ភ្នំពេញ ៖ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជានិងជាប្រធានគណបក្សប្រជាជនកម្ពុជាបានប្តេជ្តាថានឹងមិនអនុញ្ញាតឲ្យមានប្រវត្តិសាស្ត្រសាដានកើតឡើងវិញឡើយនោះគឺការបែកបាក់ជាតិ ដែលកើតចេញពីមហិច្ឆតារបស់អ្នកនយោបាយដែលយកប្រជាជនធ្វើជាឧបករណ៍ដើម្បីសម្រេច ផលប្រយោជន៍ផ្ទាល់របស់ខ្លួនដោយពុំគិតដល់ជោគវាសនារបស់ជាតិ។
ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងបែបនេះទៅកាន់ជនរួមជាតិប្រមាណជាង ៦ម៉ឺននាក់នៅក្នុងមហាមិទ្ទីងរំលឹកខួបលើកទី៤០នៃទិវាជ័យជម្នះ៧មករាដែលបានប្រារព្ធធ្វើយ៉ាងមហាឡារឹកនៅពហុកីឡាដ្ឋានជាតិអូឡាំពេជ្រ នាព្រឹកថ្ងៃទី ៧ មករានេះ។
សម្តេចតេជោនាយករដ្ឋមន្ត្រីវបានលើកឡើងជម្រាបជូនជនរួមជាតិថា លើមូលដ្ឋាននៃកម្មវិធីនយោបាយដែលទទួលបាននូវការគាំទ្រដ៏កុះករពីសំណាក់ប្រជាពលរដ្ឋទូទាំងប្រទេសនៅក្នុងការបោះឆ្នោតនាខែកក្កដាឆ្នាំ២០១៨ កន្លងទៅរាជរដ្ឋាភិបាលកំពុងជំរុញអនុវត្តយ៉ាងសកម្មនូវ របៀបវារៈ អភិវឌ្ឍន៍ជាតិដ៏ស៊ីជម្រៅនិងទូលំទូលាយតាមរយៈយុទ្ធសាស្ត្រចតុកោណដំណាក់កាលទី៤ដែលសម្តេចបានដាក់ចេញដោយផ្ទាល់ដោយមិន ទុកឲ្យស្ថានភាពអាក្រក់ណាមួយមកបង្កជាឧបសគ្គរារាំងដល់ការសម្រេចនូវក្ដីប្រាថ្នារបស់យើងនោះឡើយ។
ជាមួយគ្នានេះរាជរដ្ឋាភិបាលបានបើកទូលាយនូវកិច្ចសន្ទនាដ៏ស្មោះសជាមួយបណ្ដាគណបក្សនយោបាយសង្គមស៊ីវិលនិងរាល់មជ្ឈដ្ឋានជឿនលឿនទាំងអស់សំដៅប្រមែប្រមូល គំនិតបញ្ញា និងធនធានមនុស្សពីគ្រប់ប្រភពដោយគ្មានការបែងចែករើសអើងដើម្បីបង្កើនកម្លាំងសរុបនៅក្នុងកិច្ចការកសាងនិងអភិវឌ្ឍជាតិ។
ភាពកក់ក្តៅសុខដុមរមនានិងការរីកចម្រើននៃសង្គមជាតិកើតចេញពីទឹកចិត្តចេះយោគយល់និងការចេះអធ្យាស្រ័យអត់ឱនឲ្យគ្នាទៅវិញទៅមករវាងគ្រប់និន្នាការនិងការចេះធ្វើការងារនិងការហ៊ានទទួលយកការរិះគន់ដើម្បីស្ថាបនានិងពីការគោរពប្រតិបត្តិច្បាប់ទាំងអស់គ្នា។ ប៉ុន្តែមានប្រវត្តិសាស្ត្រមួយដែលយើងមិនអាចឲ្យកើតមានសាដានឡើងវិញបានទេនោះគឺការបែកបាក់ជាតិមានប្រភពពីមហិច្ឆតារបស់អ្នកនយោបាយដែលយកប្រជាជនធ្វើជាឧបករណ៍ដើម្បីសម្រេចផលប្រយោជន៍ផ្ទាល់របស់ខ្លួនដោយពុំគិតដល់ជោគវាសនារបស់ជាតិ។
សម្តេចតេជោ ហ៊ុន សែន បានបង្ហាញជំនឿថា សង្គមកម្ពុជាមួយដែលមានលក្ខណៈសេរីបើកចំហនិងគោរពតម្លៃមនុស្សនិងផ្ដល់ថាមពលគ្មានកំណត់ដល់ការអភិវឌ្ឍសមត្ថភាពនិងការច្នៃប្រឌិតបង្កើតថ្មីរបស់បុគ្គលម្នាក់ៗក្នុងការចូលរួមស្ថាបនាជាតិជាពិសេសសម្រាប់ស្រទាប់យុវវ័យដ៏ច្រើនកុះករដែលបានទទួលការបណ្ដុះបណ្ដាលនៅគ្រប់កំរិតព្រមទាំងបានទទួលនូវមរតកស្នាដៃចំណេះដឹងគំនិតបញ្ញារួមជាមួយនឹងបទពិសោធន៍ពីអ្នកជំនាន់មុននិងដែលកំពុងបង្ហាញនូវភាពស្វាហាប់ក្នុងការបំពេញការងារគ្រប់ផ្នែកនៅទូទាំងប្រទេសទាំងក្នុងវិស័យសាធារណៈនិងវិស័យឯកជន។
ជាមួយនឹងការខិតខំពុះពារប្រឹងប្រែងឥតសំចៃកម្លាំងចិត្តប្រាជ្ញានិងស្មារតី។ យើងពិតជានឹងសម្រេចបាននូវគោលដៅដ៏ឧត្តុង្គឧត្តមនិងការកសាងកម្ពុជាឲ្យកាន់តែរីកចម្រើនក្លាយទៅជាប្រទេសជឿនលឿនមួយនិងជាសង្គមប្រកបដោយអរិយធម៌និងសេចក្ដីស្រលាញ់ដោយគ្មានការកើតឡើងជាថ្មីនៅសង្គ្រាមអំពើប្រល័យពូជសាសន៍និងការបែងបាក់ផ្ទៃក្នុងជាតិដូចពេលមុនទៀត។ ក្នុងស្មារតីនេះយើងប្ដេជ្ញាដាច់ខាតថែរក្សាឲ្យបានគង់វង្សនិងរឹងមាំនូវសុខសន្តិភាពនិងរាល់សមិទ្ធផលនៃការអភិវឌ្ឍដែលសម្រេចបានមកដោយលំបាកលំបិនជាមួយនឹងពលីកម្មដ៏ធំធេងមិនឲ្យកម្លាំងណាមកបំផ្លាញបានឡើយ។
សម្តេចតេជោនាយករដ្ឋមន្ត្រីបានបន្តថា មានសន្តិភាពទើបមានការអភិវឌ្ឍ មានការអភិវឌ្ឍខ្លាំងក្លាទើបធានាបានសន្តិភាព ស្ថិរភាព ចីរកាល៕
Source: Kampuchea Thmey Daily
0 Comments