ភ្នំពេញ ៖ ប្រមុខរាជរដ្ឋាភិបាលកម្ពុជាបានបង្ហាញនូវមោទនភាពចំពោះជោគជ័យដែលកម្ពុជាសម្រេចបានក្នុងរយៈពេល៤០ឆ្នាំកន្លងទៅនេះ អ្វីៗបានផ្លាស់ប្ដូរស្មានមិនដល់។ សម្តេចតេជោបានចាត់ទុកថាថ្ងៃ៧មករា ជាមហាជ័យជម្នះជាប្រវត្តិសាស្ត្រដែលបើកឡើងនូវទំព័រសករាជថ្មីនៃប្រវត្តិសាស្ត្រកម្ពុជាសម័យទំនើបដែលធ្វើឲ្យកម្ពុជាមានអ្វីៗគ្រប់បែបយ៉ាងនៅថ្ងៃនេះនឹងមាននូវការជឿជាក់ចំពោះអនាគតដ៏រុងរឿងរបស់ខ្លួន ដែលត្រូវបានកត់ត្រាទុកជារៀងរហូតនៅក្នុងការចងចាំរបស់ប្រជាជនកម្ពុជាគ្រប់ៗរូប គ្រប់ៗជំនាន់ ដែលស្រឡាញ់សន្តិភាព សេរីភាព និង យុត្តិធម៌។
នៅក្នុងមហាមីទិ្ទញរំលឹកខួបលើកទី៤០នៃទិវាជ័យជម្នះ៧មករា (៧.១.១៩៧៩ , ៧.១.២០១៩) នាព្រឹក ថ្ងៃទី០៧ ខែមករា ឆ្នាំ ២០១៩ នៅពហុកីឡដ្ឋានជាតិអូឡាំពិក ដែលមានអ្នកចូលរួមប្រមាណជាង៦ម៉ឺននាក់។ ប្រមុខរាជរដ្ឋាភិបាលកម្ពុជាបានលើកឡើងពីអត្ថន័យនៃថ្ងៃ ៧ មករា និង សមិទ្ធផលទាំង ឡាយដែលកើតចេញក្រោយថ្ងៃ ៧ មករា។
សម្តេចតេជោ ហ៊ុន សែន បានអះអាងថារយៈពេល ៤០ឆ្នាំកន្លងទៅនេះ អ្វីៗបានផ្លាស់ប្ដូរស្មានមិន ដល់បានផ្លាស់ប្តូរកម្ពុជាដែលត្រូវបានបំផ្លាញខ្ទេចខ្ទីអស់ទៅហើយនោះបានប្រឹងងើបឈរឡើងវិញ និងកំពុងបោះជំហានទៅមុខយ៉ាងស្វាហាប់លើមាគ៌ានៃសុខសន្តិភាព,ប្រជាធិបតេយ្យ,សហប្រតិបត្តិការនិងអភិវឌ្ឍន៍។
សម្តេចតេជោនាយករដ្ឋមន្ត្រីបានបន្តថាក្នុងរយៈពេល ៤០ ឆ្នាំមកនេះ បើទោះបីជាមានឧបសគ្គនិងការលំបាកធំប៉ុណ្ណាក៏ដោយក៏កម្ពុជានៅតែអាចពុះពារជម្នះបានដោយជោគជ័យធ្វើឲ្យប្រទេសជាតិទទួលបាននូវការផ្លាស់ប្ដូរជាជំហានៗ និងសម្រេចបាននូវសមិទ្ធផលធំៗ ជាបន្តបន្ទាប់លើគ្រប់វិស័យ ដែល សមិទ្ធផលទាំងនេះច្បាស់ណាស់អាចសម្រេចទៅបានអាស្រ័យដោយមានការដឹកនាំដ៏ត្រឹមត្រូវរបស់គណបក្សប្រជាជនកម្ពុជានិងកម្លាំងមហាសាមគ្គីរបស់ប្រជាជនយើងនៅទូទាំងប្រទេសព្រមទាំងការជួយឧបត្ថម្ភដ៏ស្មោះសរពីសំណាក់បណ្តាប្រទេសជាមិត្តមួយចំនួន។
សម្តេចតេជោបានបង្ហាញការប្រៀបធៀបថា កម្ពុជាកាលពី៤០ឆ្នាំមុននិងកម្ពុជាបច្ចុប្បន្ន។ ពីអតីតកាលកម្ពុជាត្រូវបានញាំញីនិងបំផ្លិចបំផ្លាញដោយសង្គ្រាមរ៉ាំរ៉ៃការបែកបាក់ជាតិនិងបែងចែកទឹកដីអសន្តិសុខគ្រប់ទីកន្លែង។ កម្ពុជាពីមុនដែលជាវាលពិឃាដគ្រប់ដណ្ដប់ដោយអំណាចផ្តាច់ការឧក្រិដ្ឋកម្មគួរឲ្យរន្ធត់បំផុតនៃរបបប្រល័យពូជសាសន៍។
កម្ពុជាពីមុនត្រូវគេប្រមាថមើលងាយត្រូវបានគេហ៊ុមព័ទ្ធនិងឯកោគាំងខាងនយោបាយសេដ្ឋកិច្ចកម្ពុជា។កម្ពុជាដែលពីមុនជាប្រទេសធ្លាប់ទទួលបាននូវកម្លាំងរក្សាសន្តិភាពរបស់អង្គការសហប្រជាជាតិ។ កម្ពុជាពីមុនជាប្រទេសអន់ថយបំផុតខាងផ្នែកសេដ្ឋកិច្ចគ្រប់ដណ្ដប់ដោយភាពក្រីក្រនិងមានកង្វះខាតស្បៀងអាហារយ៉ាងធ្ងន់ធ្ងរ។តែបច្ចុប្បន្នកម្ពុជាក្លាយជាប្រទេសដែលមានសន្តិភាពពេញលេញ។ កម្ពុជាបច្ចុប្បន្នបានក្លាយជាទឹកដីនៃសេរីភាពដែលមានការគោរពយ៉ាងខ្ជាប់ខ្ជួននូវគោលការណ៍នៃលទ្ធិប្រជាធិបតេយ្យ សេរីពហុបក្ស តាមរយៈការរៀបចំនៃការបោះឆ្នោតយ៉ាងទៀងទាត់ ដោយសេរី, ត្រឹមត្រូវ និងយុត្តិធម៌ ដែលគោរពគោលការណ៍ ច្បាប់ឥតងាករេ ហើយប្រជាជនគ្រប់រូបមានសិទ្ធិសេរីភាពស្មើគ្នានៅចំពោះមុខច្បាប់។ កម្ពុជាបច្ចុប្បន្នជារដ្ឋឯករាជ្យមួយដែលមានអធិបតេយ្យនិងបូរណភាពទឹកដីពេញលេញហើយកំពុងពង្រីកការធ្វើសមារណកម្មខ្លួនយ៉ាងសកម្ម ទៅក្នុងរចនាសម្ព័ន្ធ និងនិម្មាបនកម្មនៃតំបន់និងពិភពលោក ព្រមទាំងកំពុងបំពេញតួនាទីយ៉ាងសកម្ម ដោយស្មើភាព និងស្មើសិទ្ធិ ក្នុងរាល់កិច្ចការតំបន់និងអន្តរជាតិ។ កម្ពុជាបច្ចុប្បន្នបានក្លាយជាប្រទេសបញ្ជូនកងកម្លាំងរបស់ខ្លួន ទៅចូលរួមបេសកកម្មថែរក្សាសន្តិភាពរបស់អង្គការសហប្រជាជាតិនៅតាមបណ្តាប្រទេសជាច្រើនលើពិភពលោក។
កម្ពុជាបច្ចុប្បន្នបានក្លាយជាប្រទេសមួយនាំស្រូវអង្ករចេញធានាបានយ៉ាងគត់មត់នូវសន្តិសុខស្បៀង ហើយស្ថិតក្នុងចំណោម ប្រទេសដែលមានកំណើនសេដ្ឋកិច្ចខ្ពស់និងលឿនជាងគេលើពិភពលោកសម្រេចបាននូវវឌ្ឍនភាពដ៏ល្អប្រសើរក្នុងការកាត់បន្ថយភាពក្រីក្រនិងកែលម្អនៅសូចនាករផ្នែកសង្គមកិច្ច។
សម្រាប់អនាគតរបស់កម្ពុជា សម្រាប់គោលដៅអនាគត សម្តេចតេជោហ៊ុនសែនបានអះអាងថា សន្តិភាព សន្តិសុខនិងស្ថេរភាពនយោបាយបានបង្កើតឱកាសមាស ដែលពុំធ្លាប់មានដល់កម្ពុជាក្នុងការអភិវឌ្ឍសង្គម-សេដ្ឋកិច្ចឲ្យសម្រេចបានសមិទ្ធផលយ៉ាងធំធេងគួរជាទីមោទនៈក្នុងរយៈពេលជាង២ទសវត្សចុងក្រោយនេះ។ ជាមួយគ្នានេះកម្ពុជាទទួលបានជាចំណាត់ថ្នាក់ជាប្រទេសដែលមានកំណើនសេដ្ឋកិច្ចខ្ពស់ និងលឿនបំផុតលំដាប់ថ្នាក់ទី៦ លើពិភពលោក ដោយសម្រេចបានកំណើនជាមធ្យមជាង ៧ភាគរយ ក្នុង១ឆ្នាំ តាមរយៈការរីកចម្រើនក្នុង កម្រិតខ្ពស់ជាប់មិនដាច់ នៃវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ អចលនទ្រព្យ គមនាគមន៍ និងការដឹកជញ្ជូន។ ជាក់ស្ដែង ផលិតផលសរុបក្នុងស្រុក បានកើនពីប្រមាណ ៣.៦៤៩លានដុល្លារ នៅឆ្នាំ២០០០ ដល់ប្រមាណ ២៤.៦០៥លានដុល្លារ នៅឆ្នាំ២០១៨។ លើសពីនេះទៀត រចនាសម្ព័ន្ធសេដ្ឋកិច្ចជាតិកំពុងផ្លាស់ប្ដូរ ពីប្រទេសដែលពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកជាសំខាន់លើវិស័យឧស្សាហកម្ម និងសេវាកម្មវិញ។ ការកសាងផ្លូវ ស្ពាន បណ្ដាញអគ្គិសនី ទឹកស្អាត ប្រព័ន្ធធារាសាស្ត្រ មន្ទីរពេទ្យ សាលារៀន ត្រូវបានស្ថាបនាច្រើនស្អេកស្កះពាសពេញផ្ទៃប្រទេស។ ចំណែករោងចក្រ សហគ្រាស កសិដ្ឋាន មជ្ឈមណ្ឌលពាណិជ្ជកម្ម ផ្សារទំនើប អគារខ្ពស់ៗ។ល។ ត្រូវបានកសាង និងពង្រីកកាន់តែច្រើន ដែលបានផ្ដល់ការងារជូនប្រជាជនរាប់លាននាក់នៅគ្រប់ទិសទី។ កម្ពុជាក៏ត្រូវបានមជ្ឈដ្ឋានវិនិយោគិនក្នុងស្រុក និងក្រៅប្រទេស និងស្ថាប័នហិរញ្ញវត្ថុអន្តរជាតិនានាវាយតម្លៃថា ជាប្រទេសដែលមានបរិយាកាសល្អសម្រាប់ការវិនិយោគ និងធុរកិច្ច។ សម្រាប់រយៈពេលខ្លី និងមធ្យមខាងមុខ កម្ពុជារំពឹងថា នៅតែអាចសម្រេចបានកំណើនសេដ្ឋកិច្ចក្នុងរង្វង់ ៧ភាគរយ ក្នុងមួយឆ្នាំ និងធានាបាននូវស្ថិរភាពម៉ាក្រូសេដ្ឋកិច្ចរឹងមាំបន្តទៀត។ លើមូលដ្ឋាននៃសមិទ្ធកម្មវិស័យសេដ្ឋកិច្ចនេះ ជីវភាពរស់នៅរបស់ប្រជាពលរដ្ឋទូទៅ ក៏ទទួលបាននូវការកែលម្អកាន់តែប្រសើរឡើងជាលំដាប់ ប្រការនេះត្រូវបានឆ្លុះបញ្ចាំងតាមរយៈកំណើនមធ្យមសម្រាប់មនុស្សម្នាក់ពីប្រមាណ ២៨៨ដុល្លារនៅឆ្នាំ២០០០ ដល់ ១.៥៦៣ ដុល្លារនៅឆ្នាំ២០១៨។ អត្រានៃភាពក្រីក្រក៏បានធ្លាក់ចុះពីប្រមាណ ៥៣.២ភាគរយ នៅឆ្នាំ២០០៤ មកនៅត្រឹមប្រមាណ ១៣.៥ភាគរយ នៅឆ្នាំ២០១៤ ដែលត្រូវបានរំពឹងថា បន្តថយចុះមកនៅក្នុងរង្វង់ ១០ភាគរយ នាបច្ចុប្បន្ន។ សម្ដេចតេជោបានលើកឡើងថា កម្ពុជាបានឆ្លងកាត់ដោយជោគជ័យ ពីប្រទេសមានចំណូលទាប ក្លាយជាប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែងដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ស្របគ្នាជាមួយនឹងការកែប្រែដ៏មិននឹកស្មានដល់ក្នុងរយៈពេល៤០ ឆ្នាំនេះសម្ដេចតេជោ ហ៊ុន សែន បានស្នើឲ្យបងប្អូនជនរួមជាតិកម្ពុជាចាត់ទុកស្មារតី ៧មករា ឲ្យស្ថិតនៅជានិច្ចក្នុងដួងចិត្តរបស់យើង ដោយស្មារតី ៧ មករាគឺជាកម្លាំងយ៉ាងធំធេងដែលធ្វើឲ្យយើងយកឈ្នះបានលើគ្រប់ឧបសគ្គ និងការលំបាកសព្វបែបយ៉ាងក្នុងការកសាងនិងការពារមាតុភូមិ ស្មារតី ៧ មករាគឺសាមគ្គីភាព, វីរភាពនិងជ័យជម្នះ។
សម្តេចតេជោនាយករដ្ឋមន្ត្រីបានបន្តថា នៅក្នុងការដឹកនាំនាវាកម្ពុជាបន្តទៅមុខឆ្ពោះទៅរកត្រើយនៃគុណភាពកាន់តែរីកចម្រើន ស្របតាមចក្ខុវិស័យវែងឆ្ងាយរបស់ជាតិ យើងនឹងត្រូវរួមគ្នាពុះពារជំនះនូវបញ្ហាប្រឈមនឹងការលំបាក ស្មុគស្មាញជាច្រើនថែមទៀត ហើយក្នុងនាមជានាយករដ្ឋមន្ត្រីនៃកម្ពុជានិងជាប្រធានគណបក្សប្រជាជនកម្ពុជាដែលទទួល បានការគាំទ្រយ៉ាងទូលំទូលាយពីប្រជាជន សម្តេចដឹងច្បាស់អំពីទំនួលខុសត្រូវរបស់សម្ដេច ចំពោះប្រជាជាតិទាំងមូល គឺសម្តេចសន្យាថានឹង បន្តដំណើរការកែទម្រង់រដ្ឋស៊ីជម្រៅក្នុងគ្រប់វិស័យដែលផ្អែកលើសាមគ្គីភាព,គតិបណ្ឌិត, ទេពកោសល្យ, អង់អាចក្លាហាន និងសេចក្តីព្យាយាមដើម្បីជំរុញទៅមុខថែមទៀតលើការផ្លាស់ប្ដូរជាវិជ្ជមាននៅក្នុងសង្គមជាតិឆ្ពោះទៅរកភាពកាន់តែចម្រើនរុងរឿងនិងការលើកកម្ពស់ជីវភាពរស់នៅរបស់ប្រជាជនគ្រប់ស្រទាប់ជាន់ថ្នាក់ឲ្យកាន់តែប្រសើរឡើងឥតឈប់ឈរ៕
Source: Kampuchea Thmey Daily
0 Comments