគ្នាសុំរួចខ្លួនតែខាងរថយន្តមិនព្រម ចង់បានសំណងដែរ តែអស់មួយសន្ទុះត្រូវបានសមត្ថកិច្ចចុះទៅដល់ អាការៈចាប់ផ្តើមឈឺចុកពើតផ្សារ ដឹងខ្លួនថាមិនស្រួល ជនរងគ្រោះទាមទារ១០០ដុល្លារវិញ ដើម្បីមើលរបួសនិងជួសជុលម៉ូតូ តែភាគីខាងរថយន្តវិញនៅតែមិនព្រមព្រោះនៅចាំពាក្យជនរងគ្រោះមុនដំបូងថាស្មើគ្នា លុះគ្រាន់តែ ឃើញរថយន្តសង្គ្រោះមកដល់ ដឹងថា មិនសូវស្រួលជនរងគ្រោះកាន់តែឈឺខ្លាំងឡើងៗទើបបុរសជាប្តី បើកបររថយន្តបង្កចេញទៅបាត់ដោយហុចលុយ២០ម៉ឺនរៀលទៅឲ្យជនរងគ្រោះ រួចនាំគ្នារត់ឡើងឡានបើកចេញអស់ ព្រោះខ្លាចសងគេច្រើនទៀត។
ជនរងគ្រោះត្រូវបានរថយន្តសង្គ្រោះ ដឹកបញ្ជូនទៅសង្គ្រោះនៅមន្ទីរពេទ្យ ខណៈដែលភាគីខាងរថយន្តបើកឡានចេញទៅបាត់អស់ សល់តែម៉ូតូ សមត្ថកិច្ចប្រគល់ជូនក្រុមគ្រួសារយកទៅជួសជុលដោយខ្លួនឯង៕
Source: Kampuchea Thmey Daily
0 Comments