ភ្នំពេញ ៖ តាំងពីព្រឹកព្រលឹមថ្ងៃទី ៧ ខែមករា ឆ្នាំ២០១៩ ប្រជាពលរដ្ឋ មន្ត្រីរាជការ សិស្ស និស្សិត កងកម្លាំងប្រដាប់អាវុធគ្រប់ប្រភេទប្រមាណជាង ៦ម៉ឺននាក់ បានធ្វើដំណើរយ៉ាងរួសរាន់ជាមួយទឹកមុខស្រស់ ស្រាយធ្វើដំណើរជាក្រុមៗបានមកជួបជុំគ្នានៅពហុកីឡដ្ឋានជាតិអូឡាំពិក ដើម្បីប្រារព្ធមហាមិទ្ទីងអបអរ ខួបអនុស្សាវរីយ៍លើកទី៤០នៃទិវាជ័យជម្នះ៧មករា (៧.១.១៩៧៩, ៧.១.២០១៩)។ កាលពី៤០ ឆ្នាំមុននៅថ្ងៃទី៧ខែមករាឆ្នាំ ១៩៧៩ របបប្រល័យពូជសាសន៍ប៉ុលពតត្រូវបានផ្តួលរំលំដោយកម្លាំងមហាសាមគ្គីជាតិនៃប្រជាជនយើងដែលបានក្រោកឈរប្រយុទ្ធយ៉ាងអង់អាចបំផុតដើម្បីសេរីភាព និង ការរស់រានមានជីវិតរបស់ខ្លួនក្រោមការដឹកនាំនៃរណសិរ្សសាមគ្គីសង្គ្រោះជាតិកម្ពុជា។ មហាជ័យជំនះជាប្រវត្តិសាស្ត្រនេះបានបើកឡើងនូវទំព័រសករាជថ្មីនៃប្រវត្តិសាស្ត្រកម្ពុជាសម័យទំនើបដែលធ្វើឲ្យយើងមានអ្វីអ្វីគ្រប់យ៉ាងនៅថ្ងៃនេះនឹងមាននូវការជឿជាក់ចំពោះអនាគតដ៏រុងរឿងរបស់ខ្លួន។ ទិវាជាប្រវត្តិសាស្ត្រនេះត្រូវបានកត់ត្រាទុកជារៀងរហូតនៅក្នុងការចងចាំរបស់ប្រជាជនកម្ពុជាគ្រប់គ្រប់រូបគ្រប់គ្រប់ជំនាន់ដែលស្រឡាញ់សន្តិភាពសេរីភាពនិងយុត្តិធម៌។
នៅម៉ោង ៧ គត់ប្រមុខរាជរដ្ឋាភិបាលកម្ពុជានិងជាប្រមុខគណបក្សប្រជាជនកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចអគ្គមហាពញាចក្រី ហេង សំរិន ប្រធានរដ្ឋសភានិង ជាប្រធានកិត្តិយសគណបក្សប្រជាជនកម្ពុជាបានស្ថិតនៅលើរថយន្តពណ៌ខ្មៅបើកដំបូងធ្វើដំណើរជុំវិញទីលានបាល់ទាត់ដើម្បីបង្ហាញការស្វាគមន៍សួរសុខទុក្ខចំពោះសមាជិកអង្គមិទ្ទីងជាមួយសម្លេង ជ័យឃោគ និង ការស្វាគមន៍ពីអង្គមិទ្ទីងទាំងមូល។
អង្គមិទ្ទីងបានចាប់ផ្តើមជាមួយរបាំផ្ការំដួលនៃយុទ្ធសាស្ត្រចតុកោណដែលបានបង្ហាញនូវទស្សនីយភាពដ៏រស់រវើកជាមួយបទចំរៀងដែលឆ្លុះបញ្ចាំងពីយុទ្ធសាស្ត្រចតុកោណ ដែលមានការចូលរួមសំដែងដោយសិល្បៈករ សិល្បៈការិនី ប្រមាណ ៦០០ នាក់មកពីសាលាភូមិន្ទវិចិត្រសិល្បៈ នៃក្រសួងវប្បធ៌ម និង វិចិត្រសិល្បៈ ។
មហាមិទ្ទីងនាពេលនេះមានវត្តមានដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងជាប្រធានគណបក្សប្រជាជនកម្ពុជានិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចអគ្គមហាពញាចក្រី ហេង សំរិន ប្រធានរដ្ឋសភានិងលោកជំទាវ ,សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ,សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងសមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល អង្គទូតនៃបណ្ដាប្រទេសជាមិត្តប្រចាំនៅកម្ពុជាមន្ត្រីរាជការ កងកម្លាំង ប្រដាប់អាវុធគ្រប់ប្រភេទ ភ្ញៀវជាតិ អន្តរជាតិ សិស្សានុសិស្ស និងប្រជាពលរដ្ឋយ៉ាងច្រើនកុះករ។ ដោយឡែកគេក៏សង្កេតឃើញមានវត្តមាននៃឧត្តមក្រុមប្រឹក្សាពិគ្រោះ និង ផ្តល់យោបល់ដែលជាគណបក្សដែលបានចូលរួមបោះឆ្នោតក្នុងឆ្នាំ២០១៨ ចូលរួមផងដែរ។ ចំណុចនេះបានបង្ហាញថាពួកគេបានទទួលស្គាល់ពីជ័យជម្នះ ៧មករា ដែលជាថ្ងៃផ្តល់កំណើតទី២ ដល់ប្រជាជនកម្ពុជា និង ដោយសារថ្ងៃ ៧ មករា នេះហើយទើបមានអ្វីៗនៅថ្ងៃនេះ ដែលនេះជាសច្ចធម៌ប្រវត្តិសាស្ត្រដែលពួកគេ ត្រូវតែទទួលស្គាល់ និង ចូលរួមអបអរសាទរ។
នេះជាលើកទី២ហើយដែលមានការរៀបចំទិវារម្លឹកថ្ងៃចងចាំរបស់ប្រជាជនកម្ពុជានេះជាលក្ខណៈទ្រង់ទ្រាយធំបន្ទាប់ពីកម្ពុជាត្រូវបានរំដោះខ្លួនពីការកាប់សម្លាប់ប្រល័យពូជសាសន៍ដោយរបបប៉ុលពត ក្នុង រយៈពេល ៣ ឆ្នាំ ៨ខែ និង២០ ថ្ងៃ។
សម្តេចតេជោនាយករដ្ឋមន្ត្រីកម្ពុជាបានថ្លែងសុន្ទរកថាដែលមានរហូតដល់ទៅ ១១ ទំព័រទៅកាន់អង្គពិធីដោយបានចាប់ផ្តើមថាថ្ងៃនេះយើងប្រារព្ធពិធីដ៏មហោឡារិកនេះឡើង ដើម្បីរំលឹកនូវការចងចាំមិនអាចបំភ្លេចបានចំពោះមហាឧក្រិដ្ឋកម្មដ៏សាហាវព្រៃផ្សៃបំផុតនៃរបបកម្ពុជាប្រជាធិបតេយ្យរបស់ពួក ប៉ុល ពត ដែលបានប្រព្រឹត្តមកលើមាតុភូមិនិងប្រជាជនកម្ពុជា ក្នុងស្មារតីគោរពដឹងគុណយ៉ាងជ្រាលជ្រៅចំពោះយុទ្ធជនយុទ្ធនារីនិងអ្នកស្នេហាជាតិទាំងឡាយដែលបានធ្វើពលីកម្មប្រកបដោយវីរភាពក្នុងការតស៊ូប្ដូររំលំរបបប្រល័យពូជសាសន៍និងការពារមិនឲ្យរបបនេះអាចវិលត្រឡប់មកកម្ពុជាជាថ្មីវិញបាន។ ព្រមជាមួយនេះយើងទាំងអស់គ្នាសូមលំឱនកាយវាចាចិត្តគោរពដល់វិញ្ញាណក្ខន្ធរបស់ជនរួមជាតិរាប់លាននាក់ដែលត្រូវបានសម្លាប់យ៉ាងអយុត្តិធម៌បំផុតនៅក្នុងរបបដ៏យង់ឃ្នងនាពេលនោះ ហើយឧទ្ទិសបួងសួងសូមឲ្យដួងវិញ្ញាណក្ខន្ធរបស់លោកអ្នកទាំងអស់នោះបានទៅកាន់សុគតិភពជារៀងដរាប។
សម្តេចតេជោនាយករដ្ឋមន្ត្រីក៏បានថ្លែងអំណរគុណដ៏ជ្រាលជ្រៅចំពោះបណ្ដាប្រទេសជាមិត្តជិតឆ្ងាយ និង សហគមន៍អន្តរជាតិដែលបានគាំទ្រនិងផ្ដល់ជំនួយឧបត្ថម្ភសព្វបែបយ៉ាងដល់កម្ពុជាតាំងពីគ្រាលំបាកបំផុតរហូតមកដល់បច្ចុប្បន្ន។ ប្រាកដណាស់រាល់សមិទ្ធផលដែលកម្ពុជាសម្រេចបានក្នុងរយៈពេល ៤០ ឆ្នាំមកនេះគឺមិនអាចកាត់ផ្ដាច់ពីការជួយឧបត្ថម្ភដ៏សប្បុរសពីសំណាក់បណ្តាប្រទេសជាមិត្តភាក់និងដៃគូអន្តរជាតិបានឡើយ។ ជាមួយនឹងការដឹងគុណនេះកម្ពុជាប្ដេជ្ញាបន្តផ្ដល់សារសំខាន់ខ្ពស់ដល់ការពង្រឹងនិងពង្រីកចំណងមិត្តភាពនិងកិច្ចសហប្រតិបត្តិការល្អជាមួយបណ្តាប្រទេស និងសហគមន៍អន្តរជាតិក៏ដូចជាដល់ការជំរុញសមាហរណកម្មខ្លួនទៅក្នុងតំបន់និងពិភពលោកដើម្បីលើកកម្ពស់ការអភិវឌ្ឍសេដ្ឋកិច្ចនិងសង្គមកម្ពុជាផ្ទាល់ផង និង ដើម្បីបង្កើនការចូលរួមដ៏សកម្មរបស់កម្ពុជានៅក្នុងបុព្វហេតុសន្តិភាព សន្តិសុខ ស្ថិរភាព វឌ្ឍនភាពនិងវិបុលភាពនៃតំបន់និងពិភពលោកផង។ ក្នុងស្មារតីនេះរាជរដ្ឋាភិបាលសង្ឃឹមថាដៃគូបរទេសមួយចំនួនដែលអាចមានបុរេវិនិច្ឆ័យមិនត្រឹមត្រូវចំពោះកម្ពុជានិងស្វែងយល់ឲ្យបានច្បាស់អំពី សភាពការណ៍នៅកម្ពុជាក៏ដូចជាអំពីបំណងប្រាថ្នារបស់ប្រជាជនកម្ពុជាហើយចូលរួមប្រកបដោយភាពស្ថាបនានិងសុឆន្ទៈពិតៗដល់ការពង្រឹងសន្តិភាពនិងការអភិវឌ្ឍលទ្ធិប្រជាធិបតេយ្យនិងនីតិរដ្ឋនៅកម្ពុជា។
សម្តេចតេជោបានគួរបញ្ជាក់ថា ជាការពិតជ័យជំនះ ៧ មករា ១៩៧៩ សម្រេចបានមកដោយឈរលើមូលដ្ឋាននៃការគួបផ្សំយ៉ាងស្អិតរមួតរវាងកម្លាំងពីរគឺកម្លាំងមហាសាមគ្គីជាតិរបស់កម្ពុជាក្រោមការដឹកនាំរបស់គណបក្សប្រជាជនកម្ពុជានិងការជួយឧបត្ថម្ភយ៉ាងធំធេងទាន់ពេលនិងមានប្រសិទ្ធភាពពីសំណាក់កងទ័ពស្ម័គ្រចិត្តវៀតណាម។ បើគ្មានការគួបផ្សំនៃកម្លាំងទាំងពីរនេះទេគឺពិតជាមិនអាចមានជ័យជំនះ ៧ មករា ១៩៧៩ បានឡើយ។
សម្តេចតេជោនាយករដ្ឋមន្ត្រីក៏បានរំលេចអំពីប្រវត្តិសាវតានៃការតស៊ូរំដោះប្រទេសចេញពីរបបប្រល័យពូជសាសន៍ប៉ុលពត នៅថ្ងៃ ៧ មករា ១៩៧៩។ ដោយបញ្ជាក់ថា ទឹកដីកម្ពុជាដែលត្រូវបានទទួលស្គាល់ថា ជាកោះសន្តិភាពក្នុងទសវត្សរ៍ឆ្នាំ ១៩៦០ បានចាប់ផ្តើមធ្លាក់ទៅក្នុងភ្លើងសង្គ្រាមពេញទំហឹងបន្ទាប់ពីពួក លន់ នល់ បានធ្វើរដ្ឋប្រហារផ្តួលរំលំរបបសង្គមរាស្ត្រនិយមដែលដឹកនាំដោយព្រះកុរណា សម្តេចព្រះនរោត្តម សីហនុ នៅថ្ងៃទី១៨ ខែមីនា ឆ្នាំ១៩៧០ តាមខ្សែញាក់របស់បរទេស។ នៅថ្ងៃទី១៧ ខែមេសា ឆ្នាំ១៩៧៥ របបសាធារណរដ្ឋខ្មែរ លន់ នល់ ត្រូវបានផ្តួលរំលំ ពេលនោះប្រជាជនកម្ពុជាសង្ឃឹមថានឹងបានរស់នៅក្នុងសុខសន្តិភាព ហើយចាប់ផ្តើមស្តារ និងកសាងទឹកដីរបស់ខ្លួនឡើងវិញ។ ប៉ុន្តែពួក ប៉ុល ពត បានឆក់ប្លន់យកទាំងស្រុងនូវសមិទ្ធផលជ័យជម្នះនេះបង្កើតឡើង របបកម្ពុជាប្រជាធិបតេយ្យដែលបានអនុវត្តន៍នយោបាយប្រល័យពូជសាសន៍ដ៏យង់ឃ្នងបំផុត ដែលពុំធ្លាប់មាន ក្នុងប្រវត្តិសាស្ត្ររបស់មនុស្សជាតិ ធ្វើឲ្យទឹកដីកម្ពុជាទាំងមូល ក្លាយជាគុកឥតជញ្ជាំង និងជាវាលពិឃាដជោកជាំដោយឈាម និងទឹកភ្នែករបស់ប្រជាជនកម្ពុជា។ ប្រជាជនត្រូវពួកឃាតករប្លន់យកអស់នូវសិទ្ធិសេរីភាពក្លាយជាទាសកររស់ដូចសត្វធាតុក្នុងភាពភ័យរន្ធត់ រកទីបំផុតគ្មាន។ សង្គមកម្ពុជាត្រូវក្រឡាប់ចាក់រចនាសម្ព័ន្ធសង្គមជាតិទាំងមូលត្រូវបំផ្លាញដល់ឫសគល់ប្រជាជនប្រមាណជាង៣លាននាក់ ត្រូវសម្លាប់យ៉ាងអាណោចអាធ័ម និងអយុត្តិធម៌បំផុត។ ឯអ្នកដែលនៅសេសសល់ក្នុងប្រទេសគឺរស់ក្នុងសភាពបារម្ភដល់អាយុជីវិតទាំងយប់ទាំងថ្ងៃរស់នៅប្រចាំថ្ងៃហាក់ដូចត្រីក្នុងត្រក មិនដឹងពេលណាដល់វេនខ្លួន ត្រូវពួកវាយកទៅសម្លាប់។ ពិតប្រាដកណាស់ បើគ្មានការជួយសង្គ្រោះឲ្យបានទាន់ពេលវេលាទេនោះ ប្រជាជនកម្ពុជា នឹងត្រូវពួកឃាតករបន្តកាប់សម្លាប់រកទីបញ្ចប់គ្មានឡើយ។ នៅក្នុងកាលៈទេសៈគ្រោះមហន្តរាយដ៏ធ្ងន់ធ្ងរបំផុតនេះ បណ្តាកម្លាំងអ្នកស្នេហាជាតិដ៏បរិសុទ្ធនៃគណបក្សប្រជាជនកម្ពុជា ដែលនៅសេសសល់ពីការកាប់សម្លាប់បានផ្តាច់ខ្លួនចេញពីរបប ប៉ុល ពត ដើម្បីធ្វើការតស៊ូសង្គ្រោះជាតិពីរបបដ៏យង់ឃ្នងនេះ។
ក្នុងដំណើរឆ្ពោះទៅការសង្គ្រោះជាតិប្រវត្តិសាស្ត្របានកត់ត្រាទុកនូវព្រឹត្តិការណ៍សំខាន់ៗដែលមានអត្ថន័យយ៉ាងជ្រាលជ្រៅបំផុតចំពោះជាតិ។ នៅថ្ងៃទី២០ ខែមិថុនា ឆ្នាំ១៩៧៧ សម្តេច ហ៊ុន សែន បានចេញដំណើរភៀសខ្លួនទៅប្រទេសវៀតណាម ដើម្បីស្វែងរកការជួយឧបត្ថម្ភក្នុងការតស៊ូរំដោះជាតិ, នៅថ្ងៃទី១២ ខែឧសភា ឆ្នាំ១៩៧៨ កងកម្លាំងប្រដាប់អាវុធសង្គ្រោះជាតិកម្ពុជា ដែលជាអង្គភាពទ័ពរៀបចំដំបូងត្រូវបានបង្កើតឡើង នៅថ្ងៃទី២៥ ខែឧសភា ឆ្នាំ១៩៧៨ កងទ័ព និងប្រជាជននៅភូមិភាគបូព៌ាបានក្រោកឈរប្រឆាំង និងរបប ប៉ុល ពត ក្រោមការដឹកនាំរបស់ សម្តេច ហេង សំរិន និង សម្តេច ជា ស៊ីម ព្រមទាំងចលនាតស៊ូប្រឆាំង ប៉ុល ពត ដែលមានរួចមកហើយនៅខេត្តកោះ កុង នៅឦសានទិស និងចលនាផ្សេងៗទៀត។ ផ្តើមពីចលនាទាំងនេះ បានផ្តល់ឱកាសដល់ការបង្កើតរណសិរ្សសាមគ្គីសង្គ្រោះជាតិកម្ពុជា នាថ្ងៃទី២ ធ្នូ ឆ្នាំ១៩៧៨ ដឹកនាំដោយ សម្តេច ហេង សំរិន សម្តេច ជា ស៊ីម សម្តេច ហ៊ុន សែន និងឥស្សរជនចំនួន១១រូបទៀត ដែលជា អង្គការចាត់តាំងនយោបាយតែមួយគត់របស់ប្រជាជនកម្ពុជា ដើម្បីដឹកនាំការតស៊ូផ្តួលរំលំរបបប្រល័យពូជសាសន៍។ រណសិរ្សសាមគ្គីសង្គ្រោះជាតិកម្ពុជា និងកងកម្លាំងប្រដាប់អាវុធ បដិវត្តន៍កម្ពុជា ដែលមានការគាំទ្រពីប្រជាជននៅទូទាំងប្រទេស ព្រមទាំងទទួលបានការជួយ ឧបត្ថម្ភដ៏ស្មោះសរ ទាន់ពេលវេលា និងមានប្រសិទ្ធភាពពីសំណាក់កងទ័ពស្ម័គ្រចិត្តវៀតណាម និងការគាំទ្រពីកម្លាំងស្នេហាសន្តិភាព និងយុត្តិធម៌នានានៅលើពិភពលោក បានវាយផ្តួលរំលំ របបប្រល័យពូជសាសន៍សម្រេចបានមហាជ័យជម្នះដ៏ត្រចះត្រចង់ជាប្រវត្តិសាស្ត្រ នាថ្ងៃទី៧ មករា ឆ្នាំ១៩៧៩។ នេះគឺជាបណ្តាដំណាក់កាលជាប្រវត្តិសាស្ត្រ ដែលប្រជាជាតិយើងបាន ហែលឆ្លងកាត់ប្រកបដោយទុក្ខវេទនា មហាសោកនាដកម្ម និងការបាត់បង់ ដែលពុំអាចនឹង ពណ៌នាបាន។ ថ្ងៃជ័យជម្នះ៧មករា គឺជាថ្ងៃកំណើតទី២ របស់ប្រជាជនកម្ពុជា មានជ័យជម្នះ ៧ មករា ទើបប្រជាជនកម្ពុជាមានអ្វីៗសព្វយ៉ាងនៅថ្ងៃនេះ។ នេះជាសច្ចធម៌ប្រវត្តិសាស្ត្រ ដែលគ្មានអ្នកណាអាចបំភ្លៃ និងបំផ្លាញបានឡើយ៕
Source: Kampuchea Thmey Daily
0 Comments