ភ្នំពេញ ៖ យោងតាមប្រសាសន៍លោកពេជ្រ កែវមុនី អភិបាលនៃគណៈអភិបាលខណ្ឌមានជ័យបានឲ្យកម្ពុជាថ្មីដឹងថា ជារៀងរាល់ថ្ងៃនេះកម្លាំងប្រជាការពារសាលាខណ្ឌមានជ័យទាំងអស់បានចុះរៀបចំសណ្តាប់ធ្នាប់និងសន្តិសុខតាមដងផ្លូវ ហើយក្នុងនោះពួកគាត់ក៏បានចូលរួមធ្វើអនាម័យទៀតផង។ អ្វីដែលបងប្អូនប្រជាការពារបំពេញភារកិច្ចចំពោះមុខនោះមានច្រើនណាស់ដូចជាចុះរៀបចំសណ្តាប់ធ្នាប់តាមដងផ្លូវ ចុះការពារសន្តិសុខជូនថ្នាក់ដឹកនាំដោយសហការជាមួយសមត្ថកិច្ចនិងចូលរួមចំណែកក្នុងការត្រួតពិនិត្យអាវុធជាតិផ្ទុះក៏ដូចជាចុះត្រួតពិនិត្យរដ្ឋបាលជាមួយសមត្ថកិច្ចនិងអាជ្ញាធរថែមទៀត។
លោកអភិបាលខណ្ឌមានជ័យបានបញ្ជាក់ថា ដោយសារតែបានឃើញសកម្មភាពបំពេញការងាររបស់បងប្អូនប្រជាការពារសាលាខណ្ឌដោយមិនត្អូញត្អែរ ឬ ប្រកាន់ពេលវេលាបែបនេះហើយ ទើបលោកអភិបាលខណ្ឌតែងតែនាំយកថវិកានិងអំណោយរួមមានគ្រឿងឧបភោគបរិភោគយកមកផ្តល់ជូនបងប្អូនប្រជាការពារសាលាខណ្ឌមានជ័យសរុប៥០នាក់ ដោយមិនឲ្យខ្វះខាតឡើយ។ ហើយក្នុងនោះលោកអភិបាលខណ្ឌក៏បានឧបត្ថម្ភអាហារជារៀងរាល់ថ្ងៃជូនដល់ពួកគាត់ដើម្បីជួយសម្រាលជីវភាពប្រចាំថ្ងៃ៕
Source: Kampuchea Thmey Daily
0 Comments