រតនគិរី ៖ កម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តចុះបង្ក្រាបករណីជួញដូរនិងប្រើប្រាស់ដោយខុសច្បាប់នូវសារធាតុញៀន(វិធីញុះញង់)និងឃាត់ខ្លួនមនុស្ស៣នាក់ជាបន្តបន្ទាប់។
ករណីចុះបង្ក្រាបគ្រឿងញៀននេះ ធ្វើឡើងកាលពីវេលាម៉ោង៣និង១០នាទីថ្ងៃអាទិត្យ ១កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី៦ ខែធ្នូ ឆ្នាំ២០១៩ ស្ថិតក្នុងភូមិអូរកន្ទិល សង្កាត់បឹងកន្សែង ក្រុងបានលុង។
មន្ត្រីនគរបាលគ្រឿងញៀនបានឲ្យដឹងថា ដោយមានការបញ្ជាផ្ទាល់ពីលោក ឧត្ដមសេនីយ៍ត្រី វ៉ាន់ សង្វាត់ ស្នងការរងផែនការងារប្រឆាំងបទល្មើសសេដ្ឋកិច្ចខេត្ត ដោយមានការសម្របសម្រួលពីលោក រ៉ាបូ រ៉ាន់ឌី ព្រះរាជអាជ្ញារងអមសាលាដំបូងខេត្ត បានធ្វើការឆែកឆេររកឃើញម្សៅក្រាម ពណ៌សថ្លា សង្ស័យសារធាតុញៀនមួយចំនួន បន្ទាប់ពីបានសាកសួរចម្លើយជនសង្ស័យម្នាក់និងបន្តឃាត់ខ្លួន២នាក់បន្ថែមទៀត។
មន្ត្រីនគរបាលគ្រឿងញៀនបានបន្តទៀតថា ជនសង្ស័យត្រូវឃាត់ខ្លួន ១.ឈ្មោះ ជាង ណាង ភេទប្រុស អាយុ៣៥ឆ្នាំ ជនជាតិខ្មែរ។ ២.ឈ្មោះ តាល់ ពឹង ភេទប្រុស អាយុ២៤ឆ្នាំ ជនជាតិខ្មែរ។ ៣.ឈ្មោះ ដួង សុភ័ណ្ឌ ភេទប្រុស អាយុ៣៦ឆ្នាំ ជនជាតិខ្មែរ។ ក្រោយពីបានឃាត់ខ្លួនធ្វើតេស្តទឹកនោមលទ្ធផលវិជ្ជមាន(+)ទាំង៣នាក់ផងដែរ។
ក្រោយការឃាត់ខ្លួនជនសង្ស័យទាំង៣នាក់បានដកហូតវត្ថុតាងរួមមាន ម្សៅក្រាម ពណ៌សថ្លា សង្ស័យសារធាតុញៀនចំនួន៥កញ្ចប់ធំ ទម្ងន់១១.២០ក្រាមទាំងសំបកថង់ទូរស័ព្ទដៃ ១គ្រឿងដាវសាំម៉ូរៃ ២ដើម ជញ្ជីងថ្លឹងថ្នាំញៀន ១គ្រឿង ម៉ូតូ ២គ្រឿង ថង់ច្រកថ្នាំញៀនមួយចំនួនធំ និងសម្ភារៈសេពថ្នាំញៀនមួយចំនួនធំទៀត។
បច្ចុប្បន្នជនសង្ស័យរួមទាំងវត្ថុតាង បានឃាត់និងរក្សាទុកបណ្ដោះអាសន្ននៅការិយាល័យជំនាញដើម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments