ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានិងជាប្រធានគណបក្សប្រជាជនកម្ពុជាបានថ្លែងអះអាងជាថ្មីទៀតចំពោះមហាជនប្រមាណជាង ៦ ម៉ឺននាក់ នៅក្នុងមហាមិទ្ទីងខួបលើកទី៤០ឆ្នាំនៃទិវាជ័យជម្នះ ៧ មករា ដោយប្តេជ្ញាប្រឹងប្រែងសម្រេចឲ្យបាននូវការធានាផលប្រយោជន៍ធំៗចំនួន ៤យ៉ាងជូនដល់ប្រជាជន។
សម្តេចតេជោ ហ៊ុន សែន បានមានប្រសាសន៍ថាឆ្លើយតបទៅនឹងបំណងប្រាថ្នាដ៏ពិសិដ្ឋនិងការជឿទុកចិត្តរបស់ប្រជាជនកម្ពុជាក្នុងនាមរាជរដ្ឋាភិបាលនីតិកាល ទី៦ នៃរដ្ឋសភាសម្ដេចសូមប្ដេជ្ញាជាឱឡារិកជាថ្មីម្តងទៀតថា នឹងពុះពារប្រឹងប្រែងអនុវត្តឲ្យបានសម្រេចជោគជ័យនូវកម្មវិធីនយោបាយរបស់គណបក្សប្រជាជនកម្ពុជាដែលគណបក្សបានសន្យាចំពោះជនរួមជាតិនៅមុនការបោះឆ្នោត ហើយដែលបច្ចុប្បន្នបានក្លាយទៅជាកម្មវិធីនយោបាយរបស់រាជរដ្ឋាភិបាលនីតិកាល ទី៦ នៃរដ្ឋសភា។
សូមជម្រាបថា ការធានាធំៗទាំង៤យ៉ាងដែលសម្តេចតេជោបានប្តេជ្ញាសម្រេចឲ្យបានជូនជនរួមជាតិកម្ពុជារួមមាន
ទី១.ការធានាការពារនូវសន្តិភាពស្ថិរភាពសន្តិសុខនិងសុវត្ថិភាពភូមិឃុំសម្រាប់ការរស់នៅដោយសុខក្សេមក្សាន្តរបស់ប្រជាជននៅគ្រប់ទិសទីក្នុងផ្ទៃប្រទេសព្រមទាំងការការពារឯករាជ្យ,អធិបតេយ្យនិងបូរណភាពទឹកដី មិនឲ្យកម្លាំងណាមករំលោភបំពាន និងបំផ្លាញ បានឡើយ។
ទី២.ការធានាបន្តអភិវឌ្ឍសេដ្ឋកិច្ចនិងសង្គមក្នុងគ្រប់វិស័យដែលផ្ដោតអាទិភាពទៅលើការកែទម្រង់អភិបាលកិច្ចសំដៅពង្រឹង ស្ថាប័នសាធារណៈនិងកសាងរដ្ឋបាលស្អាតស្អំ ព្រមទាំងបង្កើនប្រសិទ្ធភាពនិងលើកកម្ពស់គុណភាពសេវាសាធារណៈ, ការពង្រឹង បរិស្ថានម៉ាក្រូសេដ្ឋកិច្ច ដែលមានសេដ្ឋកិច្ចរឹងមាំធន់នឹងវិបត្តិ និងទ្រទ្រង់កំណើនខ្ពស់ប្រកបដោយចីរភាព,បរិយាប័ន្ន និងសមធម៌, ការបន្តផ្តល់អាទិភាពខ្ពស់ទៅលើការវិនិយោគលើមូលធនមនុស្ស និងការបង្កើនការវិនិយោគទាំងការវិនិយោគសាធារណៈ ទាំងការ វិនិយោគឯកជនលើប្រព័ន្ធហេដ្ឋារចនាសម្ព័ន្ធចាំបាច់ដើម្បីបង្កើនភាពទាក់ទាញនិងគាំទ្រដល់សកម្មភាពសេដ្ឋកិច្ច។
ទី៣. ការធានាជំរុញលើកកម្ពស់ និង កែលម្អជីវភាពរបស់ប្រជាជន តាមរយៈការផ្តល់ជូនដល់ស្រទាប់យុវជននូវការបណ្ដុះ បណ្ដាលជំនាញវិជ្ជាជីវៈប្រកបដោយគុណភាព ព្រមជាមួយនឹងឱកាសទទួលបានការងារធ្វើ,ការជួយកសិករក្នុងការពង្រីកពាណិជ្ជកម្មនិងការរកទីផ្សារលក់កសិផល, ការបន្តដំឡើងប្រាក់ឈ្នួលនិងប្រាក់អត្ថប្រយោជន៍ផ្សេងៗព្រមទាំងការកែលម្អលក្ខខណ្ឌការងារនិងការការពារអាជីពជូនកម្មករនិយោជិត, ការបន្តបង្កើនប្រាក់បៀវត្សរ៍និងប្រាក់សោធននិវត្តន៍ជូនមន្ត្រី សាធារណៈ គ្រប់ប្រភេទ ព្រមទាំងនិវត្តជននិងអតីតយុទ្ធជន,ការពង្រីកបណ្ដាញផ្គត់ផ្គង់និងការបញ្ចុះថ្លៃអគ្គិសនីនិងទឹកស្អាត។ល។
ទី៤. ការធានានូវសុវត្ថិភាពសង្គម និងលំនឹងក្នុងការរស់នៅរបស់ប្រជាជន ទាំងក្នុងពេលបច្ចុប្បន្ន ក៏ដូចជាទៅអនាគតតាមរយៈការអភិវឌ្ឍនិងពង្រឹងប្រព័ន្ធគាំពារសង្គមប្រកបដោយប្រសិទ្ធភាពនិងចីរភាពសម្រាប់ប្រជាជនគ្រប់រូប ជាពិសេសសម្រាប់អ្នកក្រីក្រនិងក្រុមជនងាយរងគ្រោះដោយមិនទុកឲ្យប្រជាជនណាម្នាក់ ទទួលរងគ្រោះដោយមិនមានការ យកចិត្តទុកដាក់នោះឡើយ។
គួររំលឹកជូនថាកាលពីថ្ងៃទី ៦ ខែកញ្ញា ថ្លែងទៅកាន់រដ្ឋសភានីតិកាលទី៦ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានប្តេជ្ញានៅមុខសមាជិកសភាថា នឹងខិតខំប្រឹងប្រែងសម្រេចឲ្យបាននូវខ្លឹមសារនៃ «កម្មវិធីនយោបាយ» របស់រាជរដ្ឋាភិបាលដែលត្រូវបានបង្ហាញជូនរដ្ឋសភា និងតាមរយៈសភាជូនដល់ជនរួមជាតិនិងសាធារណមតិទូទៅនាពេលនេះឆ្លុះបញ្ចាំងអំពីគោលបំណងឧត្តមគតិនិងការប្ដេជ្ញាដ៏មោះមុតរបស់រាជរដ្ឋាភិបាលក្នុងការពុះពារបម្រើជាតិនិងប្រជាជននៅក្នុងគ្រប់កាលៈទេសៈព្រមទាំងបង្ហាញច្បាស់អំពីចក្ខុវិស័យនិងគោលនយោបាយលើគ្រប់វិស័យរបស់រាជរដ្ឋាភិបាលដើម្បីបន្តការពារ និងកសាងមាតុភូមិឆ្ពោះទៅរកអនាគតមួយដ៏រុងរឿងស្របតាមឆន្ទៈ និងបំណងប្រាថ្នារបស់ប្រជាជន។
ក្នុងនាមជាប្រមុខនៃរាជរដ្ឋាភិបាល សម្រាប់នីតិកាលទី ៦ នៃរដ្ឋសភា ខ្ញុំក៏សូមសន្យា និងធ្វើការប្តេជ្ញាជាឱឡារិក ចំពោះបងប្អូនជនរួមជាតិនៅទូទាំងប្រទេសថា ខ្ញុំនឹងប្តូរផ្តាច់ដឹកនាំស្ថាប័ននីតិប្រតិបត្តិរបស់ជាតិ ធានាអនុវត្តឲ្យបានសម្រេចជោគជ័យ នូវ «កម្មវិធីនយោបាយរបស់រាជរដ្ឋាភិបាល»ដែលជាការសន្យារបស់គណបក្សប្រជាជនជូនដល់ប្រជាពលរដ្ឋនៅមុនការបោះឆ្នោត ហើយដែលទើបនឹងដាក់ជូនអង្គរដ្ឋសភាឧត្តុង្គឧត្តម នាពេលនេះ ពិសេសផ្តោតការយកចិត្តទុកដាក់លើវិធានការជាក់ស្តែងជាអាទិភាពទាំង ៤ ដែលនឹងត្រូវដាក់ឲ្យអនុវត្តនៅឆ្នាំ២០១៩ រួមមាន ទី១- បន្តបង្កើនប្រាក់ឈ្នួលពលកម្មរបស់កម្មករ/និយោជិត និងរៀបចំបើកប្រាក់ឈ្នួលពលកម្មក្នុងរយៈពេល ២ សប្តាហ៍ម្តង។ទី២- បន្តបង្កើនបៀវត្សរ៍ និងប្រាក់សោធនិវត្តជូនមន្ត្រីរាជការគ្រប់ប្រភេទ ព្រមទាំងនិវត្តជន និងអតីតយុទ្ធជន និងរៀបចំបើកបៀវត្សរ៍ និងប្រាក់សោធននិវត្ត ក្នុងរយៈពេល ២ សប្តាហ៍ម្តង តាមប្រព័ន្ធធនាគារ។ទី៣- បញ្ចុះថ្លៃអគ្គិសនី តាមកម្មវិធី និងតារាងថ្លៃជាក់លាក់នៅក្នុងឆ្នាំ ២០១៩ និងឆ្នាំ ២០២០។ទី៤- ដាក់ឲ្យអនុវត្តនូវកម្មវិធីគាំពារសង្គម ជាអាទិភាពមួយចំនួនរួមមាន៖ (១)- កម្មវិធីឧបត្ថម្ភស្ត្រីមានផ្ទៃពោះ និងកុមារក្រោម ២ ឆ្នាំ នៃគ្រួសារក្រីក្រ (២)- របបហានិភ័យការងារសម្រាប់មន្ត្រីសាធារណៈ និង (៣)- របបសោធនសម្រាប់កម្មករ/និយោជិត។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជាបានបន្តថា ស្មារតី ៧ មករាស្ថិតនៅជានិច្ចក្នុងដួងចិត្តរបស់យើង។ ស្មារតី ៧ មករាគឺជាកម្លាំងយ៉ាងធំធេងដែលធ្វើឲ្យយើងយកឈ្នះបានលើគ្រប់ឧបសគ្គនិងការលំបាកសព្វបែបយ៉ាងក្នុងការកសាងនិងការពារមាតុភូមិ។ ស្មារតី ៧ មករាគឺសាមគ្គីភាពវីរភាពនិងជ័យជំនះ។ បច្ចុប្បន្នយើងកំពុងឈរយ៉ាងរឹងមាំក្នុងភាពជាម្ចាស់លើប្រទេសជាតិនិងជោគវាសនារបស់ខ្លួនហើយក៏កំពុងឈានទៅមុខយ៉ាងស្វាហាប់ប្រកបដោយភាពជឿជាក់។ ក៏ប៉ុន្តែប្រការនេះពុំមែនមានន័យថា ស្នាមរបួសនិងការឈឺចាប់ពីអតីតកាលបានជាសះអស់ទាំងស្រុងហើយដំណើរទៅមុខរបស់យើងនឹងមានភាពរលូនដោយគ្មានបញ្ហាប្រឈមនឹងហានិភ័យនោះទេ។ ច្បាស់ណាស់ថា នៅក្នុងការដឹកនាំនាវាកម្ពុជាបន្តទៅមុខឆ្ពោះទៅរកត្រើយនៃវិបុលភាពកាន់តែចម្រើនរុងរឿងស្របតាមចក្ខុវិស័យវែងឆ្ងាយរបស់ជាតិយើងនិងត្រូវបន្តពុះពារជំនះនូវបញ្ហាប្រឈមនឹងការលំបាកស្មុគស្មាញជាច្រើនថែមទៀត។ ក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជានិងជាប្រធានគណបក្សប្រជាជនកម្ពុជាដែលបានទទួលការគាំទ្រយ៉ាងទូលំទូលាយពីប្រជាជន សម្តេចដឹងច្បាស់អំពីការទទួលខុសត្រូវរបស់ខ្លួនចំពោះប្រជាជាតិទាំងមូល។
សម្តេចតេជោ ហ៊ុន សែន ក៏បានសម្ដែងកតញ្ញុតាធម៌ ដ៏ជ្រាលជ្រៅបំផុតជូនបងប្អូនជនរួមជាតិនៅគ្រប់ទិសទីដែលបានគាំទ្រសម្តេចនិងផ្តល់ឱកាសឲ្យសម្តេចបានបន្តបម្រើជាតិនិងមាតុភូមិ។ ការគាំទ្រនេះឆ្លុះបញ្ចាំងឲ្យឃើញច្បាស់នូវជំនឿនិងសេចក្ដីសង្ឃឹមមុតមាំរបស់ជាតិទាំងមូល ចំពោះចីរភាពនិងភាពរឹងមាំនៃសុខសន្តិភាពនិងការបង្រួបបង្រួមជាតិក៏ដូចជាចំពោះការបន្តដំណើរការកែទម្រង់រដ្ឋស៊ីជម្រៅក្នុងគ្រប់វិស័យដោយផ្អែកលើសាមគ្គីភាពគតិបណ្ឌិតទេពកោសល្យភាពអង់អាចក្លាហាននិងសេចក្ដីព្យាយាមដើម្បីជំរុញទៅមុខថែមទៀតនូវការផ្លាស់ប្ដូរជាវិជ្ជមានក្នុងសង្គមជាតិឆ្ពោះទៅរកភាពកាន់តែចម្រើនរុងរឿងនិងការលើកកម្ពស់ជីវភាពរស់នៅរបស់ប្រជាជនគ្រប់ស្រទាប់ជាន់ថ្នាក់អោយកាន់តែប្រសើរឡើងឥតឈប់៕
Source: Kampuchea Thmey Daily
0 Comments